Si Abraham—Tawong May Pagtubod

Si Abraham nakatindog sa luwas mientras na matoninong an banggi. Mantang nakatingag sa maliwanag asin mabitoon na kalangitan, naiisip nanggad nia an panuga nin Dios na an mga lahing magikan sa saiya magigin siring kadakol kan mga bitoon na iyan. (Genesis 15:5) Para sa saiya, an mga bitoon naheheling na pagirumdom kan panuga ni Jehova. Garantiya man iyan. Total, kun may kapangyarihan si Jehova na lalangon an mahiwason na uniberso asin an gabos na yaon dian, dai man daw nia kayang pangyarihon na magkaigwa nin aki si Abraham asin Sara? Arog kaiyan an pagtubod ni Abraham.

ANO AN PAGTUBOD? Siring kan pagkagamit sa Biblia, an “pagtubod” nanonongod sa makosog na paniniwala sa sarong bagay na dai naheheling. An siring na pagtubod nakabasar sa matibay na ebidensia. An tawong may pagtubod sa Dios nakasentro an atension sa kaotoban kan mga panuga ni Jehova, na may kompiansa na garo man sana naotob na iyan.

PAANO SI ABRAHAM NAGPAHELING NIN PAGTUBOD? Ipinaheling nia na nagtutubod sia sa mga panuga nin Dios. Huli sa pagtubod, naghale sia sa banwaan na namundagan nia, na may kompiansa na ootobon ni Jehova an Saiyang panuga na ipaheling sa saiya an sarong laen na lugar. Huli sa pagtubod, nagpabarobalyo sia nin lugar sa Canaan, na nakakasierto na sa kahurihurihi magigin sadiri iyan kan mga lahing magikan sa saiya. Saka huli sa pagtubod, sia nagsunod asin idodolot na kutana si Isaac bilang atang, na may kompiansa na, kun kaipuhan, bubuhayon liwat ni Jehova si Isaac.—Hebreo 11:8, 9, 17-19.

Isinentro nia an saiyang atension sa maabot na panahon imbes na sa nakaagi. Minsan ngani tibaad mas komportable an buhay ni Abraham asin Sara sa Ur kisa sa Canaan, ‘dai ninda pigparagirumdom an lugar na saindang hinalean.’ (Hebreo 11:15, An Marahay na Bareta Biblia) Imbes, isinentro ninda an saindang atension sa kun  paano sinda asin an mga magikan sa sainda bebendisyonan nin Dios sa maabot na panahon.—Hebreo 11:16.

May masarig daw na basehan an pagtubod ni Abraham? Igwa nanggad. Inotob ni Jehova an lambang ipinanuga nia. Pag-abot nin panahon, duminakol an lahi ni Abraham asin nagin an nasyon na inapod na Israel. Kan huri, nag-istar an mga Israelita sa Canaan, an mismong lugar na ipinanuga ni Jehova ki Abraham.—Josue 11:23.

ANO AN MGA LEKSION PARA SA SATO? Makakasarig kita na ootobon ni Jehova an mga panuga nia. Minsan ngani an nagkapira dian garo baga imposible sa pagheling nin tawo, nagtitiwala kita na ‘mahihimo nin Dios an gabos na bagay.’—Mateo 19:26.

An halimbawa ni Abraham nagtotokdo man sa sato na isentro an satong atension, bako sa nagin kamugtakan niato kan nakaagi, kundi sa kun ano an makakamit niato sa maabot na panahon. Iyan an nanodan ni Jason. Sia may helang na luway-luway na nagpaluya sa saiya sagkod na biyo na siang maparalisado. “Totoo na may mga panahon na iniisip ko an nakaagi,” an sabi ni Jason. Sabi pa nia: “Simpleng mga bagay an hinahanaphanap kong marhay, arog baga kan makugos man lamang an agom kong si Amanda.”

Minsan siring, lubos an pagtubod ni Jason na ootobon ni Jehova an saiyang mga panuga, kaiba na an panuga na sa dai na mahahaloy an satong daga magigin paraiso asin na an mga maimbod tatawan nin buhay na daing katapusan na may perpektong salud. * (Salmo 37:10, 11, 29; Isaias 35:5, 6; Kapahayagan 21:3, 4) “Pinapagirumdom ko an sakong sadiri na maabot pa an pinakamarahay na panahon,” an sabi ni Jason, na nagpapaliwanag: “Dai mahahaloy, matatapos na ini gabos—an tension, an kahaditan, an kamondoan, an pakamate nin kasalan—asin mawawara na iyan sagkod lamang.” Marahayon nanggad na halimbawa nin pagtubod arog kan ki Abraham!

[Nota sa Ibaba]