Dai pa sana nahahaloy, nagkomento an mga lider kan iba-ibang nasyon, mga siyentista, asin mga eksperto sa teknolohiya manungod sa kayang gibuhon kan artificial intelligence (AI). Aram ninda an pakinabang kaiyan, pero nahahadit man sinda sa posibilidad na gamiton iyan sa salang paagi.

•   “An AI an saro ngunyan sa pinakapambihirang naimbento kan teknolohiya, ta puwede kaiyan mapakarhay an buhay kan mga tawo . . . Kasabay kaiyan, an AI puwedeng magkawsa na mas lalo pang maggrabe an peligro sa kaligtasan asin seguridad, malapas an deretso saka pribadong buhay kan mga tawo, asin mawaran nin tiwala saka kumpiyansa an mga tawo sa demokrasya.”—Kamala Harris, bise presidente kan Estados Unidos, Mayo 4, 2023.

•   “Dawa ngani nagtatao nin magayunon na mga solusyon an artificial intelligence (AI) pag-abot sa pangangataman sa salud, puwede man iyan magdara nin mga peligro sa pisikal na salud asin emosyon kan mga tawo,” an sabi kan sarong internasyonal na grupo nin mga doktor asin mga eksperto sa pangangataman sa salud sa panginginot ni Dr. Frederik Federspiel, sa sarong artikulo sa BMJ Global Health na ilinuwas kan Mayo 9, 2023. a

•   “An AI puwede nang gamiton sa pagpalakop nin salang impormasyon. Dai mahahaloy, puwedeng maagaw na kaiyan an mga trabaho kan tawo. Maabot an panahon, sabi kan mga tawong grabe an pagkahandal sa teknolohiya, puwede kaiyan madanyaran an buhay kan mga tawo.”—The New York Times, Mayo 1, 2023.

 Mahihiling ta na sana sa paglihis nin panahon kun baga gagamiton kan mga tawo an AI para sa ikakarahay o sa ikakaraot. Ano an sinasabi kan Bibliya?

 Ipinapahiling kan Bibliya kun taano ta dai magagarantiya nin tawo na an mga imbensiyon ninda gagamiton sana sa ikakarahay.

1.  1. Dawa pa marahay an intensiyon kan mga tawo, puwedeng dai ninda tulos nahihiling an maraot na epekto kan mga ginigibo ninda.

   •   “Igwa nin dalan na garo baga tama sa paghiling nin sarong tawo, pero kagadanan an puro kaiyan.”—Talinhaga 14:12.

2.  2. Mayong kontrol an saro kun paano gagamiton kan iba an nahaman niya.

   •   “Dapat kong iwalat [an sakong nahaman] sa tawong maabot na kasunod ko. Asin siisay an nakakaaram kun baga siya magigin madunong o mangmang? Pero, siya an mamamahala sa gabos na bagay na pinagmaigutan kong makamtan sa irarom kan aldaw paagi sa grabeng paghihinguwa asin kadunungan.”—Eclesiastes 2:18, 19.

 An daing kasiguraduhan na iyan sa mga paghihinguwa nin tawo nagpapahiling sana na kaipuhan ta nanggad magpagiya sa satong Kaglalang.

 Nanunuga an satong Kaglalang na dai niya nanggad tutugutan an mga tawo o an ano man na imbensiyon ninda na biyong rauton an daga o an katawuhan.

•   ‘An daga magdadanay sagkod lamang.’—Eclesiastes 1:4.

•   “Magigin pagsadiri kan mga matanos an daga, asin maistar sinda diyan nin daing sagkod.”—Salmo 37:29.

 Paagi sa Bibliya, ginigiyahan kita kan satong Kaglalang na magkaigwa nin sigurado asin matuninong na puturo. Para urog pang makanuod sa kun ano an sinasabi kan Bibliya, basahon an mga artikulong “Igwa Daw nin Mapagkakatiwalaan na Giya sa Pagkaigwa nin Magayon na Puturo?” asin “Makakaasa Ka sa Isang Magandang Kinabukasan.”