MULI ba 1920, abasambi ba Baibolo balitendeke ukufwaya abengatemwa ukusambilila icine mu Georgia. Mu 1924, baliswile iofeshi ku Beirut mu Lebanon ilyaleyangalila umulimo wa kubila imbila nsuma mu Armenia, mu Georgia, mu Syria, na mu Turkey.

Nangu ca kuti pali ilya inshita kwali bamo abaumfwilepo icine mu Georgia, tabalelunduluka. (Mat. 13:33) Nomba mu kupita kwa nshita, abantu abengi mu Georgia balitendeke ukusambilila icine ca Bufumu kabili ifyo balesambilila fyalibafwile ukwaluka.

Ilyo inkondo ya bubili iya calo conse yatendeke, ba Vaso Kveniashvili bali fye ne myaka 14. Apo icalo ca Georgia cali  mu Soviet Union, bawishi ba ba Vaso balibasendele ku bushilika. Pali ilya inshita, banyina ba ba Vaso ninshi balifwa kale. Apo ba Vaso e balipo abakalamba pa bana bonse, batendeke ukwiba pa kuti baleisakamana no kulasunga abaice babo batatu.

Ba Vaso baliilundile kwi bumba lya fipondo kabili mu kupita kwa nshita balishibe sana ifya kwibila abantu. Batile, “Naleumfwa kwati mu fyo nalecita mwali sana umulinganya ukucila ifyo caba mu buteko nelyo mu bwikashi.” Nomba tapapitile ne nshita iikalamba ba Vaso balilwike ukuti balefwaya ifyo abantunse abali bonse bashingacita. Batile, “Nalefwaisha umulinganya.”

Ba Vaso balibekete no kubakaka pali filya baleibila abantu kabili babatwele mu kubomba incito iyakosa sana mu  nkambi ya ku Siberia. Muli iyi inkambi, balisangile Inte ya kwa Yehova uo bakakile pa mulandu ne fyo asuminemo. Ba Vaso batile, “Nalisangile ifyo nalefwaisha. Nangu ca kuti tatwakwete impapulo ishili shonse, nalipooseleko amano no kusambilila fye ku fyo munyina alenondolwela.”

Ilyo ba Vaso babafumishe mu cifungo mu 1964, balibwelelemo ku Georgia kabili batendeke ukufwaya Inte sha kwa Yehova. Babalilepo ukulatumishanya amakalata no muntu bali nankwe mu cifungo. Nomba ku ca bulanda, cibusa wabo alifwile kabili tabakwete abantu ba kwa Lesa bambi abakulanshanya nabo. Palipitile imyaka nalimo 20 pa kuti batendeke ukulanshanya ne Nte sha kwa Yehova na kabili. Tuli no kumfwilapo na fimbi pali bena.

Ba Valentina Miminoshvili bali fye abaice ilyo babakakile mu nkambi ya kucushishamo abantu iya ba Nazi kabili ukubakaka muli iyi inkambi kwalilengele bapaalwa. Ilyo bali mu  nkambi, bamonene ne Nte sha kwa Yehova pa muku wa kubalilapo. Ico batemenweko sana kuli ba Nte, citetekelo cabo icakosa. Ifyo babasambilishe ukufuma mu Baibolo fyalibafikile sana pa mutima.

Ilyo babwelelemo ku mwabo lintu inkondo yapwile, ba Valentina balitendeke ukwebako bambi ifyo basambilile mu Baibolo. Nomba abalashi ba mu buteko tabatemenwe uyu mulimo balebomba kanshi balibatwele mu nkambi ya mu Russia umo balebomba incito iyakosa pa myaka 10. Muli iyi nkambi balitwalilile ukusambilila Baibolo ne Nte sha kwa Yehova. Mu kuya kwa nshita basukile babatishiwa.

Ilyo babafumishe mu nkambi mu 1967, ba Valentina bakukiile ku masamba ya Georgia uko bailetwalilila ukubomba umulimo wa kubila imbila nsuma mu mucenjelo. Tabaishibe ukuti pa bantu abengi abo bali no kwafwa pali na nkashi uwalepepa sana ukuti amonanepo na babwananyina.

Mu 1962, bankashi Antonina Gudadze bafumine ku Siberia no kuya ku Georgia ilyo abalume babo abashali ba Nte bapingwilepo ukubwelelamo ku calo bafumine. Ilyo bali ku Siberia, ba Antonina balisambilile icine kuli ba Nte bamo abaile mu kwikala muli ici calo. Nomba ilyo ba Antonina batendeke ukwikala mu musumba wa Khashuri uwabela ku kabanga ka Georgia, basangile ukuti baliko fye beka ukwabula bakapepa banabo.

Ba Antonina balilandile pa fyo Yehova ayaswike amapepo yabo, batile: “Bushiku bumo nalipokelele fimo ukufuma kuli bamayo ku Siberia kabili umu mwine e mo bafishile ne mpapulo ishilanda pa fya mu Baibolo. Nalepokelela ifya kulya fya ku mupashi muli uyu musango pa myaka 6 iyakonkelepo. Lyonse naletasha Yehova pa fyo alencingilila lwa ku mupashi, ifyo alenkoselesha e lyo ne fyo alensakamana.”

 Na lyo line ba Antonina bali fye beka. Batile: “Lyonse nalepepa kuli Yehova ukuti akangafwe ukuba pamo na babwananyina na kabili. Bushiku bumo, abanakashi babili balingile mwi tuuka umo nalebomba. Banjipwishe ukuti, ‘Bushe ni mwe ba Antonina?’ Ifyo bali ne cikuuku pa kunjipusha fyalengele nailuka ukuti ni bankashi ba Bwina Kristu. Twalikumbatene kabili twalilukwishe ifilamba ku nsansa.”

Pali aba bankashi pali na ba Valentina Miminoshvili. Ba Antonina balitemenwe icine cine ilyo baumfwile ukuti ukulongana kubela ku masamba ya Georgia! Nangu ca kuti ukwa kulonganina kwalepele nalimo amakilomita 300, ba Antonina baleya fye mu kulongana umuku umo mu mweshi.

Muli ba 1960, ba Nte bamo abo balecusha ku balashi ba mu buteko bwa Soviet Union bakukiile ku ncende shimbi uko ifintu fyaliko bwino. Munyinefwe Vladimir Gladyuk uwali uwacincila kabili uwashipa aali pali bamo abakukile. Mu 1969, afumine ku Ukraine no kukukila ku musumba wa Zugdidi uwabelele ku masamba ya Georgia.

 Pa kubalilapo, abafumine ku Georgia baletungulula ukulongana mu ciRussian. Nomba ilyo abena Georgia abengi batendeke ukulalongana lyonse, batendeke ukupekanya ukuti ukulongana kuletungululwa mu ciGeorgian. Balibombeshe sana mu mulimo wa kupanga abasambi ica kuti mu August mu 1970, abena Georgia 12 balibatishiwe.

Mu 1972, ba Vladimir no lupwa lwabo bakukiile ku musumba wa Sokhumi mu lulamba lwa Bemba Wafiita. Ba Vladimir balandile ukuti: “Twaleumfwa ukuti twali abakankala lwa ku mupashi kabili twalitemenwe sana pa fyo Yehova atupaalile. Icilonganino calilundulwike bwangu.” Muli ulya wine mwaka, balilongene Icibukisho ca kubalilapo mu Sokhumi kabili abantu 45 e basangilweko.

Ba Babutsa Jejelava abali nalimo ne myaka ukucila pali 90, bali pa babalilepo ukusambilila icine mu Sokhumi mu  kutendeka kwa mwaka wa 1973. Batile: “Bushiku bumo, namwene abanakashi 4 abalelanshanya bwino sana. Babili bali ni ba sista ba ku Katolika, e lyo bambi bali ni Nte sha kwa Yehova.” Pali aba ba Nte babili, bamo ni ba Lyuba abakashi ba ba Vladimir Gladyuk e lyo bambi bali ni ba Itta Sudarenko bapainiya abali abacincila abafumine ku Ukraine.

Ba Babutsa balilandile ifyo bacitile ilyo bakutike ku fyo balya banakashi balelanshanya, batile: “Nalibikileko sana amano kabili nalekutikisha.” Ilyo baumfwile ukuti Lesa alikwata ishina, bwangu bwangu baipwishe abalelanshanya nga kuti babalangako apaba ishina lya kwa Lesa mu Baibolo. Balipwishe ifipusho ifingi ica kuti balilanshenye pa maawala yatatu.

Ba Babutsa balisakamane ukuti tabakamonepo Inte sha kwa Yehova na kabili, e ico baipwishe ukuti, “Bushe mwalaya no kunsha fye fino fine?”

Aba bankashi bayaswike ukuti: “Awe, tukabwela uyu mulungu pa Cibelushi.”

Aba bankashi babili baliile pa Cibelushi nga fintu balaile kabili Babutsa balitemenwe icine cine! Balitendeke isambililo lya Baibolo pali bulya bwine bushiku. Ilyo bapwile ukusambilila, ba Babutsa balisakamene nga abalebasambilisha Baibolo bali no kutwalilila ukulabasambilisha. Mu mutima batile: ‘Apo aba bantu nabatendeka ukunsambilisha Baibolo, mfwile fye ukushininkisha ukuti batwalilila ukulansambilisha.’

Ba Babutsa balitontonkenye pa fyo bali no kucita. Batile: “Apo nalishibe ukuti ba Lyuba balyupwa, naipwishe ba Itta nabo nga balyupwa. Batile tabaupwa. ‘Lyena nabebele nati, kanshi mukukile mu ng’anda mu mwandi! Mwaba apa kulala pabili ne nyali pa kati. Kanshi kuti tulesambilila Baibolo no bushiku!’” Ba Itta balisumine kabili bakukiile na ku ng’anda ya ba Babutsa.

Ba Babutsa balilandile ifyo balecita, batile: “Limo ubushiku  nshalelala, naletontonkanya fye pa fyo nalesambilila. Limo nga pali ifyo ndefwaya ukwipusha ba Itta nalebabusha no kubeba ati: ‘Buuleni Baibolo, pali ifyo ndefwaya ukumwipusha!’ Balefikina mu menso no kunjeba ati, ‘Mukwai natulanshanye.’ Balebula Baibolo no kwasuka ifipusho fyonse ifyo naleipusha.” Ba Babutsa balitendeke ukubila imbila nsuma ilyo papitile fye inshiku shitatu ukutula apo ba Itta bakukiile ku mwabo.

Ba Babutsa balikwete ba cibusa wabo aba pa mutima, ba Natela Chargeishvili. Ba Babutsa batile: “Nalemona kwati icuma cali no kulenga bakaana ukusambilila icine, nomba nalitemenwe pantu ifi te fyo cali. Ilyo twalanshenye fye nabo pa muku wa kubalilapo, nalimwene ukuti balefwaisha ukusambilila icine.” Tapakokwele bonse babili balitendeke ukwebako abo balebomba nabo, ifibusa na bena mupalamano ifyo balesambilila.