Bushe Ubufumu bwa Lesa Cinshi?

TINIKENI

Icasuko ca mu Baibolo

Ubufumu bwa kwa Lesa, buteko bwa cine ubo Yehova Lesa abikako. Mu Baibolo “Ubufumu bwa kwa Lesa” bwitwa no kuti “ubufumu bwa mu muulu,” pantu butekela ku muulu. (Marko 1:14, 15; Mateo 4:17, King James Version) Bwalipalana mu fingi na mabuteko ya bantunse, lelo bwena busuma ukucila aya amabuteko muli fyonse.

Bakateka. Lesa asala Yesu Kristu ukuba Imfumu ya ubu Ubufumu kabili alimupeela amaka ayengi ukucila ayo kateka umuntunse engakwata. (Mateo 28:18) Yesu abomfya aya maka ku kucita ifintu ifisuma fyeka fyaka. Ifyo alecita filanga ukuti ni Ntungulushi ya luse iyo twingacetekela. (Mateo 4:23; Marko 1:40, 41; 6:31-34; Luka 7:11-17) Lesa alimutungulula ukusala abantu ukufuma pano calo “abakalateka isonde” pamo nankwe mu muulu.—Ukusokolola 5:9, 10.
Inshita bukabapo. Ubufumu bwa kwa Lesa tabwaba nga mabufumu ya bantunse ayesa no kupita, bwena ‘tabwakonaulwe nakalya.’—Daniele 2:44.
Abo bukalateka. Onse uucita ifyo Lesa afwaya kuti abamo mu Bufumu bwa kwa Lesa, te mulandu na kuntu afyalilwa nelyo ulupwa afumako.—Imilimo 10:34, 35.
Amafunde. Amafunde ya mu Bufumu bwa kwa Lesa tayalesha fye ukucita ifyabipa. Yalatweba ne fisuma ifyo tufwile ukulacita. Cimo ico Baibolo itweba ni ci: “‘Uletemwa Yehova Lesa obe no mutima obe onse, no mweo obe onse, no kutontonkanya kobe konse.’ Ili e funde ilikalamba kabili e lya ntanshi. Ilya cibili, ilyapalana ne li, litila, ‘Uletemwa umunobe nge fyo waitemwa we mwine.’” (Mateo 22:37-39) Ukutemwa Lesa na bantu banabo e kulenga abo Ubufumu bukaleteka ukulacitila bambi ifisuma.
Amasambililo. Ubufumu bwa kwa Lesa bufwaya abantu balekonka amafunde. E ico bulabasambilisha ne fingabafwa ukulakonka ayo amafunde.—Esaya 48:17, 18.
Ico bwabelako. Ubufumu bwa kwa Lesa tabulenga bakateka ba buko ukuba abakankaala pa mulandu wa kuliila abo bateka ifyuma. Lelo bukacita ukufwaya kwa kwa Lesa ukubikako fye no kufikilisha ubulayo bwa kuti, bonse abatemwa Lesa bakekala muli paradaise pano calo.—Esaya 35:1, 5, 6; Mateo 6:10; Ukusokolola 21:1-4.

Amalyashi Ayapalileko

Ubufumu bwa kwa Lesa Amasuko ku Mepusho ya mu Baibolo

Nalimo Kuti Mwatemwako ne fi

AMASAMBILISHO YA MU BAIBO AYACINDAMA

Bushe Ubufumu bwa kwa Lesa ni Cinshi?

Ilyo Yesu ali pano isonde alesambilisha sana pa Bufumu bwa kwa Lesa ukucila pa lyashi ili lyonse. Pa myaka iingi abantu abengi balapepa ukuti ubu Bufumu bwise.

ULUPUNGU LWA KWA KALINDA

Bushe Imfumu ya Bufumu bwa kwa Lesa Nani?

Abalelemba Baibolo balilandile pa fintu ifyali no kutwafwa ukwishiba umuntu uwali no kuba Imfumu ya Bufumu bwa kwa Lesa. Pa bantu bonse ababapo, umuntu umo fye e o cailanga fye apa buta tutu ukuti e kateka..