ULUPWA e cintu cakokwesha ku bantunse, nomba pali lelo luli mu bwafya. Ukwanana kwabipisha ukwa kubomfya imiti ikola na bucisenene ku bapungwe, ubwafya bwabipisha ubwa kulekana no kupumana mu lupwa, ukukula kwa cipendo ca ndupwa sha bafyashi abashimbe, na mafya yambi ayakakala filelenga bamo ukutwishika nampo nga ukwikala nge ndupwa kukatwalilila.

Bushe nalyo line kuti cacitika ku lupwa ukuba icifulo cashikatala, umo ababa muli cene bengasakamanwa? Ee, nga ca kuti ababa mu ndupwa balishiba icaba inkaama ku nsansa sha lupwa. Iyo nkaama te cintu icafiswa. Yalyeshiwapo no kulingwa pa myanda ya myaka iingi nga nshi. Ni nkaama nshi? Cino citabo icileti, Icaba Inkaama ku Nsansa sha Lupwa, calayasuka. Na kabili cilemulanga ifya kumwenako ifibomba pa fyo iyi “nkaama” ingafwilisha ukupikulula amafya ayengi aya mu ndupwa. Bushe kuliko uuli uonse ilelo uushilekabila ifyebo fya musango yo?