Kuli Bamunyinefwe na Bankashi:

Mu myaka ya ba 600 B.C.E., Lesa alengele kasesema Esekiele ukumona icimonwa icamupapwishe. Alimwene iceleta ilikalamba ilyaletungululwa na Kateka wa myulu ne sonde. Icipapusha sana pali ili iceleta, fintu lyaleenda. Lyalebutukisha kwati ni nkuba kabili lyaleyalukila ukuli konse ukwabula ukunashako umusenselo.—Esek. 1:4, 9, 12, 14, 16-27.

Ici icimonwa cilatucinkulako ukuti icilonganino ca kwa Yehova ica ku muulu caba nge celeta ilyenda lyonse. Inga cilonganino cakwe ica pe sonde? Mu mwaka wa mulimo uwafumineko, caliilangile fye apabuuta tuutu ukuti Yehova alelenga abantu bakwe ukubomba bwino imilimo.

Kuno ku America, aba pa Bethel balekuuka ukufuma ku Brooklyn no kuya ku maofeshi yakalamba ayapya ku Warwick mu New York, na mu fikuulwa fimbi ifya kubombelamo kabili bambi baleya mu kubombela mu filonganino. Bamunyina ababa pa Bethel mwi sonde lyonse nabo balebombesha ukukuula no kuwamya amaofeshi ya musambo e lyo no kukuukila ku ncende shimbi ishipya. Bushe na imwe pali ifyo mulecita? Nangu ca kuti tapali uko mulekuukila, mufwile na imwe mulebombesha.

 Ibumba Litungulula nalitemwa sana ukumona ifyo abantu ba kwa Lesa mu calo conse balebombesha pa kuti baleendela pamo ne cilonganino ca kwa Yehova. Abengi baliya mu kubombela uko bakabila ba mbila nsuma baceepa. Abengi balikuukila mu filonganino umo balanda ululimi lumbi. Bambi nabo balitendeka ukubomfyako inshila ishipya ilyo balebila imbila nsuma. Kabili Abena Kristu ba cishinka bonse, ukubikako fye nabalwalilila e lyo na bakoloci balitwalilila ukubombako imilimo ya kwa Lesa no kulanga ukuti Satana wa bufi.—1 Kor. 9:24.

Muleibukisha ukuti Yehova alamona ifyo muipeelesha ukumubombela. (Heb. 6:10) Ifyo muipeelesha filalenga twatontonkanya pali filya Abrahamu na Sara baipeeleshe. Ilyo Abrahamu aali ne myaka nalimo 70, aile  no lupwa lwakwe ku Kanaani ukufuma mu musumba wa Uri uwa bena Kaldi, kabili kulya e ko aikele mu matenti imyaka 100 iyakonkelepo mpaka ilyo afwile. Pa kuti Abrahamu no mwina mwakwe bacite fyonse ifi, baliipeeleshe icine cine.—Ukute. 11:31; Imil. 7:2, 3.

Bushe na imwe mulaipeelesha? Bonse mwe baleshipikisha amafya muli shino nshiku sha kulekelesha mucita ifyo Yesu atwebele ukulacita. Atile: “Kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo.”—Mat. 28:19.

Filya Yesu abomfeshe ishiwi lya kuti “kabiyeni,” alelosha mu kuti tatufwile ukwikala fye. Twalitemenwe sana ukumona ifyo ababomfi ba kwa Kristu babombeshe mu mwaka wapwile. Ifyo babombeshe fyalelanga fye ukuti Yehova alapaala umulimo wa kubila imbila nsuma iya Bufumu ku bantu ba mu nko shonse.—Marko 13:10.

Abantu abengi balekutika kuli ubu ubukombe. Uyu mwaka wapwile impendwa ya bakasabankanya yali 8,340,847, e lyo cila mweshi twatungulwile amasambililo ya Baibolo 10,115,264. Ukwabula no kutwishika, iceleta lya kwa Yehova lilebutukisha kabili na imwe mulebombesha. Twalilileni ukubombesha pantu inshita isheleko ukuti Yehova aleke ukupususha abantu inono.

Kanshi ilembo lya mwaka wa 2017 naliwama sana. Lileti “Tetekela Yehova no kucita icisuma”! (Amalu. 37:3) Nga mulekonka ifyo aya amashiwi yalanda, e kutila ukulacita ifisuma ilyo mulebombela Yehova, ninshi  mulelanga ukuti mwalimucetekela. Lyonse muleibukisha ukuti tamwaba mweka. Amashiwi ya kwa Yesu ya cine. Atile: “Moneni! Nakulaba na imwe inshiku shonse mpaka na ku mpela ya calo.”—Mat. 28:20.

Mufwile ukulaibukisha ukuti Yehova takaleke ukupaala umulimo wenu. Nampo nga mulabomba imilimo iikalamba mu cilonganino nelyo mubomba iinono, Yehova alatemwa nga mulebomba apapelele amaka yenu kabili mulebomba no mutima wenu onse. Nga mulemubombela muli iyi nshila alatemwa sana. (2 Kor. 9:6, 7) Kanshi twalilileni ukupalama kuli Shinwe uwaba no kutemwa ilyo mulepepa, muleisambilisha Icebo ca kwa Lesa, mulelongana, e lyo na lintu mulebila imbila nsuma.

Mpaka iyi “nshita iinono” iisheleko ukuti Satana Kaseebanya bamonaule ikapwe, uyu umulwani akatwalilila fye ukucita ifili fyonse pa kuti tuleke ukuba ne cishinka kuli Yehova. (Ukus. 12:12) Twalilileni ukupalama kuli Yehova, kabili Satana Kaseebanya akafilwa ukonaula bucibusa bwenu na Yehova. (Amalu. 16:8) Muleibukisha ukuti twalimutemwa sana kabili tulatasha pa fyo mutwafwilisha ilyo tulebomba imilimo ya Bufumu bwa kwa Shikulu muli shino inshiku sha kulekelesha.

Ni fwe bamunyinenwe,

Ibumba Litungulula Ilya Nte sha kwa Yehova