Hinahanap Nia an Marahay sa mga Tawo
Rumani sa Dios
Hinahanap Nia an Marahay sa mga Tawo
“AN GABOS na puso sinisiyasat ni Jehova, asin an gabos na tendensia kan mga kaisipan saiyang namamansayan.” (1 Cronica 28:9) Katuyohan kan ipinasabong na mga tataramon na iyan na magkaigwa naggad kita nin pag-apresyar sa rarom kan interes ni Jehova sa sato. Hinahanap ni Jehova an marahay sa satong puso dawa ngani kita bako nanggad sangkap. Risang-risa ini sa mga tataramon nia dapit ki Abias, na yaon sa 1 Hade 14:13.
Si Abias nabuhay sa sarong maraoton na pamilya. An saiyang ama, si Jeroboam, iyo an pinakaenot sa sarong apostatang dinastiya. * Nagin katuyohan ni Jehova na biyong sigidon an kamag-anakan ni Jeroboam, “kun paanong sinisigid nin saro an odo.” (1 Hade 14:10) Alagad ipinagboot nin Dios na solamente sarong miembro kan pamilya ni Jeroboam, si Abias—na grabe an helang—an tawan nin onorableng lobong. * Taano? An Dios nagpaliwanag: “May nakua sa saiya na sarong bagay na marahay para ki Jehova na Dios nin Israel sa kamag-anakan ni Jeroboam.” (1 Hade 14:1, 12, 13) Ano an sinasabi sa sato kan mga tataramon na ini manongod ki Abias?
Dai sinasabi kan Biblia na si Abias sarong maimbod na parasamba nin Dios. Pero, igwa nin karahayan sa saiya minsan paano. An karahayan na ini “para ki Jehova,” na tibaad may koneksion sa pag-samba sa Saiya. An Rabinikong mga parasurat nagsusuherir na si Abias nagpasiring sa templo sa Jerusalem tanganing sumamba o na hinale nia an mga bantay na ibinugtak kan saiyang ama tanganing olangon an mga Israelita sa pagpasiring sa Jerusalem.
Ano man an eksaktong ginibo nia, risang gayo an karahayan ni Abias. Enot, tunay iyan. An karahayan na ini yaon “sa saiya”—an boot sabihon, nasa puso nia. Ikaduwa, pambihira iyan. Ipinaheling ni Abias an karahayan na ini dawa ngani kabilang sia “sa kamag-anakan ni Jeroboam.” Sarong iskolar sa Biblia an nagsabi: “Kahangahanga nanggad an mga tawo na napagdanay an saindang karahayan minsan ngani nakaistar sinda sa maraot na mga lugar asin pamilya.” An saro pa nagsabi na an karahayan ni Abias “risang-risa . . . , kun paanong an mga bitoon maliwanagon kun madiklom an langit, asin an mga sedro magayonon kun napapalibotan nin mga kahoy na mayong dahon.”
Pinakamahalaga, an mga tataramon kan 1 Hade 14:13 may magayon na itinotokdo sa sato manongod ki Jehova asin kun ano an hinahanap nia sa sato. Tandaan na may sarong bagay na marahay na “nakua” ki Abias. Minalataw na siniyasat ni Jehova an puso ni Abias sagkod na may nakua Siang kadikit na karahayan. Kun ikokomparar sa pamilya nia, sinabi nin sarong parasurat na si Abias an nagsosolong perlas sa “tambak nin saradit na gapo.” Pinahalagahan ni Jehova an karahayan na ini asin binalosan iyan, na kinaherakan minsan paano an sarong miembrong ini nin maraoton na pamilya.
Bako daw nakakapakosog sa boot na maaraman na hinahanap asin pinapahalagahan ni Jehova an marahay sa sato sa ibong kan satong mga pagkabakong sangkap? (Salmo 130:3) An pakaaram kaini maninigong magpahiro sa sato na orog na rumani ki Jehova, an Dios na maingat na nagsisiyasat kan satong puso tanganing hanapon dawa an pinakakadikit na karahayan.
[Mga Nota sa Ibaba]
^ par. 2 Nag-establisar si Jeroboam nin idolatrosong pagsamba sa ogbon na baka sa sampulong tribong kahadean nin Israel sa amihanan na may katuyohan na pugolan an mga tawo sa pagpasiring sa Jerusalem tanganing sumamba ki Jehova sa templo duman.
^ par. 2 Kan mga panahon kan Biblia, an dai pagtao nin disenteng lobong sa saro minamansay na kapahayagan nin kawaran kan pag-oyon nin Dios.—Jeremias 25:32, 33.