“Saludo ako sa mga miyembro kan organisasyon nindo huli sa maigot nindong paglilingkod para sa Kahadian nin Diyos. Lubos na inaapresyar asin pinapahalagahan an saindong mga paghihinguwang tabangan an kapwa nindo mga Saksi ni Jehova asin an komunidad.”

Iyan an sabi sa surat ni Kasim Reed, alkalde kan siyudad nin Atlanta, Georgia, U.S.A. Sinabi sa surat an pag-ako ninda sa mga Saksi ni Jehova para sa tulong darakulang kumbensiyon na gigibuhon sa lugar na iyan.

Saro pa, nagpaluwas man nin proklamasyon an City Council kan Atlanta tanganing akuon an mga delegado kan kumbensiyon. An sabi diyan: “Sa bilog na kinaban, haros walong milyon an Saksi ni Jehova, na . . . iba-iba an rasa asin lengguwahe, pero . . . nagkakasararo kamo sa parehong katuyuhan . . . Gusto [nindong] umawon si Jehova, an Diyos kan Bibliya asin an Kaglalang kan gabos na bagay.”

Tulong kumbensiyon an ginibo diyan kan Hulyo asin Agosto 2014, an duwa ginibo sa Ingles asin an saro sa Kastila. Hali sa 28 nasyon an mga delegado, asin an mga programa sa Ingles sabay na ininterpretar sa lengguwaheng Russian asin Japanese para sa mga delegado na nagtataram kaiyan. An mga nag-atender sa tulong kumbensiyon may total na bilang na 95,689.

Kan 2014, 24 darakulang internasyonal na kumbensiyon an ginibo sa siyam na nasyon, an 16 kaiyan ginibo sa manlain-lain na lugar sa United States.