Mika 1:1-16
1 Icebo ca kwa Yehova icaishile kuli Mika+ uwa ku Moreshete, mu nshiku sha kwa Yotamu,+ Ahasi,+ na Hisekia,+ ishamfumu sha kwa Yuda,+ ico amwene mu cimonwa ica pali Samaria+ na Yerusalemu ni ci:+
2 “Umfweni, mwe bantu bonse; kutikeni, mwe sonde ne fyabamo,+ kabili lekeni Mulopwe Shikulu Yehova abe kambone+ uwa kumushinina, Yehova mwi tempele lyakwe ilya mushilo.+
3 Pantu, moneni Yehova alefuma mu cifulo cakwe,+ akatentemuka no kunyantaula ififulo fya kupepelapo ifya pano isonde.+
4 Ne mpili shikasunguluka mwi samba lyakwe,+ na mwi lungu mukapaatukana, kwati lipula ku mulilo,+ kwati menshi ayalepongololwa pa matelo.
5 “Ni pa mulandu wa kupondoka ukwa kwa Yakobo e co fyonse ifi fyabela ifi, na pa mulandu wa membu isha ba mu ng’anda ya kwa Israele.+ Nga ukupondoka kwa kwa Yakobo kwafuma kwi? Bushe te kuli Samaria?+ Nga ififulo fya kupepelapo ifya kwa Yuda fyafuma kwi?+ Bushe te kuli Yerusalemu?
6 Kabili nkalenga Samaria ukuba ifitantaala fya mu mpanga,+ apa kulimba imyangashi; kabili nkapongolwela mu mupokapoka wakwe amabwe yakwe, nkasha ne mifula yakwe pa mbilibili.+
7 Ne fimpashanya fyakwe fyonse ifyabaswa fikatobaulwa tupimfya tupimfya,+ ne fya bupe ifyo apeelwa ifya muli bucilende nkafyoca mu mulilo,+ no tulubi twakwe tonse nkatonaula. Pantu ifyo apeelwe afikwatile muli bucilende, kabili bakafisenda no kuyafipeela kuli bacilende bambi.”+
8 Ni pali ici nkalilila umusowa no kuloosha;+ nkenda ukwabula ukufwala indyato ne fya kufwala.+ Kabili nkalila nga bamumbwe, no kuloosha nga bamwakatala abakota.
9 Pantu impumo yakwe tayakondapwe;+ pantu yaisa ukufika na kuli Yuda,+ icikuko cafika na ku mpongolo sha bantu bandi, na ku Yerusalemu.+
10 “Mwishimika mu Gati; no kulila mwilila.+
“Mu ng’anda ya kwa Afra ifumfunyeni mu lukungu.+
11 Pita ubwamba no kuseebana,+ we mwanakashi uwaikala mu Shafiri. Umwanakashi uwaikala mu Sanaani tafumine iyo. Ukulila umusowa ukwa kwa Beti-esele kukamupokolola apa kwiminina.
12 Pantu umwanakashi uwaikala mu Marote alolela ubusuma,+ lelo ububi e bwafuma kuli Yehova, bwaisa ku mpongolo ya Yerusalemu.+
13 Kulika iceleta kuli bakabalwe, we mwanakashi uwaikala mu Lakishi.+ Ni we wali ukutendeka kwa lubembu ku mwana mwanakashi Sione,+ pantu muli iwe mwasangwa ukupondoka kwa kwa Israele.+
14 E ico ukapeela Moreshete-Gati ifya bupe fya kumufishapo.+ Amayanda ya kwa Aksibu+ yali nge ca bucenjeshi ku shamfumu sha kwa Israele.
15 Nkakuletela uwa kukupokolola ifipe,+ we mwanakashi uwaikala mu Maresha.+ Ubukata bwa kwa Israele bukesa ukufika fye na ku Adulamu.+
16 Sebeni ipala, beyeni no mushishi pa mulandu wa bana benu abaume abo musekelamo.+ Kusheni amapala yenu yabe nga aya makubi, pantu nabasendwa bunkole.”+
