Naghahapot an mga Parabasa . . .

Igwa daw nin kapinonan an Dios?

▪ An Biblia nagsisimbag na an Dios mayong kapinonan. An Dios pirme nang nag-eeksister. Gurano man kadepisil marorop an ideya na an Dios daing sagkod, dai niato puedeng haboan an ideyang iyan huli sana ta dai niato iyan lubos na nasasabotan.

Talaga daw na rasonableng laoman na masasabotan niato an gabos na paagi nin Dios? Si apostol Pablo nagsabi: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan!” (Roma 11:33) Dai kaya kan satong isip na lubos na marorop an rarom kan kadonongan asin kaaraman nin Dios kun paanong dai kayang masabotan nin sarong omboy an gabos na paagi nin sarong magurang. An ipinasabong na mga tataramon na ini ni Pablo, minsan ngani sa pangenot nanonongod sa pagigin daing kaagid kan kadonongan asin pagkaherak nin Dios, nagsusuherir na may mga aspekto asin gibo si Jehova Dios na hararom na marhay tanganing masabotan niato. An ideya na an Dios mayo nin kapinonan minalataw na saro sa mga iyan. Pero, lubos kitang makapagtitiwala sa mga itinotokdo kan Biblia manongod sa Dios. Sinabi ni Jesu-Cristo mapadapit sa sagradong mga isinurat: “An saimong tataramon katotoohan.”—Juan 17:17.

Sinabi ni Moises sa pamibi nia ki Jehova: “Danay nang ika kaidto, asin magdadanay na ika.” (Salmo 90:2, The Holy Bible, New Century Version) Digdi, an pag-eksister nin Dios ilinaladawan ni Moises sa duwang direksion. An saro paabante sa ngapit. Si Jehova “an Saro na nabubuhay sagkod pa man.” (Kapahayagan 4:10) Sa siring, an pag-eksister nin Dios nagpapadagos sa daing sagkod na ngapit. An saro pa pabalik sa nakaagi. Sa ibang pagtaram, an Dios dai linalang ni may kapinonan man an saiyang pag-eksister. Imbes, an pag-eksister nin Dios kaidto pang nakaaging panahon na dai masokol.

An abstraktong mga ideya masakit masabotan kan kadaklan sa sato. Pero, kaipuhan niato kun beses na atubangon an masakit na mga ideya, siring baga kan mga numerong positive asin negative. An pagbilang nin numero puedeng magpadagos nin daing katapusan, pataas man o pababa. Dai daw niato puedeng iaplikar an halimbawang ini sa bilang nin mga taon sa buhay kan Kaglalang?

Angay kun siring na Dios sana an igwa kan daing kaagid na titulong “Hadeng daing sagkod.” (1 Timoteo 1:17) Isip-isipa na sana: Si Jesu-Cristo, an manampulong ribong anghel sa langit, asin an mga tawo digdi sa daga gabos igwa nin kapinonan huling sinda linalang. (Colosas 1:15, 16) Bakong siring kaiyan an Dios. An pag-insistir na an Dios dapat sanang linalang minaresulta sa daing papadumanan asin paitok-itok na pangangatanosan manongod sa kun siisay an naglalang sa Kaglalang. Dai, ta si Jehova sana an nag-eeksister “puon sa daing-kapinunan sagkod sa daing-kasagkoran.” (Salmo 90:2, An Banal na Biblia, Edisyon na 1997) Sa ibang pagtaram, si Jehova nag-eksister “bago pa an gabos na panahon.”—Judas 25, nota sa ibaba.

Pero, tandaan na an ideya dapit sa daing sagkod na pag-eksister nin Dios bako sanang sarong katunayan na mayong koneksion sa sato. An maingat na pagsiyasat sa pamibi ni Moises naghahayag na an pagigin daing sagkod nin Dios naggagarantiya sa sato nin mamomoton na panugang buhay na daing katapusan. Kabaliktaran kan halipoton na buhay niato sa presente, ilinaladawan an Dios bilang ‘tunay na erokan niato sa sunod-sunod na kapag-arakian.’ Bilang mamomoton na Ama, si Jehova pirmeng yaon para sa mga lingkod nia—kaidto, ngonyan, asin sagkod lamang. Logod na maranga kamo kan makangangalas na katotoohan na iyan!—Salmo 90:1.