TEMA SA COVER: KUN ANO AN MANUNUDAN TA KI MOISES
Siisay si Moises?
Ano an minasabong sa isip mo pag nadadangog mo an pangaran na Moises? Naiisip mo daw . . .
-
an umboy na itinago kan saiyang ina sa sarong basket sa Salog nin Nilo?
-
an aking lalaki na pinadakula sa luho sa Ehipto kan aking babayi ni Faraon—pero nungkang nakalingaw na siya sarong Israelita?
-
an lalaking namuhay bilang pastor sa Midian sa laog nin 40 taon?
-
an lalaking nakipag-ulay ki Jehova * sa atubangan nin naglalaad na palungpong?
-
an lalaking uminatubang sa hadi nin Ehipto asin pusoan na nakiulay na patalingkason sa pagkauripon an mga Israelita?
-
an lalaki na, sa pagbuot nin Diyos, nag-anunsiyar kan Sampulong Damat sa Ehipto kan kalabanon kan hadi kaiyan an tunay na Diyos?
-
an lalaking nanginot sa minilyon na Israelitang sarabay na naghali sa Ehipto?
-
an lalaking ginamit sa pagbanga kan Dagat na Pula?
-
an lalaking nagtao sa mga Israelita kan Sampulong Tugon hali sa Diyos?
AN GABOS na iyan asin an dakul pa naeksperyensiyahan ni Moises. Bakong makangangalas na an maimbod na lalaking ini iginagalang na marhay kan mga Kristiyano, Judio, asin Muslim!
Malinaw na si Moises sarong propeta na nagpahiling nin “makangirhat na mga bagay.” (Deuteronomio 34:10-12, An Marahay na Bareta Biblia) Tinugutan niya an Diyos na gamiton siya sa pambihirang paagi. Pero, si Moises ordinaryo sanang tawo. Arog kan ibang mga propeta, si Moises sarong tawo na may ‘pakamati siring sato.’ (Santiago 5:17) Napaatubang si Moises sa dakul na kaparehong problema na inaagihan ta, asin napangganahan niya an mga iyan.
Gusto mong maaraman kun paano niya iyan nagibo? Pag-ulayan ta an tulo sa marahay na mga karakteristiko ni Moises asin kun ano an manunudan ta sa halimbawa niya.
^ par. 7 Jehova an pangaran nin Diyos siring kan ihinahayag sa Bibliya.
