KUHAWAII kwaliba akanama kamo akekala mu menshi ako beta ukuti bobtail squid, aka kanama kasalapuka ubushiku. Nga bwaila, kalafumya ulubuuto ululingana no lubuuto lwa mweshi ne ntanda, ne ci cilenga kelamoneka. Icilenga kalefumya ulu lubuuto, tushishi utwaba mu kati. Ukwishiba ifyo utu tushishi tubomba muli ka bobtail squid kuti kwatwafwa ukwishiba ifingi pa bumi bwesu.

Tontonkanyeni pali ici: Ka bobtail squid kekala mu menshi ayalengama ayaba ku fishi fya Hawaii. Ulubuuto lwa mweshi ne ntanda lulalenga ifintu ifili mu menshi ukulamoneka ne ci cilenga balefimona ku fiswango ifili pa nshi. Lelo ka bobtail squid kena kalafumya ulubuuto pa lufumo ululingana no lubuuto ulufuma ku mweshi ne ntanda. Ne ci cilenga kelamoneka, kabili ne cinshingwa cakako tacimoneka. Icilenga ifi, cilundwa ico kakwata umwikala utushishi utufumya ulubuuto ulwalinga ululenga kelamoneka.

Utu tushishi nalimo e tulenga aka kanama kaleishiba inshita iya ukulaala no kubuuka. Ifi utu tushishi twafwa aka kanama kwishiba inshita ya kulaala no kubuuka, calenga abasambilila balefwaisha ukwishiba nga utushishi twa musango yu twaba fye muli tu bobtail squid epela. Ku ca kumwenako, mu nama, utushishi utulenga ifya kulya ukulasunguluka nalimo e tulenga shilecita ifintu ifyo shicita pa nshita imo ine cila bushiku. Nga ca kuti umuntu talecita ifintu pa nshita afwile ukuficitilapo, kuti alwala amalwele pamo nga ukulaaba sana no bulanda, shuga, ukwina ukucila mu cipimo, e lyo no kukanalaala ifyo afwile ukulaala. Kanshi ukusambilila pa fyo utu tushishi tubomba muli ka bobtail squid kuti kwatwafwa ukwishiba ifingi pa bumi bwesu.

Muletipo shani? Bushe ici cilundwa icilenga ka bobtail squid ukwaka caishileb ako fye icine, nangu kwali uwa cipangile?