An adulto nang mga aki an may mahalagang responsabilidad na siguraduhon na naaataman an saindang may edad nang mga magurang. Sinasabi kan Bibliya na dapat na “isabuhay [kan adulto nang mga aki] an saindang pagtubod paagi sa pag-ataman sa sadiri nindang pamilya bilang pagtanaw nin utang na buot sa saindang mga magurang . . . , huling nakakapaugma ini sa Diyos.” (1 Timoteo 5:4, New International Version) Pag sinisigurado kan adultong mga aki na naaataman an saindang may edad nang mga magurang, sinusunod man ninda an pagbuot kan Bibliya na tawan nin onra an saindang mga magurang.—Efeso 6:2, 3.

 Daing sinasabi an Bibliya na espesipikong mga instruksiyon sa pag-ataman sa naggugurang nang mga magurang. Pero, igwa diyan nin mga halimbawa nin maimbod na mga lalaki asin babayi na naggibo kaiyan. Nagtatao man iyan nin praktikal na mga sadol na makakatabang sa mga nag-aataman.

•  Kan mga panahon kan Bibliya, paano inataman kan nagkapirang miyembro nin pamilya an saindang may edad nang mga magurang?

•  Anong praktikal na mga sadol sa Bibliya an makakatabang sa mga nag-aataman?

•  Sinasabi daw kan Bibliya na dapat sa harong atamanon an may edad na mga magurang?

 Ginibo ninda iyan sa manlain-lain na paagi, depende sa mga kamugtakan.

•   Si Jose nakaistar harayo sa saiyang naggugurang nang amang si Jacob. Kan nasa kamugtakan na siya, iinareglo niyang mag-istar si Jacob harani saiya. Inasikaso ni Jose an istaran, pagkakan, asin seguridad kan saiyang ama.—Genesis 45:9-11; 47:11, 12.

•   Si Ruth naglipat sa nasyon kan saiyang panugangan na babayi asin maigot na nagtrabaho para atamanon ini.—Rut 1:16; 2:2, 17, 18, 23.

•   Si Jesus, kan madali na siyang magadan, nagpili nin maataman sa saiyang inang si Maria, na minalataw na balo na kaidto.—Juan 19:26, 27. a

 Kun minsan, nakakapagal sa pisikal asin emosyon an pag-ataman sa may edad nang mga magurang. Igwa sa Bibliya nin mga prinsipyo na makakatabang sa mga nag-aataman pag nakakamati sinda kaiyan.

•   Tawan nin onra an saimong mga magurang.

   An sinasabi kan Bibliya: ‘Igalang mo an saimong ama asin an saimong ina.’—Exodo 20:12.

   Paano isasabuhay an prinsipyo? Matatawan mo nin onra an mga magurang mo kun tutugutan mo siyang gibuhon an mga bagay na kaya pa niya. Sagkod na mapupuwede, papilion sinda kan gusto nindang paagi nin pag-ataman sainda. Kasabay kaiyan, ipahiling na iginagalang mo sinda paagi sa paggibo kan ano man na maitatabang mo sainda.

•   Magin mapagsabot asin mapagpatawad.

   An sabi kan Bibliya: ‘An marahay na pag-isip nin tawo iyo an minapugol kan saiyang kaanggutan; kamurawayan niya an magpasensiya sa mga karatan na ginibo saiya.’—Talinhaga 19:11, An Marahay na Bareta Biblia (Bikol Popular Version).

   Paano masusunod an prinsipyo? Kun an may edad nang magurang magtaram nin nakakakulog o garo baga bakong mapagpasalamat sa pag-ataman mo, haputon an sadiri, ‘Ano an mamatian ko kun ako an nasa kamugtakan niya?’ Kun hihinguwahon mong magin mapagsabot asin mapagpatawad, puwede mong malikayan na mapagrabe an sitwasyon.

•   Maghapot sa iba.

   An sabi kan Bibliya: “Masasayang an mga plano kun mayo nin maigot na pag-aadal, alagad kun kadakul kan parahatol marahay an magigin bunga kaiyan.”—Talinhaga 15:22, An Marahay na Bareta Biblia (Bikol Popular Version).

   Paano masusunod an prinsipyo? Kun may hilang an mga magurang mo, mag-research kun paano sinda aatamanon. Aramon an mga serbisyong itinatao kan saindong komunidad na makakatabang sa pag-ataman sainda. Maghapot sa mga may eksperyensiya na sa pag-ataman sa may edad nang mga magurang. Kun may mga tugang ka, puwede nindong pag-ulayan bilang pamilya an mga pangangaipo kan saindong mga magurang, kun paano sinda aatamanon, asin an pagbanga-banga kan mga responsabilidad.

•   Aramon an mga limitasyon mo.

   An sabi kan Bibliya: “An kadunungan yaon sa mapakumbaba.”—Talinhaga 11:2, An Marahay na Bareta Biblia (Bikol Popular Version).

   Paano masusunod an prinsipyo? Aramon an saimong mga limitasyon. Halimbawa, gabos kita limitado sana an panahon saka kusog. Makakaapektar an mga limitasyon na iyan sa kun gurano kadakul kan magigibo mo para sa mga magurang mo. Kun garo baga dai mo na kaya an pag-ataman sa saimong may edad nang mga magurang, puwede kang maghagad nin tabang sa iba mong mga kapamilya o sa mga caregiver, nars, o sa mga nasa kaagid na propesyon.

•   Dai pagpabayaan an sadiri mo.

   An sinasabi kan Bibliya: “Mayo nin tawong naungis kasuarin man sa sadiri niyang hawak, kundi pinapakakan niya ini asin inaataman.”—Efeso 5:29.

   Paano masusunod an prinsipyo? Dawa responsabilidad mong atamanon an mga magurang mo, kaipuhan mo man na asikasuhon an sadiri mong mga pangangaipo saka an sa pamilya mo kun may agom ka. Kaipuhan mong magkakan nin tama asin magkaigwa nin supisyenteng pahingalo asin turog. (Parahulit 4:6) Saka kaipuhan mo man na magrelaks pag posible. Kun gigibuhon mo iyan, magigin mas nasa kondisyon an saimong emosyon, isip, saka hawak sa pag-ataman sa saimong mga magurang.

 Daing sinasabing espesipikong instruksiyon sa Bibliya kun baga dapat sa harong atamanon kan adultong mga aki an saindang mga magurang. May mga pamilya na piniling sa harong atamanon an saindang may edad nang mga magurang sagkod sa pinakahaloy na panahon na posible. Pero pag-abot nin panahon, tibaad mamatian nindang mas marhay kun sa nursing home sinda atamanon. Puwedeng pag-urulayan kan pamilya kun ano an pinakamarahay para sa gabos.—Galacia 6:4, 5.