IFYO CABA MUNO NSHIKU

Abantu abengi mu calo baliba na kapatulula pa mulandu wa kuti tabatemwa aba ku fyalo fimbi na balanda indimi shimbi, balatemwisha icalo cabo ne ndimi shabo e lyo bambi nabo balapata abanabo pa mulandu fye wa kuti tabapepa kumo kwine.

IFYO BAIBOLO ILANDA

Ilyo Yesu Kristu aali pano calo, abantu abengi bali na kapatulula. AbaYuda na bena Samaria tabaleumfwana. (Yohane 4:9) Abaume balisuulile sana abanakashi. Bashimapepo abaYuda balisuulile abantu yaweyawe. (Yohane 7:49) Yesu Kristu ena te fyo aali, e co abalemukaanya balelandila abati: “Uyu muntu alapokelela ababembu no kulya na bo.” (Luka 15:2) Yesu ali uwa cikuuku, uwatekaanya, kabili alitemenwe abantu pantu taishile pa calo mu kupingula abantu, lelo aishile mu kubasambilisha pali Lesa. Aishile mu kusambilisha abantu pantu alibatemenwe.—Yohane 3:17; 13:34.

Ukutemwa, e kulenga tuleshishimisha, tuleumfwana na bambi te mulandu ne filubo bapanga nelyo ifyo baaba. Ilembo lya Abena Kolose 3:13 litila: “Muleshipikishanya no kubelelana uluse nga umo ali ne ca kuilishanya ku munankwe.”

“Lelo ukucila pali ifi fyonse, muletemwana nga nshi, pantu ukutemwa kufimba pa membu ishingi.”—1 Petro 4:8.

IFYO CABA

Aba mu mabuteko abengi balafwaya abantu balekonka amafunde. Ne ci cilalenga babikako amafunde pa fyo abantu balingile ukulacita.

IFYO BAIBOLO ILANDA

“Mu kutemwa tamwaba ukucita ifishayana.” (1 Abena Korinti 13:5) Nangu ca kuti Yesu talekaanya bambi ukucita ifyo balefwaya, tatemenwe bacintomfwa, aba bumbimunda, na bali ne mibele iimbi iyabipa kabili alekalipila na balecita ifi. (Mateo 23:13) Atile: “Uucita ifyabipa apata ulubuuto [icine].”—Yohane 3:20.

Umutumwa Paulo atile: “Patisheni icabipa, ikatisheni icisuma.” (Abena Roma 12:9) Paulo alipatile icabipa. Ku ca kumwenako, ilyo amwene ukuti Abena Kristu bamo abaYuda baleitalusha ku Bena Kristu abashali abaYuda, Paulo alibebeelepo nangu ca kuti na o ali mu Yuda. (Abena Galatia 2:11-14) Alishibe ukuti Lesa, ‘uushaba na kapaatulula,’ tafwaya ababomfi bakwe baleipatula ku bantu banabo pa mulandu wa mushobo.—Imilimo 10:34.

Ba Nte balakonka sana ifyo Baibolo ilanda. (Esaya 33:22) Ici calenga belatekelesha abacita ifyabipa. Ababa mu cilonganino ca Bwina Kristu icasanguluka tabalingile ukuleka abantu abashikonka amafunde ya kwa Lesa ukukowesha icilonganino. Ici e calenga ba Nte baleumfwila ifyo Baibolo ilanda. Itila: “Fumyeni mwi bumba lyenu imbifi iyo.”—1 Abena Korinti 5:11-13.

“Mwe batemwa Yehova, pateni ifyabipa.”—Amalumbo 97:10.

IFYO ABENGI BALANDA

Tukatwalilila fye ukucita ifyabipa pantu tuli babembu.

IFYO BAILBOLO ILANDA

Kasesema Habakuki apepele kuli Yehova Lesa ati: ‘Cinshi mulolesha fye pa bucushi? Kabili cinshi ico ukupokolola ifipe no bunkalwe fyabela pa ntanshi yandi, kabili cinshi ukuumana kwaimina, kabili cinshi ifikansa ficitilwa?’ (Habakuki 1:3) Apo Lesa talefwaya kasesema Habakuki ukutwalilila ukusakamikwa, amwebele ukuti akapingula ababifi, kabili Lesa alilanda pali ubu ubupingushi ukuti: ‘Ukwisa bukesa. Tabwakacelwe.’—Habakuki 2:3.

Pali ino nshita, ababifi kuti baleka ukucita ifyabipa nga balefwaya. Baibolo itila: “‘Bushe ndasekela mu mfwa ya mubifi?’ e fyasosa Shikulu Mulopwe Yehova. ‘Bushe nshisekela mu kuti umubifi aleke imibele yakwe, no kuba no mweo?’” (Esekiele 18:23) Bonse abomfwila Yehova e lyo baleka ukucita ifyabipa, balacetekela ukuti bakekala umuyayaya. Pa Amapinda 1:33 patila: “Uumfwa kuli ine, akekala umutelelwe no kwikala umutende ukwabula ukutiina ububi.”

“Pashala fye panono no mubifi takabepo . . . Abafuuka e bakekala mu calo, kabili bakasekelela nga nshi pantu umutende ukafula.” —Amalumbo 37:10, 11.