ABAPANGA ifintu balapapa nga bamona ifyo akanyelele kemya ifintu ifyafina sana ukukacila. Pa kuti beshibe bwino ifyo utunyelele tucita pa kwimya ifintu ifyafina, abapanga ifintu ababomba pa Ohio State University, aba ku America, balipangile akanyelele pa kompyuta. Pa ku kapanga babomfeshe imyengelele ya kasuba kabili aka akanyelele kalecita filya fine fye akanyelele kacita nga nakasenda ifintu.

Cimo icilenga akanyelele kaleimya ifintu ifyafina nga nshi, fintu umukoshi wapangwa. Umukoshi wa kanyelele walikwata inkanda iyanakilila iyikatanya inkanda iyakosa iya ku mutwe e lyo ne ya ku mubili kwati ni filya iminwe ikatana. Umo pa balefwailisha atile: “Ifi umukoshi wakwata inkanda iyanakilila ne fyo ikatanya umubili no mutwe e filenga sana kaleimya ifintu ifyafina ukwabula ubwafya.” Abafwailisha pa fintu balanda ukuti nga baishiba bwino ifyo umukoshi wa kanyelele ubomba, kuti balapanga amaroboti ayasuma.

Muletipo shani? Bushe ifi akanyelele kakwata umukoshi uubomba bwino, kuti twatila kaishilebako fye akeene nelyo kwali uwakapangile?