PALI ino inshita kwaliba indimi nalimo 7,000, kabili ici calilenga cileyafya sana abantu ukulalanshanya mu fya makwebo, mu masambililo, mu mabuteko e lyo na lintu abantu baletandala. Ubu ubwafya kale bwatendeke. Ku ca kumwenako, mu 475 B.C.E., ilyo Imfumu Ahasuerusi (nalimo uo baleita no kuti Xerxes I) yaleteka, ubuteko bwa bena Persia bwalitumine amakalata ukufuma “ku India ukuyafika ku Etiopia, ifitungu fya bulashi 127, ku citungu ca bulashi cimo na cimo mu musango wa ciko uwa milembele kabili ku bantu na bantu mu lulimi lwabo.” *

Muno nshiku, utubungwe utwingi e lyo na mabuteko ayengi te kuti beshe no kwesha ukucita ica musango uyu. Na lyo line, Inte sha kwa Yehova bena balasabankanya magazini, amavidio, ifitabo ifingi na maBaibolo mu ndimi ukucila pali 750. Pali ishi indimi paliba ne ndimi 80 isha bankomamatwi. Inte sha kwa Yehova balapilibula impapulo na mu filembo fya mpofu.

Ne cacilapo ca kuti, Inte sha kwa Yehova tabapangilapo indalama pa kupilibula ishi impapulo. Na kuba, abapilibula ishi impapulo e lyo na bantu ababomba imilimo imbi tabafola. Cinshi cilenga balepilibula impapulo mu ndimi shafula ifi, kabili bushe babomba shani uyu umulimo?