TOTOO nanggad an mga tataramon na iyan! An buhay sa kinaban pano nin ‘kasakitan asin kamunduan.’ Tibaad iniisip nindo, ‘Posible pa daw na magkaigwa nin tunay na makahulugan na buhay ngunyan?’

Isipa an halimbawa ni Maria. Kaidto maliksihon siya, pero ngunyan na 84 anyos na siya, haros dai na siya makahali sa harong. Aktibo an isip niya, pero garo baga dai na makasabay an hawak niya. Paano niya masasabing makahulugan an arog kaiyan na buhay?

Kumusta man kamo? Tibaad ihinapot na nindo sa saindong sadiri kun baga makahulugan an saindong buhay. Tibaad an trabaho nindo pauruutro, nakakapagal, asin nakakasuya. Tibaad dai naaapresyar an mga pagmamaigot o ginigibo nindo. Dawa magayon an buhay nindo, tibaad nahahadit kamo sa saindong puturo. Kun beses, tibaad napupungaw o namumundo kamo. Tibaad may dai pagkauruyon asin iriwal sa pamilya nindo o nagadanan kamo nin sarong namumutan. Si André dayupot na marhay sa saiyang ama, na biglang nagkahilang asin nagadan. Ikinamundo nanggad iyan ni André. Pagmati niya dai na nuarin man makukumpleto an buhay niya.

Ano man na kasakitan an tibaad mapaatubang sa sato, may kaipuhan kitang maaraman: Posible daw talaga an sarong makahulugan na buhay? Maaaraman ta an simbag paagi sa sarong tawo na nabuhay sa daga mga 2,000 na taon na an nakaagi—si Jesu-Cristo. Sa ibong kan gabos na ulang na napaatubang sa saiya, nagkaigwa si Jesus nin tunay na makahulugan na buhay. Iyo man kita kun susunudon ta an halimbawa niya.