Uno mwaka kwali icintu icisuma sana ico Inte sha kwa Yehova bale-enekela, e kutila ukutamba vidio yakubalilapo iitila Imbila Nsuma ya kwa Yesu. Abantu abengi nga nshi balitamba iyi vidio. Iyi e vidio yakubalilapo pa ma vidio 18 ayakafuma! Milimo nshi bamunyinefwe na bankashi babomba pa kuti bakumanishe ukukopa iyi vidio, kabili finshi naimwe mulecitapo pa kutungilila uyu mulimo?

 Pa Bethel ya ku Australasia apo balekopela imbali ishingi isha vidio itila Imbila Nsuma ya kwa Yesu, abantu nalimo 50 ukufika kuli 80 e babapo ilyo balekopa ulubali lumo ulwa vidio. a Aba bonse balabapekanishisha ifya kulya fya kasuba, ifya cungulo e lyo ne fya kulya ilyo baletuushako. Balapekanishisha limo ifya kulya ifikabomba ilyo kucili inshita. Ba Esther ababomba mu Dipartimenti Iipekanya Ifya Kulya balandile ukuti: “Tushita ifya kulya ku ma kampani ayashitisha ifya kulya ayapusanapusana pa kuti tushite ifya kulya ifisuma kabili pa mutengo uusuma. Kabili tulaalula imisango ya fya kulya tuleshita pa kuti filaonaika.” Indalama tubomfya ku fya kulya fya muntu umo cila bushiku shiba amadola 4 aya ku America.

 Ababomba umulimo wa kukopa vidio na bo balekopa tabakabila fye ifya kulya epela, lelo balakabila no kuba abacingililwa. Kubacingilila kuli finshi? Inshita shimo ku Australia imiceele ilaba fye bwino, lelo inshita shimo akasuba kalabalika sana ica kuti kalafumya imyengelele iingaleta ubusanso ku bantu. Kanshi pa kucingilila abantu ku myengelele ya kasuba, bamunyinefwe na bankashi balabombesha kabili balashininkisha ukuti babika amatenti, ukupanga incende ishatalala umo abantu bengatuushisha, kabili balashininkisha ukuti nabakwata ifyakusuba pa kuti inkanda tailepya ku kasuba, ama ambrela e lyo na menshi ayengi. Ba Kevin ababombela ku Audio/Video Services balandile ukuti: “Bamunyinefwe na bankashi abengi ababombako uyu mulimo ni balya ababomba umulimo wa pa Bethel abafuma ku ng’anda. Ilyo balebomba iyi milimo balaba abaicefya kabili balasekelela. Te kuti tukumanishe ukubomba uyu mulimo ukwabula aba bamunyinefwe na bankashi.”

 Ifintu fimo te kuti fimoneke ifya cine nga bafikopela pa Bethel nelyo mu studio. Kanshi ifya musango uyu baya mu kufikopela ku fifulo fimbi. Nga balefwaya ukulanga ifyalecitika mu nshita balelemba Baibo ilyo kushali amalaiti, imisebo ya manenekela e lyo na mayanda ayabako muno nshiku, ababomba umulimo wa kukopa e lyo na bo balekopa ilingi line balaya ku ncende ishabela ukutali sana. Ifya kufwala e lyo ne fintu fimbi ifyalekanalekana ifyo babomfya nga balekopa balingile ukufilonga bwino, ukufisenda no kuya fisunga bwino pa ncende apo balekopela vidio. Ilyo bashilatendeka ukukopa, abaleangalila uyu umulimo balashininkisha ukuti nabakwata ama generator, amenshi ya kunwa ayasuma kabili nabakwata ne fimbusu fya kubomfya. Abalekopa vidio na bo balekopa bekala mu mayanda ya ba bwananyina, mu tumayanda twa kukuusha, mu ma hotela e lyo na mu tuyanda uto baya mu kupanga fye.

 Ukukopela mu ncende nelyo mu fifulo fya musango uyu kulasenda indalama ishingi, inshita iitali, kabili abalebomba balanaka sana. E ico mu 2023, Ibumba Litungulula lyalisuminishe ukuti bashite ico beta ukuti video wall icasendele indalama ukufika ku madola ya ku America amamilioni 2.5, ica kubafwa pa kukopa amavidio. Ici icibombelo cilalenga ifikope fyalamoneka bwino sana kabili cilafumya sana ulubuuto, ne ci cilalenga ifili pa skrini fyalamoneka kwati bafikopele panse. Ici calilenga ukuti belabomfya indalama ishingi nga filya caleba nga baleya mu kukopela ku fifulo fimbi. Ba Darren ababa mu Komiti ya Musambo ku Australasia balandile ukuti: “Iyi nshila ya kukopelamo yalilenga abo balekopa belanaka sana kabili abalekopa kuti babwekeshapo ukukopa imiku iingi mpaka bakopa ukulingana ne fyo balefwaya. Ku ca kumwenako, nga ca kuti tulefwaya ukukopa akasuba lilya kalewa, kuti twakwata fye ama mineti ayanono ayakukakopa ilyo kashilaingila. Lelo nga tulebomfya video wall, kuti twapanga akasuba no kukakopa imiku iingi mpaka twakopa ukulingana ne fyo tulefwaya.”

 Pa kupanga vidio imo iya Imbila Nsuma ya kwa Yesu, kulefwaikwa abakukopa abengi e lyo na bakubomfya muli vidio abengi nga nshi. Bushe abalekopa na bo balekopa, bomfwa shani pa fyo bamunyinefwe na bankashi babombesha pa kuti ba basakamane?

 Ba Amber abaendele amakilomita ukucila pali 700 ukufuma ku Melbourne uko bekala pa kuti babombeko uyu mulimo, balembele ukuti: “Ilyo nafikile fye pa cibansa ca ndeke, bamunyinefwe ababombela pa Bethel balinsakamene bwino kabili abengi balenjitako na mu kulya ifya kulya. Ilyo twatendeke ukukopa bonse balecita ifyalengele mbe uwa-angukilwa kabili ndeumfwa ukuti balintemenwe. Yehova alimpaalile sana muli ubu bulendo. Nshaumfwilepo ukuti ni njipusula ifili fyonse!”

 Ba Derek ababomba ne bumba ilyangalila umulimo wa kukopa, balandile ukuti: “Ama dipartimenti ayengi yalitutungilila sana ukufuma fye pa kutendeka kwa uyu mulimo. Ndatasha sana ukubomba na bamunyinefwe na bankashi abaipelesha ukubomfya inshita yabo, ifyo bakwata e lyo na maka pa kuti babombeko uyu mulimo. Balakoselesha, balaipeelesha kabili baliba ne cikuuku. Ukwabula no kutwishika Yehova alibapaala ca pamo naifwe. Nalishininkisha ukuti Yehova tabika fye amano ku fifuma mu mulimo tulebomba, lelo alabika amano na ku fyo tulebomba uyo mulimo.”

 Tulemutasha pa fyo muletungilila umulimo wa kukopa aya amavidio ukubomfya indalama isho musangula, ukubikako fye ne sho musangula ukubomfya donate.ps8318.com.