PADAGOS NA MAGBANTAY!
2023: Taon nin Kapurisawan—Ano an Sinasabi kan Bibliya?
Kan 2023, an mga pangyayari sa bilog na kinaban talagang nagpapatunay na nabubuhay na kita sa inaapod kan Bibliya na “huring mga aldaw.” (2 Timoteo 3:1) Mangnuhon kun paanong an mga pangyayari ngunyan kapareho kan nagin prediksiyon kan Bibliya na mangyayari manungod sa panahon na kinabubuhayan ta.
An Bibliya asin an mga pangyayari sa bilog na kinaban
“Mga giyera asin mga bareta manungod sa mga giyera.”—Mateo 24:6.
“Nagdadakul an madahas na ralaban sa dakul na parte kan kinaban.” a
Hilingon an mga artikulong “Siisay an Maligtas sa mga Sibilyan?” asin “Gastos kan Kinaban sa Puwersa Militar Labi Nang $2 Trilyon.”
“Sunod-sunod na linog sa manlain-lain na lugar.”—Marcos 13:8.
“Sa pagpuon pa sana kan 2023, nagkaigwa na sa bilog na kinaban nin 13 linog na labing magnitude 7 an kusog, saro sa mga pinakahalangkaw na nairekord.” b
Hilingon an artikulong “Mapandestrosong Marhay na mga Linog Tuminama sa Turkey Asin Syria.”
“Makatatakot na mga tanawon.”—Lucas 21:11.
“Bako na sana ining global warming; sa padagos na paglangkaw kan temperatura sa kinaban, puwede ta na ining apudon na global boiling.”—António Guterres, UN secretary-general. c
Hilingon an artikulong “Grabeng Init nin Panahon sa Iba-ibang Lugar sa Kinaban Ngunyan na Summer nin 2023.”
“Kakulangan nin kakanon.”—Mateo 24:7.
“2023: Saro na naman na taon nin grabeng kapurisawan para sa mga nasasakitan na makakua nin maipapakakan sa saindang pamilya.” d
Hilingon an artikulong “Krisis sa Kakanon sa Bilog na Kinaban Huli sa Giyera Asin Climate Change.”
“Delikado asin masakit na mga panahon.”—2 Timoteo 3:1.
“Sa bilog na kinaban, saro sa walong tawo an igwang problema sa mental na salud.” e
Hilingon an artikulong “Nakakaalarmang Paglala nin mga Problema sa Mental na Salud kan mga Tin-edyer.”
Ano an aasahan ta sa 2024?
Mayong nakakaaram kun ano an eksaktong mangyayari sa 2024. Pero ipinaparisa kan mga pangyayari sa kinaban na madali nang salidahan kan Kahadian nin Diyos, o langitnon na gobyerno, an mga gobyerno nin tawo asin tatapuson kaiyan an gabos na dahilan nin pagsakit asin kapurisawan.—Daniel 2:44; Kapahayagan 21:4.
Mantang hinahalat ta na mangyari iyan, makakaasa kita sa Diyos para sa tabang pag napupurisaw kita. An Bibliya nagsasabi:
“Pag natatakot ako, nagtitiwala ako sa saimo.”—Salmo 56:3.
Paano niyato maipapahiling an satong pagtitiwala sa Diyos? Inaagda mi ika na mas makanuod pa manungod sa panuga kan Bibliya na sa maabot na panahon mawawara na an pagsakit. Purbaran an samong libreng interactive na pag-adal sa Bibliya para maaraman mo kun paano ka saka an saimong pamilya makikinabang sa mga panuga kan Bibliya.
a Foreign Affairs, “A World at War: What Is Behind the Global Explosion of Violent Conflict?” ni Emma Beals asin Peter Salisbury, Oktubre 30, 2023.
b Earthquake News, “Year 2023: Number of Major Earthquakes on Course for Record,” Mayo, 2023.
c United Nations, “Secretary-General’s Opening Remarks at Press Conference on Climate,” Hulyo 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” Oktubre 10, 2023.
Puwede Mo Man Magustuhan
IBA PANG MGA TEMA
Makakalaom Ka sa Sarong Magayon na Puturo
Taano ta naiiba an mga panuga nin tawo sa mga panuga na yaon sa Bibliya?
MAHALAGANG MGA TUKDO KAN BIBLIYA
Ano an Kahadian nin Diyos?
Sa bilog na ministeryo ni Jesus, mas ipinakipag-ulay niya an dapit sa Kahadian nin Diyos kisa sa iba pang tema. Dakul na taon nang ipinapamibi kan mga tawo na lugod dumatong na an Kahadian na iyan.
MANUNGOD SAMO
Mag-request na May Magdalaw Saimo
Pag-ulayan an sarong hapot sa Bibliya, o aramon pa an manungod sa mga Saksi ni Jehova.
