Baibo ya Mushilo e nshila iyo Lesa abomfya pa kulanda na ifwe. Pa kuti twishibe Umwine wa Baibo, tufwile ukulaibelenga. (Yohane 17:3; 2 Timote 3:16) Muli Baibo, Yehova Lesa alilanda ifyo afwaya ukucitila abantu ne fyo afwaya ukuti isonde likabe.—Ukutendeka 3:15; Ukusokolola 21:3, 4.

Takwaba icitabo cimbi icafwa sana abantu icacila pali Baibo. Baibo ilalenga twaba ne mibele iyo Yehova akwata pamo nga ukutemwa, uluse ne cikuuku. Ilalenga abantu baba ne subilo kabili balashipikisha amafya nangu bacule shani. Kabili ilalanda pa fyo abantu ba muli cino calo bacita ifyapusana ne fyo Lesa afwaya.—Amalumbo 119:105; AbaHebere 4:12; 1 Yohane 2:15-17.

Pa kubalilapo Baibo bailembele mu ciHebere, mu ciAramaiki e lyo na mu ciGriki. Baibo bali-ipilibula yonse nelyo iciputulwa mu ndimi nalimo 3,000. E buuku ilyo bapilibula no kusabankanya sana ukucila amabuuku yonse. Ifi fine e fyo tufwile ukwenekela Icebo ca kwa Lesa ukuba. Baibo yasobele ukuti: “Iyi mbila nsuma ya Bufumu [e kutila amashiwi ayacindama ayo Baibo ilandapo sana] ikabilwa ku bantu bonse aba pe sonde pa kuti ikabe inte ku nko shonse, e lyo impela ikesa.”—Mateo 24:14.

Apo twalishiba ifyo amashiwi yaba mu Baibo yacindama, natuipitulukamo, lelo tatwalwile ubupilibulo bwa mashiwi yabamo. Twalishiba ukuti tufwile ukulemba amashiwi filya fine fye yafwile ukuba, ukwabula ukwalula ubupilibulo. Baibo—Amalembo ya Calo Cipya, yafumine mu 2008. Pa kupituluka muli ino Baibo iifumine, babomfeshe Baibo ya ciNgeleshi iya New World Translation iyapitulukwamo iya mu 2013. Ino Baibo ya mu Cibemba naikwata fyonse ifyaba muli Baibo ya mu ciNgeleshi iya mu 2013. Nomba mu myaka ukucila pali 60 iyapitapo, ifyo abantu balanda iciNgeleshi fyalyaluka. Ici e calengele ababa muli Komiti ya Baibo ya Malembo ya Calo Cipya (New World Bible Translation Committee) basalepo ukupituluka muli Baibo ya New World Translation. Ico tufwaisha, kupilibula Baibo iya-anguka ukumfwa no kubelenga, ukwabula ukwalula ubupilibulo bwa mashiwi yabamo. Ifipande fyaba mu Ifyebo Fyalundwako ifitila “Ifya Kukonka pa Kupilibula Baibo,” “Ifili Muli ino Baibo iyo Bapitulukamo,” na “Ifyo Cali pa Kuti Tukwate Baibo” filalanda pa mashiwi yamo ayo ba-alula muli ino Baibo bapitulukamo.

Bonse abatemwa Yehova Lesa kabili abamupepa, balafwaya ukukwata Baibo iyo bapilibula bwino kabili iyo bengalaumfwikisha. (1 Timote 2:4) Ici e calenga kube Baibo iyo bapitulukamo mu ciNgeleshi kabili tulefwaisha bakaipilibule mu ndimi ishingi. Tule-enekela ukuti mwe ba kulabelenga ino Baibo ya Malembo ya Mushilo mukasambililamo ifingi sana, kabili ‘mukafwaya Lesa, no kumusanga.’​—Imilimo 17:27.