Puede daw Nindong Mamidbid an Dios sa Ngaran?
Sarong onra na taratarahon asin apodon sa ngaran an sarong importanteng persona. An mga may halangkaw na katongdan parateng inaapod sa mga titulo na siring kan “Presidente,” “Saindong Kamahalan,” o “Kagalanggalang.” Kaya kun an saro na may halangkaw na posisyon magsabi sa saimo, “Apodon mo na sana tabi ako sa ngaran ko,” daing duda na dakulang onra iyan para sa saimo.
AN TUNAY na Dios nagsasabi sa sato sa saiyang nasusurat na Tataramon, an Biblia: “Ako si Jehova. Iyan an sakong ngaran.” (Isaias 42:8) Minsan ngani dakol man siang titulo, siring kan “Kaglalang,” “Makakamhan sa Gabos,” asin “Soberanong Kagurangnan,” pirme niang tinatawan nin onra an saiyang maimbod na mga lingkod paagi sa pagtogot sa sainda na apodon sia sa saiyang personal na ngaran.
Halimbawa, si Moises nakimaherak kaidto ki Jehova na nagsasabi: “Dispensara ako, Jehova.” (Exodo 4:10) Sa dedikasyon kan templo sa Jerusalem, pinonan ni Hadeng Salomon an saiyang pamibi paagi sa mga tataramon na: “O Jehova.” (1 Hade 8:22, 23) Asin kan makipag-olay si propeta Isaias sa Dios para sa banwaan nin Israel, sia nagsabi: “Ika, O Jehova, an Ama niamo.” (Isaias 63:16) Malinaw nanggad, inaagda kita kan satong Ama sa langit na apodon sia sa saiyang ngaran.
Minsan ngani mahalaga an pag-apod ki Jehova sa ngaran, orog pa an kalabot sa tunay na pakamidbid sa saiya sa ngaran. Kun dapit sa indibiduwal na namomoot asin nagtitiwala ki Jehova, sia nanunuga: “Iingatan ko sia huli ta naaraman nia an sakuyang ngaran.” (Salmo 91:14) Malinaw nanggad, siertong dakol pa an kalabot sa pakaaram sa ngaran nin Dios, huling iyan importanteng marhay tanganing akoon an proteksion nin Dios. Kun siring, ano an kaipuhan tanganing mamidbid nindo si Jehova sa ngaran?