“Akong si Jehova na Saindong Dios Banal”
Rumani sa Dios
“Akong si Jehova na Saindong Dios Banal”
“BANAL, banal, banal si Jehova Dios.” (Kapahayagan 4:8) Paagi sa mga tataramon na iyan, ipinapaliwanag kan Biblia na si Jehova banal, na kalabot an pagigin dalisay asin malinig, sa pinakahalangkaw na sokol kaiyan. Harayo nanggad an Dios sa pagigin makasalan; sa ano man na paagi dai sia puedeng maramogan o mamantsahan nin kasalan. An boot daw sabihon kaini imposible nanggad para sa bakong sangkap na mga tawo na magkaigwa nin relasyon sa labi-labi kabanal na Dios? Bako nanggad! Estudyaran niato an mga tataramon na pano nin paglaom na nasa Levitico kapitulo 19.
Sinabihan ni Jehova si Moises: “Kaolayon mo an bilog na kasararoan kan mga aki ni Israel.” An suminunod na mga tataramon aplikado sa gabos na nasa nasyon na iyan. Ano an dapat na sabihon sa sainda ni Moises? An Dios nagsabi pa: “Sabihon mo sa sainda, ‘Maninigo kamong magin banal, huli ta akong si Jehova na saindong Dios banal.’ ” (Bersikulo 2) An lambang Israelita dapat na magpaheling nin kabanalan. An mga tataramon na “maninigo kamong” nagpapaheling na ini bakong sarong suhestion kundi sarong pagboot. Imposible daw an kahagadan na iyan nin Dios?
Mangnohon na sinambit ni Jehova an saiya mismong kabanalan, bako bilang sarong pamantayan na dapat pantayan, kundi bilang sarong dahelan kun taano ta itinao an togon. Sa ibang pagtaram, dai sinabi ni Jehova sa bakong sangkap na mga parasamba sa saiya sa Israel na magin arog sinda sa saiya kabanal. Imposible iyan. Si Jehova, an “Kabanalbanale,” nakakalabi sa gabos na iba pa kun dapit sa kabanalan. (Talinhaga 30:3) Minsan siring, huling si Jehova banal, inaasahan nia an mga parasamba sa saiya na magin banal—an boot sabihon, sa pinakaposibleng magigibo nin bakong sangkap na mga tawo. Sa anong mga paagi puede sindang magin banal?
Pakatao ni Jehova kan pagboot na magin banal, itinao Nia paagi ki Moises an mga kahagadan na may koneksion sa gabos na aspekto nin buhay. An lambang Israelita inaasahan na kuyogon an mga pamantayan nin paggawe arog baga kan minasunod: magpaheling nin tamang paggalang sa mga magurang asin gurang (bersikulo 3, 32); magpaheling nin konsiderasyon sa mga bungog, buta, asin iba pang nagsasakit nin makuri (bersikulo 9, 10, 14); magin onesto asin dai magpalaenlaen sa pagtratar sa iba (bersikulo 11-13, 15, 35, 36); asin kamotan an kapwa nia parasamba nin siring sa saiya man sana. (Bersikulo 18) Paagi sa pagkuyog dian asin sa iba pang itinaong mga pamantayan, an Israelita ‘magigin nanggad banal sa saiyang Dios.’—Bilang 15:40.
An pagboot mapadapit sa kabanalan nagtatao sa sato nin mahalagang marhay na pakasabot sa kaisipan asin mga pamamaagi ni Jehova Dios. An sarong bagay iyo na nanodan niato na tanganing magkaigwa nin dayupot na relasyon sa saiya, kaipuhan niatong gibohon an satong pinakamakakaya tanganing mamuhay kaoyon kan saiyang mga pamantayan sa banal na paggawe. (1 Pedro 1:15, 16) Paagi sa pagkuyog sa mga pamantayan na iyan, magkakaigwa kita kan pinakamarahay na paagi nin pamumuhay na posible.—Isaias 48:17.
An pagboot na magin banal nagpapaheling man na si Jehova may kompiansa sa mga parasamba sa saiya. Dai noarin man inaasahan ni Jehova an labi sa makakaya niato. (Salmo 103:13, 14) Aram nia na kitang mga tawo, na ginibo sa saiyang ladawan, may kakayahan na magpatalubo nin kabanalan—sa kisiera relatibong paagi. (Genesis 1:26) Namomotibar daw kamo na makanood nin orog pa sa kun paano kamo mas magigin dayupot sa banal na Dios, si Jehova?
[Ritrato sa pahina 9]
Kita may kakayahan na magpatalubo nin kabanalan