Ibuuku lya Bubili Ilya Ishamfumu 21:1-26
21 Manase+ ali ne myaka 12 ilyo aishileba imfumu, kabili atekele imyaka 55 mu Yerusalemu.+ Nyina ali ni Hefsi-ba.
2 Manase alecita ifyabipa+ mu menso ya kwa Yehova, ifya bunani ifyo inko isho Yehova atamfiisheko abena Israele shalecita.+
3 Akuulile cipya cipya ififulo fya kupepelapo ifyo Hisekia wishi aonawile,+ akuuliile Baali ifiipailo kabili aimike icimuti ca kupepelapo,*+ nga filya fine Ahabu imfumu ya Israele acitile.+ Alekontamina ne fya mu muulu fyonse kabili alefibombela.+
4 Na kabili akuulile ifiipailo mu ng’anda ya kwa Yehova,+ iyo Yehova alandilepo ati: “Mu Yerusalemu e mo nkabika ishina lyandi.”+
5 Kabili ifya mu muulu fyonse+ afikuuliile ifiipailo mu mansa shibili isha ng’anda ya kwa Yehova.+
6 Aocele no mwana wakwe mu mulilo, alecita ifinjelengwe, alebukisha imbuko+ kabili alisontele na bakumwipushishako ku mipashi na balesobela ifintu.+ Alicitile ifyabipa ifingi nga nshi mu menso ya kwa Yehova pa kuti amukalifye.
7 Abikile icimpashanya ico apangile ica cimuti ca kupepelapo*+ mu ng’anda iyo Yehova aebelepo Davidi na Solomone umwana wakwe ati: “Muli ino ng’anda na mu Yerusalemu, umusumba uo nasala mu mikowa yonse iya kwa Israele, e mo nkalenga ishina lyandi likatwalilile ukuba.+
8 Kabili nshakaleke abena Israele bakafume mu calo ico napeele ifikolwe fyabo+ bakaye balelulumba na kabili, cikulu fye balebika amano ku kukonka fyonse ifyo nabeba,+ e kutila Amafunde yonse ayo Mose umubomfi wandi abebele ukuti balekonka.”
9 Lelo tabaleyakonka, kabili Manase atwalilile fye ukubalufya, alelenga balecita ifyabipa ukucila ne fyo inko isho Yehova alofesheeko abena Israele shalecita.+
10 Yehova alelandila mu babomfi bakwe bakasesema+ ati:
11 “Manase imfumu ya Yuda nacita ifi ifya bunani fyonse; nacita ifyabipa ukucila ifyabipa ifyo abena Amore+ bonse abaliko ilyo ashilabako+ bacitile. Nalenga na baYuda babembuka pantu balapepa utulubi twa bunani.*
12 E ico Yehova Lesa wa kwa Israele atila: ‘Mona, ndeletela Yerusalemu+ na Yuda ubucushi ubwa kuti umuntu nga aumfwa cikamupesha amano.*+
13 Kabili nkatambulwila intambo ya kupiminako+ pali Yerusalemu nge fyo natambulwilile pali Samaria,+ kabili nkabomfya ica kulinganishishako ico nabomfeshe pa ba mu ng’anda ya kwa Ahabu.+ Kabili nkapukuta Yerusalemu nge fyo umuntu apukuta imbale yafonka, filya fine aipukuta no kuikupika.+
14 Nkalekelesha abashalapo pa bupyani bwandi+ kabili nkalenga abalwani babo bakabacimfye. Abalwani babo bonse+ bakabasenda pa kuti bakayeba bankole kabili bakabapoka ifipe,
15 pantu balicitile ifyabipa mu menso yandi kabili balankalifya ukutula pa bushiku ifikolwe fyabo fyafumine mu Egupti ukushinta na lelo.’”+
16 Kabili Manase alipeye abantu abengi aba kaele, mpaka aisusha umulopa mu Yerusalemu monse,+ ukulunda pa lubembu ulo alengele abaYuda babembuka pantu balecita ifyabipa mu menso ya kwa Yehova.
17 Amalyashi yambi aya kwa Manase, fyonse ifyo acitile ne membu isho acitile, bushe tabafilemba mwi buuku lya malyashi ya mfumu sha mu Yuda?
18 Lyena Manase alifwile nge fyafwile ifikolwe fyakwe kabili bamushiikile mwi bala lya pa ng’anda yakwe, mwi bala lya kwa Usa.+ Amone umwana wakwe e wamupyene pa bufumu.
19 Amone+ ali ne myaka 22 ilyo aishileba imfumu, kabili atekele imyaka ibili mu Yerusalemu.+ Nyina ali ni Meshulamete umwana wa kwa Harusi uwa ku Yotba.
20 Alecita ifyabipa mu menso ya kwa Yehova, nga filya fine Manase wishi acitile.+
21 Alecita imembu shonse isho wishi acitile, kabili alebombela utulubi twa bunani uto wishi abombeele, kabili aletupepa.+
22 E ico alishiile Yehova Lesa wa fikolwe fyakwe, kabili taendele mu nshila sha kwa Yehova.+
23 Mu kupita kwa nshita, ababomfi ba mfumu Amone bali-ipangiile, kabili bayipaile mu ng’anda ya iko.
24 Lelo abekala calo balipeye bonse abapangiile Imfumu Amone, kabili babikile Yoshia umwana wakwe pa bufumu.+
25 Amalyashi yonse aya kwa Amone ne fyo acitile, bushe tabafilemba mwi buuku lya malyashi ya mfumu sha mu Yuda?
26 E ico bamushiikile mu nshiishi yakwe mwi bala lya kwa Usa,+ kabili Yoshia+ umwana wakwe e wamupyene pa bufumu.
Amafutunoti
^ Ishiwi lya ciHebere ilyo bapilibula ukuti ubunani, lyalipalana ne shiwi lya ciHebere ilipilula ukuti “ubusaali,” kabili balibomfya nga balelanda pa fya muselu.
^ Mu ciHebere, “amatwi yakwe yakawela.”
