Kun an mga Gurang Magin Hoben Giraray
Rumani sa Dios
Kun an mga Gurang Magin Hoben Giraray
SIISAY sa sato an ikinakaogma an mga epekto nin paggurang—kurubot na kublit, maluyang pagheling, pagkawara nin pandangog, asin nagkukubogkubog na mga tabay? Tibaad iniisip-isip mo, ‘Taano ta linalang kita nin Dios na ikakaogma an kakosogan nin pagkahoben, dangan pag-abot nin panahon papagsasakiton sana huli sa mga epekto nin paggurang?’ An maogmang bareta iyo na bako ini an katuyohan nin Dios para sa sato. Imbes, igwa sia nin mamomoton na katuyohan na patalingkason kita sa paggurang! Mangnohon an sinabi sa patriarkang si Job, na nasa Job 33:24, 25.
Isip-isipa an situwasyon ni Job, sarong maimbod na lalaking namotan ni Jehova. Dai aram ni Job na kinukuestion ni Satanas an integridad nia paagi sa pagsabing naglilingkod sia sa Dios huli sana sa makasadiring mga dahelan. Huling si Jehova may kompiansa ki Job asin nakakaaram kan Saiya mismong kapangyarihan na haleon an danyos, tinogotan Nia si Satanas na baloon si Job. Dangan, “pinasakitan [ni Satanas] si Job nin nakakagadan na pigsa poon sa dapan kan saiyang bitis sagkod sa alimpoporo kan saiyang payo.” (Job 2:7) An laman ni Job napano nin mga ulod, asin an saiyang kublit nagkakagan, nag-itom, asin nagbarakbak. (Job 7:5; 30:17, 30) Naiimahinar mo daw an labi-labing pagsakit nia? Pero, si Job nagdanay na maimbod, na nagsasabi: “Sagkod na ako magadan dai ko hahaleon sa sakong sadiri an integridad ko!”—Job 27:5.
Minsan siring, si Job nakagibo nanggad nin magabat na sala. Kan sa paghona nia madali na siang magadan, sia nagin labi-labi kainteresado sa pagbindikar sa saiyang sadiri, na ‘ipinapahayag na matanos an saiyang sadiring kalag imbes na an Dios.’ (Job 32:2) Si Job sinagwe kan tagapagtaram nin Dios na si Eliu. Alagad si Eliu nagpaabot man ki Job nin positibong mensahe hale sa Dios: “Dai [si Job] pagpababaon sa kotkot [sa pangkagabsan na lolobngan]! Nakakua ako nin pantubos! An saiyang laman magin mas malumoy kisa kaidtong pagkahoben; bumalik sia sa mga aldaw kan saiyang kakosogan nin pagkahoben.” (Job 33:24, 25) Siertong napano si Job nin paglaom huli sa mga tataramon na iyan. Dai nia kaipuhan na padagos na magsakit sagkod sa saiyang kagadanan. Kun masolsol si Job, maoogma an Dios na mag-ako nin pantubos para sa saiya asin patalingkason sia sa mga pagsakit nia. *
Mapakumbabang inako ni Job an pagtatanos, asin nagsolsol sia. (Job 42:6) Malinaw na si Jehova nag-ako nin pantubos para ki Job, na pinapangyaring takopan kaiyan an sala nia asin buksan an dalan tanganing ibalik sia nin Dios sa dati asin tawan sia nin balos. “Binendisyonan [ni Jehova] an huring kabtang kan buhay ni Job nin labi pa sa saiyang kapinonan.” (Job 42:12-17) Imahinara na sana an pakaginhawa ni Job kan, apuera sa iba pang mga bendisyon, maomayan an saiyang makarimarimang gayo na helang asin an saiyang laman, magin garo “mas malumoy kisa kaidtong pagkahoben”!
An pantubos na inako nin Dios para ki Job limitado sana an halaga, huling sia nagdanay na bakong sangkap asin kan huri nagadan. Igwa kita nin makukuang mas marahay na pantubos. Mamomoton na itinao ni Jehova an saiyang Aki, si Jesus, bilang pantubos para sa sato. (Mateo 20:28; Juan 3:16) An gabos na nagtutubod sa pantubos na iyan may paglaom na mabuhay sagkod lamang sa paraisong daga. Sa maabot na bagong kinaban na iyan, an maimbod na mga tawo papatalingkason nin Dios sa paggurang. Taano ta dai pag-adalan nin orog pa kun paano ka puedeng mabuhay tanganing maheling an panahon na maheheling na kan mga gurang an saindang ‘laman na nagigin mas malumoy kisa kaidtong pagkahoben’?
Isinusuherir na babasahon sa Biblia para sa Abril:
[Nota sa Ibaba]
^ par. 3 An terminong “pantubos” na ginamit digdi nangangahulogan nin “pantakop.” (Job 33:24; nota sa ibaba) Sa kamugtakan ni Job, an pantubos posibleng sarong atang na hayop, na aakoon nin Dios tanganing takopan, o bayadan, an sala ni Job.—Job 1:5.
