Iginagalang kan mga Saksi ni Jehova an mga gobyerno asin an mga simbolo na nagrerepresentar sa mga iyan. Inaako mi an katotoohan na an iba tibaad magdesisyon na manumpa para sa nasyon, magsaludo sa bandera, o magkanta nin national anthem.

 Pero, an mga Saksi ni Jehova dai nagpapartisipar sa arog kaiyan na mga seremonya dahil nagtutubod kami na kontra an mga iyan sa mga katukduan kan Bibliya. Pinapahalagahan mi pag iginagalang kan iba an samong mga tinutubod arog kan paggalang mi sa mga tinutubod ninda.

Sa artikulong ini

•  Anong mga katukduan sa Bibliya an kalabot?

•  Paano kun ipinagbubuot kan ley na magpartisipar diyan?

•  An mga Saksi ni Jehova daw may kinakampihan na isyu sa sosyedad asin pulitika?

 An minasunod na duwang mahalagang katukduan sa Bibliya may epekto sa samong desisyon:

•   An Diyos sana an maninigo sa satong pagsamba. Sinabi kan Bibliya: “Si Jehova na saimong Diyos an dapat mong sambahon, asin sa saiya mo sana dapat itao an sagradong paglilingkod.” (Lucas 4:8) An mga panunumpa para sa nasyon saka mga national anthem sa parati igwa nin mga tataramon na nanunuga na mas kakamutan kan saro an saiyang nasyon kisa sa ano pa man na ibang bagay. Kaya para sa mga Saksi ni Jehova sala na magpartisipar sa arog kaiyan na mga seremonya.

   Minamansay man kan mga Saksi ni Jehova na an pagsaludo sa bandera sarong akto nin pagsamba, o idolatriya, na ipinagbabawal kan Bibliya. (1 Corinto 10:14) Sinabi kan nagkapirang sekular na reperensiya na an mga bandera nin nasyon, sa katunayan, mga relihiyosong simbolo. “An panginot na simbolo nin pagtubod saka an pinakasentro nin pagsamba sa nasyonalismo iyo an bandera,” an isinurat kan historyador na si Carlton J. H. Hayes. a Manungod sa inot na mga Kristiyano, an awtor na si Daniel P. Mannix nagsabi: “Nagsayuma an mga Kristiyano na . . . mag-atang sa mga espiritung paratabang sa [Romanong] emperador—na puwedeng maiagid ngunyan sa pagsayuma na magsaludo sa bandera.” b

  Dawa ngani an mga Saksi ni Jehova dai nagsasaludo sa bandera, dai mi man iyan pigraraot, pigsusulo, asin dai mi man iyan pigbabasang-basang o an ano pa man na iba pang simbolo na nagrerepresentar sa nasyon.

•   Pantay-pantay an gabos na tawo sa paghiling kan Diyos. (Gibo 10:34, 35) Sinasabi kan Bibliya na “ginibo [kan Diyos] hali sa sarong tawo an gabos na nasyon kan katawuhan.” (Gibo 17:26) Huli kaini, an mga Saksi ni Jehova nagtutubod na sala na ipaurog an arin man na partikular na etnikong grupo o nasyonalidad. Iginagalang mi an gabos na tawo, ano man na lugar an saindang pinaghalian o pig-iistaran.—1 Pedro 2:17.

 Bakong kontra sa gobyerno an mga Saksi ni Jehova. Nagtutubod kami na an mga gobyerno parte kan “areglo nin Diyos” na itinugot niyang mag-eksister. (Roma 13:1-7) Nagtutubod man kami na an mga Kristiyano dapat na magsunod sa sekular na mga awtoridad.—Lucas 20:25.

 Pero, paano kun magkakontrahan an ipinagbubuot kan gobyerno sa ipinagbubuot nin Diyos? Sa nagkapirang sitwasyon, puwedeng magsumitir nin legal na kahagadan sa gobyerno na baguhon an partikular na ley. c Pag dai posible na mangyari an pagbago, magalang na pinipili kan mga Saksi ni Jehova na ‘sunudon an Diyos bilang tagapamahala imbes na an mga tawo.’—Gibo 5:29.

 Mayo. An mga Saksi ni Jehova mayong kinakampihan na isyu sa sosyedad asin pulitika. Nagsasayuma kaming manumpa para sa nasyon, magsaludo sa bandera, o magkanta kan national anthem, bako man huling nagkokontra kami sa gobyerno. Kundi, sinusunod mi an samong mga paniniwala na basado sa Bibliya manungod sa mga seremonyang iyan.