1. Bushe tulingile ukulamona shani icitetekelo?

ICITETEKELO calicindama sana, lelo te bantu bonse abacikwata. (2 Tes. 3:2) Lelo Yehova ‘alipeela’ bakapepa bakwe bonse icitetekelo. (Rom. 12:3; Gal. 5:22) Kanshi bonse abakwata icitetekelo balingile ukulatasha sana.

2, 3. (a) Mapaalo nshi ayo uwaba ne citetekelo engakwata? (b) Mepusho nshi ayo twalalandapo?

² Yesu Kristu atile Wishi wa ku muulu alakulila abantu kuli ena ukupitila mu Mwana wakwe. (Yoh. 6:44, 65) Nga twatetekela Yesu, imembu shesu kuti shaelelwa. Ici cilalenga twaba ifibusa fya kwa Yehova umuyayaya. (Rom. 6:23) Yehova alitulanga sana icikuuku! Apo tuli babembu, twalingile fye ukupingwilwa ukufwa. (Amalu. 103:10) Lelo Yehova alimwene ukutila kuti twacita ifisuma. Pa mulandu wa cikuuku cakwe, alilenga twaumfwa imbila nsuma. E ico tulacita ifilanga ukuti twalitetekela Yesu pantu tulafwaya ukwikala umuyayaya.—Belengeni 1 Yohane 4:9, 10.

 ³ Bushe icitetekelo e cinshi? Bushe icitetekelo kwishiba fye ifintu ifyo Lesa atulaya? Ni mwi mumbi umo twingalangila ukuti twalikwata icitetekelo?

4. Londololeni ico icitetekelo cacilila pa kwishiba fye ubufwayo bwa kwa Lesa.

⁴ Icitetekelo te kwishiba fye ubufwayo bwa kwa Lesa. Icitetekelo e cilenga umuntu alacita ifintu ukulingana no kufwaya kwa kwa Lesa. Na kabili ukuba ne citetekelo mwi lambo lya cilubula ico Lesa atupeela kulalenga umuntu alaebako bambi imbila nsuma. Paulo atile: “Ukapusuka nga waisosela pa cintubwingi ici ‘cebo ku kanwa kobe,’ auti Yesu e Shikulu, kabili watetekela mu mutima obe ukuti Lesa amwimishe ku bafwa. Pantu ku mutima e ko umuntu atetekela no kulungamikwa, lelo ku kanwa e ko aisosela umwine no kupusuka.”—Rom. 10:9, 10; 2 Kor. 4:13.

5. Mulandu nshi icitetekelo cacindamina, kabili kuti twacita shani pa kuti citwalilile ukuba icakosa? Langilileni.

⁵ Ukwabula no kutwishika, nga twaba ne citetekelo e lyo twatwalilila no kucikosha tukekala umuyayaya mwi sonde lipya ilya kwa Lesa. Nga filya fine icimenwa cikabila ukulacitapilila e fyo tulingile ukulacita pa kuti icitetekelo cilekoselako. Icimenwa calipusana ne luba lya kupanga fye pantu cena cilatwalilila ukukula. Icimenwa nangu cimoneke bwino shani kuti cauma nga taciletapililwa, e fyo cingaba na ku citetekelo cesu. Kuti capwa nga tatucibikileko amano. (Luka 22:32; Heb. 3:12) Nga twabika amano ku citetekelo cesu, cikatwalilila ukuba icakosa, ‘cikalakulilako,’ kabili tukaba “abashinenuka mu citetekelo.”—2 Tes. 1:3; Tito 2:2.

6. Bushe ilembo lya AbaHebere 11:1 lilondolola shani icitetekelo?

⁶ Pa AbaHebere 11:1 e po Baibolo yalondolola umo icitetekelo calola. (Belengeni.) Mu citetekelo mwaba ifintu fibili ifyo tushingamona na menso: (1) “Ifintu tulesubila.” Mu fintu tusubila mwaba ifikacitika ku ntanshi ifyo Lesa atulaya lelo ifishilacitika, pamo nga isonde lipya no kufumishiwapo kwa bubifi bonse. (2) “Ifintu nangu tafilamoneka, fya cine cine.” Pali ili lembo, ishiwi lya ciGriki ilyo bapilibula ukuti “e bushininkisho” lilosha ku bushininkisho bwa fintu ifishimoneka lelo ifya cine cine pamo nga Yehova Lesa, Yesu Kristu, bamalaika, e lyo no Bufumu bwa ku muulu. (Heb. 11:3) Finshi tulingile ukucita pa kulanga ukuti isubilo twakwata lya cine cine no kuti twalicetekela ifintu ifishimoneka ifyo Icebo ca kwa Lesa calandapo? Tufwile ukulalanda no kulacita ifilanga ukuti twalikwata icitetekelo.

7. Bushe ifyo Noa acitile fitwafwa shani ukwishiba umo ukuba ne citetekelo kwalola? (Moneni icikope pa ntendekelo ya cino cipande.)

⁷ Pa AbaHebere 11:7 palanda pa citetekelo ico Noa akwete, “ilyo asokelwe kuli Lesa pa fintu ifyali tafilamoneka, [alangile] ukuti alatiina Lesa no kukuula icibwato pa kuti apusushe aba mu ng’anda yakwe.” Noa alilangile ukuti ali ne citetekelo ilyo akuulile icibwato icikalamba nga nshi. Ukwabula no kutwishika, abena mupalamano bakwe bafwile balemwipusha ico alepangila icintu icishaikulila ifi. Bushe Noa alibebeleko umulandu alekuulila icibwato nelyo abalekele fye? Icitetekelo akwete calengele ashipe no kubeba pa bupingushi ubo Lesa ali no kuleta pali bena. Noa afwile aleeba abantu amashiwi yalya yene fye  Yehova amwebele, aya kuti: “Nimona ukuti inshita naifika iya konaula abantunse bonse, pantu pe sonde napafula ubunkalwe pa mulandu wabo . . . Nalaleta ilyeshi pe sonde ku konaula ifya mweo fyonse umuli amaka ya bumi mwi samba lya muulu. Conse ica pe sonde cikaleka umweo.” Na kabili Noa afwile alelondolwela abantu ukuti Lesa amwebele ukuti balingile ‘ukanina mu cibwato,’ pa kuti bakapusuke. Kanshi Noa ali ne citetekelo pantu ‘aleshimikila abantu pa fyalungama.’—Ukute. 6:13, 17, 18; 2 Pet. 2:5.

8. Bushe umusambi Yakobo alondolwele shani umo ukuba ne citetekelo kwalola?

⁸ Ibuuku lya kwa Yakobo nalimo lyalembelwe pa numa umutumwa Paulo apwishishe ukulemba ibuuku lya AbaHebere. Nga filya Paulo alondololwele, Yakobo na o alilondolwele ukuti icitetekelo te kusumina fye mu fintu fimo; lelo tulingile no kucita ifilanga ukuti twalikwata icitetekelo. Yakobo alembele ati: “Unange icitetekelo cobe ukwabula imilimo, na ine ndekulanga icitetekelo candi ku milimo yandi iisuma.” (Yako. 2:18) Yakobo alondolwele ubupusano bwaba pa kusumina fye muli fimo e lyo na pa kulanga ukuti twalikwata icitetekelo. Atile, ifibanda fyalisumina ukuti Lesa e ko aba, lelo tafyakwata icitetekelo. Ficita ifintu ifilanga ukuti tafifwaya ubufwayo bwa kwa Lesa bukafikilishiwe.  (Yako. 2:19, 20) Lelo ilyo Yakobo alandile pa muntu uwaliko ku kale uwali ne citetekelo, atile: “Bushe Abrahamu shifwe talungamikilwe ku milimo yakwe iisuma ilyo atuulile umwana wakwe Isaki pa ciipailo? Mwamona kanshi ukuti icitetekelo cakwe cali ne milimo kabili imilimo yakwe iisuma e yalengele icitetekelo cakwe ukupwililika.” Lyena pa kulanga ukuti ifyo tucita e filanga nampo nga twalikwata icitetekelo nelyo iyo, Yakobo atile: “Filya fine umubili uwabula umupashi wafwa, e fyo ne citetekelo icabula imilimo cafwa.”—Yako. 2:21-23, 26.

9, 10. Bushe umutumwa Yohane atwafwa shani ukwishiba ifyo cacindamina ukuba ne citetekelo?

⁹ Pa numa ya myaka ukucila pali 30, umutumwa Yohane alembele ibuuku lya Mbila Nsuma e lyo na makalata yatatu. Bushe Yohane na o alishibe bwino ifyo citetekelo cacindama? Pali bonse abalembeko Baibolo, Yohane e wabomfeshe sana ishiwi lya ciGriki ilyo limo bapilibula ukuti ‘ukutetekela.’

¹⁰ Ku ca kumwenako, Yohane alondolwele ati: “Uutetekela Umwana aba no mweo wa muyayaya; uushumfwila Mwana takabe no mweo, lelo ubukali bwa kwa Lesa bwaikala pali ena.” (Yoh. 3:36) Mu citetekelo mwaba no kucita ifilanga ukuti tulakonka ifyo Yesu atweba. Ilingi line, Yohane aleambula amashiwi ayo Yesu alandile ayalanga ukuti tulingile ukutwalilila fye ukucita ifilanga ukuti twalikwata icitetekelo.—Yoh. 3:16; 6:29, 40; 11:25, 26; 14:1, 12.

11. Finshi tulingile ukulacita pa kuti tulelanga ukuti tulatasha pa kwishiba icine?

¹¹ Tulatasha Yehova pa kubomfya umupashi wakwe uwa mushilo ukutusokolwela icine no kutulenga twatetekela imbila nsuma! (Belengeni Luka 10:21.) Tufwile ukulatasha Yehova lyonse pa kutupalamika kuli ena ukupitila mu Mwana wakwe, “Intungulushi iikalamba kabili uulenga icitetekelo cesu ukupwililika.” (Heb. 12:2) Pa kuti tulelanga ukuti tulatasha pa cikuuku ca kwa Lesa, tulingile ukutwalilila ukukosha icitetekelo cesu ukupitila mu kuisambilisha Icebo ca kwa Lesa ne pepo.—Efes. 6:18; 1 Pet. 2:2.

12. Ni mu nshila nshi twingalangila ukuti twaliba ne citetekelo?

¹² Tulingile ukutwalilila ukuba ne citetekelo mu fyo Yehova atulaya. Tufwile ukulacita ifintu ifilanga ukuti twalikwata icitetekelo. Ku ca kumwenako, tulingile ukulabila pa Bufumu bwa kwa Lesa no kulabombako umulimo wa kulenga abantu ukuba abasambi. Na kabili tulingile ukulacita “ifisuma kuli bonse, lelo maka maka ku batetekela banensu.” (Gal. 6:10) Tulabombesha ‘ukufuula ubuntu bwa kale pamo ne micitile ya buko,’ kabili tatucita ifingalenga bucibusa bwesu na Yehova bwaonaika.—Kol. 3:5, 8-10.

13. (a) Bushe “icitetekelo muli Lesa” cacindama shani? (b) Kuti twapashanya icitetekelo kuli cinshi, kabili mulandu nshi?

¹³ Baibolo itila: “Ukwabula icitetekelo te kuti tusekeshe Lesa, pantu uupalamina kuli Lesa afwile ukusumina ukuti e ko aba no kuti alalambula abamufwaisha.” (Heb. 11:6) Baibolo ilondolola “icitetekelo muli Lesa” ukuti caba pa “masambililo ya kutendekelako” ayo uulefwaya ukuba Umwina Kristu alingile ukwishiba. (Heb. 6:1) Abena Kristu nga bakwata icitetekelo balingile “ukulundako” imibele iisuma pa kuti ‘bekalilile mu kutemwa kwa kwa Lesa.’—Belengeni 2 Petro 1:5-7; Yuda 20, 21.

14, 15. Mulandu nshi tulingile ukubela no kutemwa ukucila ukuba fye ne citetekelo?

 ¹⁴ Pa kulanga ukuti icitetekelo calicindama sana, abalembele Baibolo balilembele pa citetekelo imiku iingi nga nshi. Takwaba imibele imbi iyo balandilepo sana ukucila pa citetekelo. Bushe ici cilepilibula ukuti icitetekelo calicindama sana ukucila pa mibele yonse iyo Umwina Kristu alingile ukukwata?

¹⁵ Paulo alilingenye icitetekelo no kutemwa, atile: “Nga nalikwate citetekelo cakosa ica kuti kuti nasesha ne mpili, lelo ukutemwa nshakwata, ninshi tapali ico ndi.” (1 Kor. 13:2) Yesu alangile ukuti calindama sana ukutemwa Lesa ilyo aleyasuka icipusho bamwipwishe ica kuti: “Lifunde nshi ilikalamba mu Mafunde yonse?” (Mat. 22:35-40) Mu kutemwa mwaliba imibele iisuma iingi, ukubikako fye ne citetekelo. Baibolo itila: “Ukutemwa . . . kusumina fyonse.” Kabili kulalenga twacetekela ifyo Lesa atweba mu Cebo cakwe.—1 Kor. 13:4, 7.

16, 17. Cinshi cilanga ukuti icitetekelo no kutemwa fyalicindama sana, lelo pali ifi fibili ni cili kwi icacilapo ukucindama, kabili mulandu nshi?

¹⁶ Pa mulandu wa kuti icitetekelo no kutemwa fyalicindama sana, abalembele Baibolo balilandile pali iyi mibele imiku iingi, ilingi line baleilemba muli sentensi imo ine. Paulo akoseleshe Abena Kristu banankwe “ukufwala ica kucinga icifuba ica citetekelo kabili ica kutemwa.” (1 Tes. 5:8) Petro alembele ati: “Nangu ca kuti tamwamumwene [Yesu], mwalimutemwa. Nangu tamumumona pali nomba, mulamutetekela.” (1 Pet. 1:8) Yakobo aipwishe abasubwa banankwe ati: “Bushe Lesa tasalile abo ici calo cimona ukuti bapiina pa kuti babe abakankaala mu citetekelo kabili impyani sha bufumu, ubo alaile abamutemwa?” (Yako. 2:5) Yohane alembele ati: “Ifunde lyakwe [Lesa] lya kuti, tutetekele ishina lya Mwana wakwe Yesu Kristu no kuti tutemwane, ifyo atwebele.”—1 Yoh. 3:23.

¹⁷ Nangu ca kuti icitetekelo calicindama, cikapwa ilyo Lesa akafikilisha ifyo atulaya e lyo na lintu ifyo tusubila fikacitika. Lelo tatwakaleke ukutemwa Lesa na banensu. E co Paulo alembeele ati: “Awe, nomba, kwashala icitetekelo, isubilo, ukutemwa, ifi fitatu; lelo icacilapo pali ifi fyonse kutemwa.”—1 Kor. 13:13.

18, 19. Finshi filanga ukuti Abena Kristu muno nshiku baliba ne citetekelo, kabili nani tulingile ukutasha?

¹⁸ Muno nshiku, abantu ba kwa Yehova balacita ifilanga ukuti balikwata icitetekelo mu Bufumu ubo Lesa abikako. Ne ci calilenga ukuti abantu ukucila pali 8 milioni mwi sonde lyonse babe muli paradaise ya ku mupashi. Ababa muli iyi paradaise balikwata ifisabo fya mupashi. (Gal. 5:22, 23) Ala ubu bushininkisho bwa cine cine ubulanga ukuti Abena Kristu baliba ne citetekelo no kutemwa!

¹⁹ Lesa e ulenga ukuti ifi ficitike te muntu iyo. Uyu mulimo ulalenga “Yehova ukulumbuka no kuba icishibilo ca muyayaya icishakaputulwe.” (Esa. 55:13) Ukwabula no kutwishika “bupe fye bwa kwa Lesa” ukuti tukapusukile mu citetekelo. (Efes. 2:8) Paradaise ya ku mupashi ikatwalilila fye ukukula kabili ikalawaminako fye mpaka mwi sonde lyonse mukabe abantu abapwililika, abalungama, kabili aba nsansa pa kuti ishina lya kwa Yehova likalumbanishiwe umuyayaya. Natutwalilile ukutetekela ifyo Yehova atulaya!