Icipandwa 38

Finshi Ifyo Nkacita mu Bumi Bwandi?

“Kale nshalesakamana pa fya ku ntanshi. Lelo ilyo naali mupepi no kupwisha isukulu, e lyo naishibe ukuti nomba e lyo nalaishiba ifyo icalo caba, ne fyo caba ukubomba incito. E lyo ne fyo cumfwika ukuilipilila imisonko.”—E fyalandile Alex.

ELENGANYA ukuti ulefwaya ukuya ku ncende imo iyaba ukutali sana. Nalimo ica kubalilapo ico wingacita, kumona pali mapu pa kuti wingeshiba inshila iisuma iyo wingapita. E fyo caba na lintu ulefwaya ukwishiba ifyo ukekala ku ntanshi. Umulumendo uubomba pa maofeshi ya Nte sha kwa Yehova uwe shina lya Michael, atile, “Kwaliba ifintu ifingi sana ifyo wingasalapo ukucita.” Bushe kuti wacita shani pa kuti usalepo pa fingi fine fi? Michael atile, “Icingakwafwa fye kwishiba ifyo ulefwaya ukucita.”

Ufwile ukulamona ifyo ufwaya ukucita kwati ni ncende imo iyo ulefwaya ukuyako. Te kuti ufike kuli iyo ncende nga ule-enda fye umungulu. Kuti caba bwino ukulolesha pali mapu no kwishiba inshila iya kupita. Nga wacita ifyo ninshi ulekonka ukufunda kwaba pa Amapinda 4:26, apatila: “Ulewamya umwenda amakasa yobe.” Ili lembo muli Baibolo ya The Contemporary English Version litila: “Wishibe uko uleya.”

Mu myaka ikakonkapo ukasala ifya kucita pa fintu ifingi ifyacindama: pa lwa kupepa, pa lwa ncito, pa cupo, pa lupwa,  na muli fimbi ifyacindama nga nshi. Cikalayanguka ukusala ifya kucita ifisuma nga ca kuti mu kubalilapo fye waishiba ico ulefwaya ukucita. Kabili ilyo ukalasala ifya kucita, kuli icintu icacindama ico ushilingile ukulabako.

“Ibukisha Kabumba Obe”

Pa kuba ne nsansa sana, ufwile ukukonka amashiwi ya mano ayo Imfumu Solomone yalandile, aya kuti: “Ibukisha Kabumba obe ilyo ucili umwaice.” (Lukala Milandu 12:1,Today’s English Version) Mu mashiwi yambi kuti twatila, ilyo ulefwaya ukucita fimo mu bumi ufwile ukucita ifingatemuna Lesa.

Mulandu nshi cawamina ukulacita ifi? Baibolo pa Ukusokolola 4:11, itila: “Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.” Ifibumbwa fyonse ifyaba mu muulu na pano isonde fifwile ukutasha Kabumba. Bushe iwe ulamutasha pa fyo akupeela “umweo no mupu na fyonse”?  (Imilimo 17:25) Bushe te kuti upeeleko Yehova Lesa fimo pa kuti umutashe pa fyo akucitila?

Imisepela iyingi abatontonkanya pali Kabumba wabo mu cilonganino ca Nte sha kwa Yehova balabombako umulimo wa nshita yonse. Tontonkanya pa milimo yalekanalekana iisuma iyo wingabombako.

Bupainiya. Bapainiya ba nshita yonse balabomba inshita iikalamba mu mulimo wa kushimikila. Pa mulandu wa kubasambilisha no kulabombako lyonse umulimo, balasambilisha bwino Baibolo.

Ukubombela ukushaba aba kubomba abengi. Bamo baya mu kubombela ukwaba bakasabankanya ba Bufumu abanono fye. Bambi balasambilila ululimi lumbi no kubomba mu cilonganino caba mupepi umo balanda ulo lulimi nelyo ukukukiila fye ku calo cimbi. *

Bumishonari. Bapainiya abafikapo abashilwalilila kabili ababa na maka balabakansha ukuyabomba ku fyalo fimbi. Bamishonari baliba ne nsansa, kabili balaipakisha.

Umulimo wa pa Bethel. Ababa mu lupwa lwa pa Bethel babomba pa maofeshi ya Nte sha kwa Yehova. Mu fyalo fimo  umulimo babomba wa kupilibula no kupulinta e lyo no kutuma impapulo.

Ukubombela ku fyalo fimbi. Ababomfi bamo baya ku fyalo fimbi ku kubombako umulimo wa kukuula Amayanda ya Bufumu, Ifikuulwa fya Kulonganinamo Ukulongana Kukalamba, e lyo na maofeshi ya Nte sha kwa Yehova.

Isukulu lya Kukansha Ilya Butumikishi (MTS). Baeluda na babomfi batumikila abafikapo abashimbe balabakansha ifya kutungulula bwino icilonganino ne fya kulanda amalyashi bwino. Bamo abapwisha isukulu balabatuma ukuyabombela ku fyalo fimbi.

Tontonkanya pa Mulimo Ulefwaya Ukubombako

Umulimo wa nshita yonse usuma nga nshi, kabili mulafuma amapaalo ayengi nga nshi. Kwena pa kucita ifyo, ulingile ukuipekanya bwino. Ica kumwenako fye, ufwile ukuipusha auti, ‘Milimo nshi naishiba iyo ningalabomba pa kuti ningalayikalila?’

Kelly aletontonkanya ukubombako bupainiya, e calengele ukuti asale incito ya kumwafwa ukubombako bupainiya. Atile, “Incito nasalile, yalingafwile ukulabomba umulimo wa kushimikila.”

 Ilyo Kelly aali pa sukulu lya ku sekondari, alilembeshe ukuti alesambililako imilimo imo. E calengele ukuti alebomba umulimo uo acindike sana. Kelly atile, “Umulimo wa nshita yonse e o nalefwaya ukulabomba. Imilimo imbi iyashala yali yakungafwilishako fye muli fimo.” Kelly alitemwa pa co asalapo ukulacita. Atile, “Ico nasalapo ukucita e cacindama pali fyonse.”

Kuti Waipushako na Bambi

Nga uli pa bulendo, uleya ku ncende iyo ushaishiba, kwena nangu cingaba shani kuti wasuka waipushako bamo ifya kwenda. Ifi fine e fyo wingacita na lintu uletontonkanya pa fyo ukekala ku ntanshi. Leka bambi bakupandeko amano. Amapinda 20:18 yatila: “Ukupandwa amano e kulenga ukuti amapange yacitike.”

Abengakupandako amano ayasuma bafyashi bobe. Bambi  na bo abo wingepushako, Bena Kristu bakosoka abakonka ukufunda kwa kwa Lesa. Roberto uubombela pa Bethel, uuli mu myaka ya ba 20, atile, “Ulesambilila ku bakalamba ababa ne mibele isuma abo mwaba na bo mu cilonganino nangu bambi abekala mupepi.”

Yehova alafwaisha ukukwafwa pa kuti wingasalapo ukucita ifintu ifikalenga ukabe ne nsansa nga nshi. Kanshi ulingile ukupepa kuli ena pa kuti akwafwe ukuti ‘uleiluka icaba ukufwaya kwakwe’ ilyo uletontonkanya pa fyo ulefwaya ukucita ku ntanshi. (Abena Efese 5:17) Muli fyonse ifyo wakulacita, ulekonka ukufunda ukwaba pa Amapinda 3:5, 6, apatila: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.”

Nga ulefwaya ukusambililapo na fimbi, tambako DVD ya “Young People Ask—What Will I Do With My Life?” Yaba nomba mu ndimi ukucila pali 30

[Futunoti]

ILEMBO

“‘Shi munjeshe . . . ,’ e fyo Yehova wa mabumba asosa, ‘mumone nga nshakamwiswile ifipunda fya mu muulu no kumupongolwela amapaalo mpaka kukabule incende apa kubika amapaalo yambi.’”—Malaki 3:10.

IFYO WINGACITA NI FI

Ipusha bamo ababomba mu mulimo wa nshita yonse pa myaka iingi. Bepushe icalengele ukuti basalepo ukubombako uyu mulimo, e lyo bakwebe ne fisuma ifyo banonkelamo.

NAWISHIBA . . . ?

Amalaiti kuti yalenga mashini ukubomba. Umupashi wa mushilo uwa kwa Lesa na o kuti wakwafwa ukubomba bwino umulimo wakwe.—Imilimo 1:8.

IFYO NDEFWAYA UKUCITA!

Pa kuti nkaleba ne nsansa sana mu mulimo wa kushimikila, uo nkalanda nankwe ni ․․․․․

Ifyo ningatemwa ukwipusha abafyashi bandi pali ili lyashi ni fi ․․․․․

ULETIPO SHANI?

● Milimo nshi iyo waishiba sana kabili iyo wingabomba bwino?

● Ni nshila nshi wingalumbanishishamo Yehova ku fyo waishiba?

● Mulimo nshi uwa nshita yonse uo tulandilepo muli cino cipandwa uo utemenwe sana?

[Amashiwi pe bula 313]

“Nalicindika sana abafyashi bandi. Ifyo batwalilila ukuba abacincila mu mulimo wa kushimikila, ifyo baaleshipikisha ubwikalo nga bwa-afya, ne fyo bankoseleshe ukutendeka umulimo wa nshita yonse, fyalingafwile.”—E fyalandile Jarrod

 [Akabokoshi pe bula 314]

Ifya Kutontonkanyapo

Ifyo Mfwaya Ukucita

Conga pa fyo ufwaya ukucita. Conga mu kabokoshi akali pa fyo ufwaya ukucita e lyo nga kuli na fimbi ifyo ufwaya ukucita lemba pambi.

Ifyo Mfwaya Ukucita mu Mulimo

□ Ukulundako ama-awala nshimikila ukufika kuli ․․․․․ cila mweshi

□ Nakulashiila abantu impapulo ․․․․․ cila mweshi

□ Nakulabelengela abantu Baibolo ilyo ndeshimikila

□ Nakulabwelelako imiku ․․․․․ cila mweshi

□ Ningile ukutendeka isambililo lya Baibolo

Fimbi ifyo ndefwaya ukucita: ․․․․․

Ifyo Nakulasambilila

□ Nakulabelenga amabula ․․․․․ aya mu Baibolo cila bushiku

□ Nakulapekanya ukulongana cila mulungu

□ Nakulafwailikisha ifyebo na fimbi pa malyashi ya mu Baibolo ayali pe samba: ․․․․․

Ifyo Ndepanga Ukulacita mu Cilonganino

□ Ukula-asukapo nangu fye umuku umo pa kulongana konse

□ Nakulalandapo no mukalamba umo uo ndefwaya ukwishiba bwino

□ Nakulatandalilapo umukoloci nelyo uulelwala mu cilonganino

Fimbi ifyo mfwaya ukucita: ․․․․․

Lelo ni pa

Nga papita imyeshi mutanda, ukapituluke mu fyo waconga ifyo ulefwaya ukucita, pa kuti ukamone nga naucita ifyo wapangile. Alula ifyo wacongelepo nelyo lembelapo na fimbi ifyo ulefwaya ukucita.

[Icikope pe bula 312]

Nga ca kuti walipanga ifya kucita te kuti uleonawila amaka yobe ku fintu ifishingakwafwa