ISAMBILILO 1
Ni Mbila Nsuma Nshi Iyi Ine?
1. Ni mbila nshi iyafuma kuli Lesa?
Lesa afwaya abantu ukuba ne nsansa. Apangile icalo na fyonse ifyabapo pantu alitemwa abantu. Nomba line ali no kucitapo fimo ifikalenga abantu mu calo conse bakekale bwino. Akafumyapo fyonse ifilenga abantu ukucula.—Belengeni Yeremia 29:11.
Takwaba ubuteko ubwapwisha ifipondo, amalwele ne mfwa. Lelo nomba line, Lesa ali no kufumyapo amabuteko yonse aya bantu no kupyanikapo Ubufumu bwakwe, kabili iyi ni mbila nsuma. Abakalatekwa muli ubu Bufumu bakalaikala umutende kabili bakaba no bumi ubusuma.—Belengeni Esaya 25:8; 33:24; Daniele 2:44.
2. Mulandu nshi abantu balingile ukumfwila iyi mbila nsuma?
Ukucula kukapwa fye ilyo Lesa akafumya pa calo abacita ifyabipa. (Sefania 2:3) Ni lilali akabafumyapo? Icebo ca kwa Lesa calisobele ifilecitika pali ino nshita ifilelenga abantu ukulaikala mwenso mwenso. Ifi fintu filelanga ukuti inshita ya kuti Lesa afumyepo ababipa naipalama.—Belengeni 2 Timote 3:1-5.
3. Finshi tufwile ukucita?
Tufwile ukusambilila pali Lesa ukubomfya Baibolo, Icebo cakwe. Baibolo yaba kwati ni kalata iyo umufyashi alembela abana bakwe. Ilatweba ifyo twingacita pa kuti tuleikala bwino na pa kuti tukekale umuyayaya pano calo. Kwena, bambi te kuti batemwe ukumona mulesambilila Baibolo. Mu calo cipya imikalile ikawama sana. Kanshi te kwesha ukuleka uuli onse ukumulesha ukusambilila.—Belengeni Amapinda 29:25; Ukusokolola 14:6, 7.
Nalimo Kuti Mwatemwako ne fi
PA NTE SHA KWA YEHOVA
Mulandu Nshi Mulingiile Ukusambilila Baibolo?
Mu Baibolo mwaliba ifyasuko ku mepusho yacindama ayo abantu abengi pano calo bakwata. Bushe na imwe kuti mwatemwa ukusanga amasuko ku mepusho mwakwata?
