“Amalwele ya matontonkanyo nayaseeka sana ku baice, kabili icilengele sana aya malwele ukufula mulandu wa kuti abaice balabomfya sana intaneti.”—Efyalandile Ba Dr. Vivek Murthy ababomba incito ya kulepula abantu mu U.S, New York Times, June 17, 2024.

 Bushe abafyashi kuti bacingilila shani abana babo ku fyabipa ificitika pa intaneti? Baibo yalilandako pa fyo bengacita.

 Tontonkanyeni pali aya amashinte ya mu Baibo.

 “Uwacenjela alalolekesha apo alenyanta.”—Amapinda 14:15.

 Apo pa intaneti palaba sana ifyabipa ificitika, tamufwile ukutontonkanya ukuti mufwile fye ukusuminisha umwana wenu ukulaibomfya. Nomba ilyo mushilasuminisha umwana wenu ukutendeka ukubomfya intaneti, mufwile ukushininkisha ukuti nakula ica kuti akulakonka amafunde ayo mwamupeela pa fyo alingile ukulaibomfya pamo nga inshita afwile ukupoosapo, nga ca kuti akatwalilila ukukwata ifibusa ifisuma e lyo kabili nga takulabelenga nelyo ukutamba ifyabipa.

•   Nga mulefwaya ukwishibilapo na fimbi, belengeni icipande citila “Should My Child Use Social Media?” e lyo ne citila “Teaching Your Teenager Social Media Safety.”

 “Mulebomfya bwino inshita yonse iyo mwashukila.”—Abena Efese 5:16.

 Nga ca kuti mwasuminisha umwana wenu ukulabomfya intaneti, mufwile no kumupeela amafunde pa fyo alingile ukulaibomfya e lyo no kumulondolwela ifyo ayo mafunde yengamucingilila. Mufwile ukuba abacenjela pa kuti mumone nga ca kuti umwana wenu natendeka ukwaluka mu fyo acita ifintu fimo. Ici kuti camwafwa ukwishiba nga mulingile ukwalulako fimo pa fyo alebomfya intaneti.

•   Mulebomfya vidio iyaba pa mavidio ya tukadoli twa kulenga iitila Mulecenjela Ilyo Mulelanshanya na Banenu pa Intaneti pa kwafwa umwana wenu ukwishiba umulandu cacindamina ukwishiba ifya kubomfya intaneti.

 Baibo ilanda ukuti tuleikala mu “nshita ishayafya nga nshi.” (2 Timote 3:1-5) Pa nshita imo ine, ilatweba ne fyo tufwile ukucita pa kuti tuleshipikisha. Kuti mwasanga ifipande ukucila pali 20 ifilanda pa fyaba mu Baibo ifingaafwa abafyashi e lyo na bana babo muli ici cipande ifilanda pa malwele ya matontonkanyo mu misepela.