Arogon an Saindang Pagtubod

Sia “Padagos na Nagdakula Kaiba ni Jehova”

MINAMASDAN ni Samuel an reaksion kan saiyang mga kahimanwa. Sinda nagkakatiripon sa banwaan nin Gilgal huling ipinaapod sinda kan maimbod na lalaking ini na naglingkod bilang propeta asin hokom sa laog nin mga dekada. Mayo o Hunyo kaidto sa modernong kalendaryo; nagpoon na an tigmara. Bulaw na an mga oma sa rehion huli sa mga trigo na puede nang anihon. Silensio an mga tawo. Paano maaabot ni Samuel an puso ninda?

Dai nasasabotan kan mga kahimanwa nia kun gurano kaseryoso kan situwasyon ninda. Pirit nindang hinahagad na pamahalaan sinda nin sarong tawong hade. Dai ninda naiisip na nagpapaheling na palan sinda nin grabeng kawaran nin paggalang sa saindang Dios, si Jehova, asin sa propeta nia. Garo na man sana ninda isinisikwal si Jehova bilang Hade ninda! Paano sinda mapapahiro ni Samuel na magsolsol?

Nagtaram si Samuel. “Ako gurang na asin ubanon na,” an sabi nia sa sainda. Huling sia ubanon na, nagin mas mapuersa an sinabi nia. Dangan sia nagsabi: “Ako naglakaw sa atubangan nindo poon sa sakong pagkaaki sagkod sa aldaw na ini.” (1 Samuel 11:14, 15; 12:2) Minsan ngani gurang na si Samuel, dai nia nalingawan an saiyang pagkahoben. Malinaw pa an memorya nia dapit sa enot na mga taon na idto. An mga desisyon na ginibo nia kan panahon na idto, mantang nagdadakula, naggiya sa saiya sa buhay na may pagtubod asin debosyon sa saiyang Dios, si Jehova.

Kaipuhan ni Samuel na padagos na pakosogon asin papagdanayon an pagtubod nia huling sia napapalibotan nin mga tawo na mayong pagtubod asin bakong maimbod. Ngonyan, masakit man pakosogon an pagtubod, huli ta kita nabubuhay sa kinaban na mayong pagtubod asin maraot. Helingon ta kun ano an manonodan niato sa halimbawa ni Samuel, poon kan pagkaaki nia.

‘Naglilingkod ki Jehova, Bilang Aki’

Pambihira an pagkaaki ni Samuel. Pagkabutas sa saiya sa pagsuso, na tibaad mga kuatro anyos, sia nagpoon nang maglingkod sa sagradong tabernakulo ni Jehova sa Silo, na labing 30 kilometros an rayo sa harong ninda sa Rama. Sia itinagama ki Jehova kan saiyang mga magurang, si Elcana asin Ana, para sa espesyal na klase nin paglilingkod bilang Nazareo sa bilog niang buhay. * Nangangahulogan daw ini na si Samuel pinabayaan huling dai namomotan kan mga magurang nia?

Dai nanggad! Aram ninda na aatamanon an saindang aki sa Silo. Mayong duda na an Halangkaw na Saserdoteng si Eli an namahala sa mga bagay-bagay, huling pirme niang kaibanan si Samuel sa mga gibohon. Dakol man na babae an naglingkod sa nagkapirang gibohon may koneksion sa tabernakulo, na malinaw na organisado.—Exodo 38:8.

Apuera kaini, nungkang nalingawan ni Ana asin Elcana an saindang namomotan na panganay na aki, na an pagkamundag mismo simbag sa sarong pamibi. Si Ana naghagad sa Dios nin sarong aking lalaki, na nanunugang itatagama ini sa Dios para sa sagradong paglilingkod. Kun nagbibisita si Ana kada taon, dinadarahan nia si Samuel nin bagong bado na mayong manggas na ginibo nia para sa paglilingkod kaini sa tabernakulo. Siertong pinahalagahan kan sadit na aking ini an mga pagbisitang idto. Mayong duda na ikinaogma nia an mamomoton  na pagparigon asin paggiya kan saiyang mga magurang mantang sia tinotokdoan ninda na pribilehio nanggad an maglingkod ki Jehova sa daing kaagid na lugar na iyan.

Dakol an manonodan nin mga magurang ngonyan dapit ki Ana asin Elcana. Normal na sana na sa pagpadakula sa saindang mga aki, an bilog na konsentrasyon nin mga magurang yaon sa pagtao nin materyal na mga bagay, alagad binabaliwala an espirituwal na mga pangangaipo. Alagad inenot kan mga magurang ni Samuel an espirituwal na mga bagay, asin dakula an nagin epekto kaiyan sa pagkatawo kan saindang aki pagdakula kaini.—Talinhaga 22:6.

Maiimahinar niato na an aki nagdadakula asin naglilibotlibot sa mga bulod kan Silo. Mantang nakadungaw sia sa banwaan asin sa kababan na nasa sarong gilid kaiyan, posibleng marhay na napano an saiyang puso nin kaogmahan asin pag-orgolyo kan maheling nia an tabernakulo ni Jehova. An tabernakulong iyan sarong sagradong lugar nanggad. * Itinogdok haros 400 na taon na an nakaagi sa pagdirehir mismo ni Moises, iyan an solamenteng sentro para sa dalisay na pagsamba ki Jehova sa bilog na kinaban kaidto.

Naparani nanggad sa puso ni Samuel an tabernakulo. Sa estorya na isinurat nia kan huri, mababasa niato: “Si Samuel naglilingkod sa atubangan ni Jehova, bilang aki, na may sulot na efod na lino.” (1 Samuel 2:18) An simpleng badong iyan na mayong manggas malinaw na tanda na si Samuel katabangtabang kan mga saserdote sa tabernakulo. Minsan ngani bakong kabilang sa grupo nin mga saserdote, kaiba sa mga obligasyon ni Samuel an pagbukas kada aga kan mga pintong palaog sa patyo kan tabernakulo asin pag-asikaso sa gurang nang si Eli. Pero, dawa ngani ikinakaogma nia an mga pribilehiong iyan, nag-abot an panahon na naribok an saiyang inosenteng puso. May maraoton na nangyayari sa harong ni Jehova.

Pagdadanay na Malinig sa Ibong nin Karatan

Kan si Samuel aki pa, sia mismo nakaheling nin grabeng karatan. Si Eli may duwang aki, si Ofni asin Finehas. Mababasa niato sa estorya ni Samuel: “An mga aking lalaki ni Eli daing kamanungdanan; dai ninda minidbid si Jehova.” (1 Samuel 2:12) Magkakonektar na marhay an duwang ideya sa bersikulong ini. Si Ofni asin Finehas “daing kamanungdanan”—sa literal, “mga aki nin mayong pakinabang”—huling sinda mayong pagpahalaga ki Jehova. Binaliwala ninda an saiyang matanos na mga pamantayan asin kahagadan. Ini an nagin dahelan kan gabos na iba pang kasalan ninda.

Espesipiko an Ley nin Dios manongod sa mga obligasyon kan mga saserdote asin sa kun paano sinda dapat magdolot nin mga atang sa tabernakulo nia. May marahay nanggad na dahelan iyan! An mga atang na idto nagrepresentar sa probisyon nin Dios na magpatawad nin mga kasalan tanganing an mga tawo magin malinig sa pagheling nia, na angay na tawan nin bendisyon asin paggiya. Alagad inimpluwensiahan ni Ofni asin Finehas an mga kapwa saserdote na magpaheling nin grabeng kawaran nin paggalang sa mga dolot. *

Imahinara an aking si Samuel na nakaburarat an mga mata mantang minamasdan an siring kagrabeng pag-abuso na dai itinatanos. Gurano daw kadakol na tawo an naheling nia—kaiba na an mga kahimanwang pobre, hamak, asin inaapi—na nagduduman sa sagradong tabernakulong iyan asin naglalaom na makakua nin espirituwal na karangahan asin kosog, alagad minapuli na desganado, nakolgan, o napasupog? Asin ano daw an namatean nia kan maaraman nia na binaliwala man ni Ofni asin Finehas an mga ley ni Jehova dapit sa seksuwal na moralidad, huling sinda nakipagrelasyon sa nagkapirang babae na naglilingkod duman sa tabernakulo? (1 Samuel 2:22) Tibaad sia naglaom nanggad na may gigibohon si Eli dapit dian.

 Si Eli an pinakaangay na magtanos sa nagdadakulang problemang ini. Bilang halangkaw na saserdote, sia an may paninimbagan sa nangyayari sa tabernakulo. Bilang sarong ama, obligado siang itanos an mga aki nia. Total, an ipinapahamak ninda iyo an sadiri ninda mismo saka an dakol na iba pa sa nasyon. Minsan siring, parehong dai nagibo ni Eli an paninimbagan nia bilang ama asin halangkaw na saserdote. Sinaway nia sana nin kadikit an mga aki nia. (1 Samuel 2:23-25) Alagad mas magabat nanggad na disiplina an kaipuhan ninda. Maninigo nanggad sindang magadan huli sa mga kasalan na ginigibo ninda!

Gruminabe an mga bagay-bagay sagkod sa punto na si Jehova nagsugo ki Eli nin “lingkod nin Dios,” sarong dai nginaranan na propeta, na may darang magabat na mensahe nin paghokom. Sinabihan ni Jehova si Eli: “Padagos mong tinatawan nin onra an saimong mga aki nin labi kisa sa sako.” Dangan, ihinula nin Dios na magagadan sa saro sanang aldaw an maraot na mga aki ni Eli asin magsasakit nanggad an pamilya nia, na mawawaran pa ngani kan halangkaw na katongdan sa grupo nin mga saserdote. Nakapabago daw sa pamilyang iyan an mapuersang patanid na ini? Mayo nin sinasabi sa estorya na nagbago sinda.—1 Samuel 2:27–3:1.

Ano an nagin epekto kan gabos na karatan na ini sa aking si Samuel? Mantang binabasa niato an mamondong estoryang ini, may maheheling kitang nakakaogma asin marahay na mga bagay manongod sa pagdakula asin pag-oswag ni Samuel. Girumdoma na sa 1 Samuel 2:18, mababasa niato na si Samuel maimbod na “naglilingkod sa atubangan ni Jehova, bilang aki.” Dawa sia aki pa, pangenot na sa buhay ni Samuel an paglilingkod sa Dios. Sa bersikulo 21 kan iyo man sanang kapitulo, may mababasa kitang mas nakakaogma pa ngani: “An aking si Samuel padagos na nagdakula kaiba ni Jehova.” Mantang sia nagdadakula, mas napaparani man sia sa saiyang Ama sa langit. An siring na haraning personal na relasyon ki Jehova iyo an pinakaseguradong proteksion sa ano man na klase nin karatan.

Pasil sana kutana para ki Samuel na magrason na kun nagpadaog sa kasalan an halangkaw na saserdote asin an mga aki kaini, puede man niang gibohon an ano man na gustohon nia. Alagad an karatan nin iba, kaiba na kan mga nasa katongdan na may autoridad, nungkang rason tanganing an saro gumibo nin kasalan. Ngonyan, dakol na Kristianong hoben an nag-aarog sa halimbawa ni Samuel asin padagos na ‘nagdadakula kaiba ni Jehova’—dawa bakong marahay na halimbawa an nagkapira sa palibot ninda.

Paano iyan nakatabang ki Samuel? Mababasa niato: “Sa bilog na panahon na ini an aking si Samuel nagdadakula asin nagigin orog na kawiliwili sa pagheling ni Jehova sagkod nin mga tawo.” (1 Samuel 2:26) Kaya, si Samuel nagustohan na marhay, kisiera kan mga tawong importante sa saiya an opinyon. Si Jehova mismo padaba an aking ini huli sa pagigin maimbod kaini. Asin siertong aram ni Samuel na an Dios mahiro tumang sa gabos na karatan na nangyayari sa Silo, alagad sa isip nia tibaad ihinapot nia kun noarin.

“Magtaram Ka, Dahel Nagdadangog an Lingkod Mo”

Sarong banggi, nasimbag an hapot na iyan. Madali nang mag-aga alagad madiklom pa; nagkikimatkimat pa an dakulang lampara kan tolda. Mantang matoninong an palibot, nakadangog si Samuel nin boses na inaapod sia. An paghona nia si Eli, na gurangon na asin haros buta na. Si Samuel nagbuhat asin “nagdalagan” pasiring sa gurang nang lalaking iyan. Naiimahinar mo daw an aki na nakabitis asin naghihidali sa pagdalagan tanganing aramon kun ano an kaipuhan ni Eli? Nakakapukaw sa boot na maaraman na si Eli iginalang asin pinahelingan nin kabootan ni Samuel. Sa ibong kan gabos na kasalan ni Eli, sia pa man giraray an halangkaw na saserdote ni Jehova.—1 Samuel 3:2-5.

Si Eli pinukaw ni Samuel, na nagsasabi: “Uya ako, huling inapod mo ako.” Alagad sinabi ni Eli na dai sia nag-apod asin pinabalik nia an aki sa higdaan. Bueno, naotro iyan asin naotro giraray! Sa katapustapusi, nasabotan ni Eli kun ano an nangyayari. Si Jehova bihira na kaidtong magtao nin bisyon sa saiyang banwaan o magpadara nin mensahe paagi sa propeta, asin bakong makangangalas kun taano. Alagad aram ni Eli na nakikipag-olay na giraray si Jehova—pero ngonyan sa aking ini! Sinabihan ni Eli si Samuel na magbalik sa higdaan asin tinokdoan sia kun paano masimbag nin tama. Nagsunod si Samuel. Dai naghaloy, nadangog nia an boses na nag-aapod: “Samuel, Samuel!” An aki nagsimbag: “Magtaram ka, dahel nagdadangog an lingkod mo.”—1 Samuel 3:1, 5-10.

Sa katapustapusi, si Jehova igwa nang lingkod sa Silo na nagdadangog. Iyan an nagin buhay ni Samuel.  Arog man daw kaiyan an buhay mo? Dai na niato kaipuhan maghalat nin milagrosong boses sa banggi na magtaram sa sato. Ngonyan, an boses nin Dios garo man sana pirmeng yaon para sa sato. Yaon iyan sa saiyang kompletong Tataramon, an Biblia. Mantang orog kitang nagdadangog sa Dios asin minahiro oyon dian, nag-oorog man an satong pagtubod. Nagin totoo iyan ki Samuel.

Kan bangging idto sa Silo nagpoon an dakulang pagbabago sa buhay ni Samuel, huling kan panahon na idto sia nagkaigwa na nin espesyal na relasyon ki Jehova, bilang propeta asin tagapagtaram mismo nin Dios. Kan primero, natakot an aki na sabihon ki Eli an mensahe ni Jehova, huling iyan an pangultimong kapahayagan na nagsasabing madali nang mangyari an ihinula tumang sa pamilyang iyan. Alagad si Samuel nagkaigwang kosog nin boot—asin mapakumbabang inako ni Eli an paghokom nin Dios. Dai naghaloy, nangyari an gabos na sinabi ni Jehova. An Israel nakiguerra sa mga Filisteo, asin si Ofni saka Finehas nagadan sa saro sanang aldaw. Si Eli mismo nagadan kan maaraman nia na kinua kan mga kaiwal an sagradong Kaban ni Jehova.—1 Samuel 3:10-18; 4:1-18.

Minsan siring, si Samuel orog na namidbid bilang maimbod na propeta. “Si Jehova mismo nasa kaibanan nia,” oyon sa estorya, na nagsabi pang mayo ni saro sa hula ni Samuel an dai pinapangyari ni Jehova.—1 Samuel 3:19.

“Nag-apod si Samuel ki Jehova”

Pero, an boot daw sabihon kaiyan sinunod kan mga Israelita an paggiya ni Samuel asin nagin espirituwal saka maimbod na nasyon? Dai. Pag-abot nin panahon, nagdesisyon sinda na bako sanang propeta an gusto nindang maghokom sa sainda. Gusto nindang magin arog kan ibang nasyon asin pamahalaan nin sarong tawong hade. Sa paggiya ni Jehova, itinao ni Samuel an gusto ninda. Alagad kaipuhan niang sabihon sa Israel kun gurano kagabat kan kasalan ninda. Bako sanang tawo an isinisikwal ninda kundi si Jehova mismo! Kaya ipinaapod nia an bilog na nasyon pasiring sa Gilgal.

Ibanan niato sia sa nakakatension na pangyayaring idto mantang kinakaolay an Israel sa Gilgal.  Duman, ipinagirumdom sa Israel kan gurang nang si Samuel an dapit sa saiyang kaimbodan asin integridad sa halawig na panahon. Dangan, mababasa niato: “Nag-apod si Samuel ki Jehova.” Hinagad nia ki Jehova na magpadara nin bagyong may kikilat asin daguldol.—1 Samuel 12:17, 18.

Bagyong may kikilat asin daguldol? Sa panahon nin tig-init? Dai pa lamang iyan nangyari! Kun nagkaigwa nin dawa kadikit na pagduda o pagtuya hale sa mga tawo, dai iyan naghaloy. An langit biglang naglumlom. Huli sa doros, narogado an mga trigo sa oma. Kuminosog asin nakakabungog an mga daguldol. Dangan uminoran. Ano an nagin reaksion kan banwaan? ‘An banwaan nagkatarakot na gayo ki Jehova asin ki Samuel.’ Sa katapustapusi, nasabotan ninda kun gurano kaseryoso kan pagkakasala ninda.—1 Samuel 12:18, 19.

Bakong si Samuel, kundi an saiyang Dios, si Jehova, an nakataros sa puso kan mga rebeldeng idto. Poon kan si Samuel aki pa sagkod na maggurang, sia may pagtubod sa saiyang Dios. Asin sia tinawan ni Jehova nin balos. Si Jehova dai nagbabago sagkod sa panahon na ini. Sinusuportaran pa man giraray nia an mga nag-aarog sa pagtubod ni Samuel.

[Mga Nota sa Ibaba]

[Ritrato sa pahina 17]

Sa ibong kan takot ni Samuel, maimbod niang sinabi ki Eli an mensahe nin paghokom ni Jehova

[Ritrato sa pahina 18]

Si Samuel namibi na may pagtubod, kaya suminimbag si Jehova paagi sa bagyong may kikilat asin daguldol