GEORGIA
Abena Mwandi Balifililwe Ukuleka Ukubelenga!
Ba Marina Kopaliani
-
BAFYELWE MU 1957
-
BABATISHIWE MU 1990
-
Ba Marina na bena mwabo ba Badri bali ni bakasabankanya abalebombesha sana nangu ca kuti balikwete abana babili abalumendo. Ba Badri balibombeleko na muli Komiti ya Calo kabili balitwalilile ne cishinka mpaka ilyo bafwile mu 2010.
MU 1989, ine na bena mwandi twalimonene na ba Nte pa ng’anda ya mwina mupalamano. Munyinefwe Givi Barnadze uwalesambilisha umwina mupalamano wesu Baibolo, takwete Baibolo yakwe pantu tacayangwike ukusanga Baibolo mu Georgia pali ilya nshita.
Ilyo balesambilisha umwina mupalamano, twalitemenwe ifyo twaumfwile kabili twalefwaya ukukwata Baibolo yesu. Ilyo abena mwandi bamonene na bandume inabo, babebele ukuti balefwaya Baibolo. Balipapile no kutemwa sana ilyo bandume inabo babebele ukuti e lyo fye bashitile Baibolo iipya iya mu ciGeorgian kabili batile balabapeela ngo bupe.
Ilyo ba Badri babwelele ku ng’anda, balikeele pe tebulo kabili balebelenga fye Baibolo mpaka bwaila. Ubushiku bwakonkelepo, babuukile fye no kutwalilila ukubelenga. Ilyo nabwelele ukufuma ku ncito, nabasangile nabekala pe tebulo ninshi bacili balebelenga Baibolo. Ala balifililwe ukuleka ukubelenga! E ico nabakoseleshe ukubako pa cuti pa kuti bengapwisha ukubelenga Baibolo. Tapakokwele, balipwishishe ukubelenga Baibolo yonse fye.
Ilyo munyinefwe Barnadze atendeke ukutusambilisha Baibolo mu citabo citila Icine Icitungulula ku Bumi bwa Ciyayaya, twalitemenwe sana pantu twalikwete Baibolo yesu. Ici caliweme pantu abaletusambilisha bakwete fye icitabo ca Icine e lyo na ifwe twakwete fye Baibolo. Ilyo papitile nalimo umwaka umo, ine na bena mwandi ba Badri twalibatishiwe.
