Abapanga amaroboti balipanga mashini iyo badokota bengabomfya pa kulepula umuntu. Iyi mashini iyo bapanga kuti yabomba nangu balelepula mu cilundwa icikwete fye akacende akanono. Badokota kuti babomfya aya ma mashini ilyo balebombela umuntu, kabili tabalepula icilonda icikalamba ilyo balemubombela nga babomfya aya ma mashini. Pa kupanga aya maroboti, bakopele ifyo ukuboko kwa kwa octopus kwapangwa.

 Tontonkanyeni pali ici: Octopus kuti yatinta, yaikata no kufina icintu ukubomfya amaboko 8 ayo yakwata. Aya maboko yalatintimuka kabili kuti yapetama ukwabula ubwafya nangu incende ilimo icepe shani. Na kabili octopus kuti yakosha amaboko yamo nga ilefwaya.

 Abafwailisha pa fintu basanga ukuti amaroboti ayanakilila kabili ayengapetama mu ncende inono nga filya amaboko ya kwa octopus yaba kuti yabomba bwino sana pa kubombela umulwele ukwabula ukumulepula icilonda icikulu. Iyi mashini kuti baibomfya na pa kubombela umulwele uwalwala ubulwele bwayafya ukulepula.

 Moneni ifyo amaboko ya kwa octopus yabomba

 Balipanga kale mashini iyakwata amaboko nga octopus kabili balaibomfya pa kulepula abalwele. Ulubali lumo ulwa kuboko lwalepa amamilimita 135 kabili kuti yabombela pa filundwa fya mu kati ka mubili ifyanaka, kuti yafiimya no kufikata ukwabula ukufyonaula, uku ninshi amaboko yambi yalelepula no kubombela umulwele. Dokota Tommaso Ranzani, uwali pa bapangile iyi mashini atile, “tulemona ukuti iyi mashini ikalenga tukapangilepo na yambi ama mashini ayakalabomba bwino ukucila na pa fyo iyi tupangile ilebomba.”

 Muletipo shani? Bushe ukuboko kwa kwa octopus kwasangwike fye nelyo kwali uwakupangile?