Dai ka daw mauyon na si Jesus an pinakadakulang Paratukdo na nabuhay digdi sa daga? Tibaad napurbaran mo nang arugon an pira sa mga paagi niya nin pagtutukdo, arog baga kan paggamit nin hapot asin ilustrasyon. Pero, narisa mo na daw na parati siyang naggagamit nin pagkakalain pag siya nagtutukdo?

Dakul na tawo an naggagamit nin pagkakalain kun sinda nagtataram. Posibleng nagigibo mo man iyan, na sa parati dai mo pinag-iisipan. Puwedeng nasasabi mo an arog kan, “Sabi ninda hinog na gabos an prutas, pero mga matagason pa ini.” O kaya, “Masusupgon siyang aki kaidto, pero ngunyan mainistoryahon na.”

Pag ika nagtataram sa arog kaiyan na paagi, nagsasabi ka nguna nin sarong katunayan o ideya; dangan nag-iintrodusir ka nin sarong pagkakalain paagi sa paggamit kan mga tataramon na arog kan pero, alagad, imbes, kundi, o sa ibong na lado. O pakatapos na gamiton an saro sa mga tataramon na iyan, puwede mong ipahiling an pagkakalain paagi sa pagtao nin dagdag na impormasyon o nin dagdag na puwersa sa ideya. Kun arog ka kaiyan magtaram, iyan talagang natural pagdangugon asin nakakatabang sa iba na makua an punto mo.

Dawa pa kun bihira sa ibang lengguwahe o kultura na maggamit nin pagkakalain, marahay pa man giraray na midbidon niyato an kahalagahan kaiyan. Taano? Huling kadakul kaiyan sa ipinasabong na Tataramon nin Diyos. Si Jesus parating naggagamit nin pagkakalain. Girumdumon ini: ‘Dai nin siisay man na minasulo nin ilawan asin minabugtak kaiyan sa irarom nin takadan, kundi sa bugtakan nin ilaw.’ ‘Dai ako napadigdi sa paglaglag [kan Ley] kundi sa pag-utob.’ ‘Nagkadarangog nindo na isinabi, “Dai ka magsambay.” Alagad ako nagsasabi saindo na an gabos na maghiling sa sarong babayi . . .’ ‘Isinabi kaidto, “Mata sa mata asin ngipon sa ngipon.” Alagad ako nagsasabi saindo na dai kamo magtumang sa maraot na tawo, kundi an siisay man na tumampal saimo sa tuo mong pisngi, itao mo pa saiya an sa ibong.’—Mat. 5:15, 17, 27, 28, 38, 39.

Naggamit man nin arog kaiyan na mga pagkakalain an iba pang libro kan Bibliya. Makakatabang iyan sa saimo na masabutan an punto o maiduon an sarong nangungurog na paagi sa paggibo nin sarong bagay. Kun ika sarong magurang, hurop-hurupon an pagkakalain na ini: ‘Kamo mga ama, dai nindo pagpaangguton an saindong mga aki, kundi padakulaon sinda sa pagsagwi asin sa hatol nin Kagurangnan.’ (Efe. 6:4) Kun simple sanang sinabi ni apostol Pablo na an aki dapat padakulaon kan ama (o ina) sa pagsagwi o disiplina nin Diyos, iyan madunong asin tama man. Pero, huli sa paggamit nin pagkakalain, napalataw na marhay an ideya kan sabihon niyang ‘dai sinda pagpaangguton kundi padakulaon sa pagsagwi asin sa hatol nin Kagurangnan.’

Sa kapitulo man sanang iyan, si Pablo nagsurat: ‘Bakong mga tawo an satong kaiwal, kundi mga hukbo nin mga maraot na espiritu sa kalangitan.’ (Efe. 6:12, BPV) * Posibleng marhay na an pagkakalain na iyan nakakatabang sa saimo na masabutan na ika igwa nin pakikilaban na bako nanggad basta-basta. An kalaban mo bakong mga tawo, kundi mga hukbo nin maraot na mga espiritu.

Sa iyo man sanang libro kan Bibliya, an Efeso, dakul ka pang mahihiling na teksto kun sain naggamit si Pablo nin pagkakalain. An paghurop-hurop sa mga ini makakatabang sa sato na makua an punto ni Pablo asin masabutan nin mas malinaw kun ano an maninigo tang gibuhon.

Mauugma asin makikinabang ka kun pag-aadalan mo an tsart na nagpapahiling nin mga pagkakalain na ginamit sa Efeso kapitulo 4 asin 5. Mantang binabasa mo an kada pagkakalain, isipon an saimong buhay. Haputon an sadiri: ‘Ano talaga an kaisipan ko? Ano an reaksiyon ko pag nasa sitwasyon na ini o na kapareho kaini? Arin daw sa duwang ini an iisipon kan iba manungod sako?’ Kun marealisar mo sa sarong partikular na pagkakalain na may kaipuhan kang pauswagon, pagmaigutan na gibuhon iyan. Tugutan mong makatabang sa saimo an pagkakalain na iyan.

Puwede man nindong gamiton an tsart sa saindong pampamilyang pagsamba. Inot, puwedeng basahon nguna kan lambang miyembro kan pamilya an mga pagkakalain. Dangan puwedeng sambiton kan saro sa saindo an inot na kabtang kan sarong pagkakalain, asin hihinguwahon kan ibang miyembro kan pamilya na girumdumon an puntong idinuduon sa ikaduwang kabtang. Puwede iyan magresulta sa maugmang pag-urulay kan pamilya dapit sa kun paano nindo mas lubos na ikakaaplikar an ikaduwang kabtang. Iyo, an arog kaiyan na pagsiyasat sa mga pagkakalain makakatabang sa sato, hoben man o gurang, na padagos na ipahiling an Kristiyanong paggawi sa laog kan pamilya asin sa iba pang lugar.

Miyentras na urog mong nasasabutan an kahalagahan kan paggamit nin pagkakalain, magigin mas madali na sa saimo na marisa iyan sa Bibliya, asin mahihiling mong nakakatabang na marhay iyan sa saimong Kristiyanong ministeryo. Halimbawa, puwede mong sabihon sa kagharong: “Dakul an nagsasabi na an kada saro sa sato igwa nin imortal na kalag, pero hilinga ining sinasabi kan Tataramon nin Diyos.” O puwede mong haputon an sarong tinutukduan sa Bibliya: “Kadaklan sa mga tawo sa lugar na ini nagtutubod na an Diyos asin si Jesus saro sanang persona; pero, ano an nanudan ta na sinasabi kan Bibliya? Ika, ano an pagtubod mo?”

Iyo, an Kasuratan naggagamit nin dakul na nakakapagtukdong pagkakalain, na makakatabang sa sato na maglakaw sa dalan nin Diyos. Asin puwede kitang maggamit nin pagkakalain tanganing matabangan an iba na maaraman an katotoohan sa Bibliya.