Tu Pollia Berry, tumena ku cimenwa icaba mu Africa ico beta ukuti Pollia condensata, kabili ilangi lya blu ilyo twakwata lyalibeeka ukucila amalangi yaba mu fimenwa fimbi. Na lyo line, utu utusabo tatukwata kemiko iilenga tukwate ili ilangi. Nomba cinshi cilenga tu Pollia berry tukwate ili ilangi ilyabeeka?

Tontonkanyeni pali ici: Icipaapa ca utu tusabo calikwata ututambo utunono sana utwatantama kwati tumuti twa macisa mu cifwambo. Utu ututambo twalipampikana. Utuba pa muulu, tumoneka kwati twambiile mupepi napapelele utuli pa nshi, ne ci cilenga tulemoneka filya insoka imoneka nga naipombana. Utu ututambo te twa blu, lelo ifyo twapampikana e filenga tulemoneka blu. E ico, ifyo ututambo utwaba mu cipaapa twapampikana e filenga utu utusabo tukwate ilangi ilyabeeka. Utupimfya utwingi utuba mu cipaapa ca tu Pollia berry tumoneka blu, lelo nga mwatulolekesesha ku lubali lumbi, tumoneka katapakatapa, limo tumoneka pinki, e lyo limo kuti twamoneka utwa mutuntula. Na lyo line, nga mwalolekesha utuba mu cipaapa, tatukwata fye ilangi limo, lelo tukwata amalangi ayashimoneka bwino bwino, nga filya amalangi ya fintu yashimoneka bwino bwino nga mwakusha sana icintu icili pa kompyuta.

Apo tu Pollia berry tatwakwata kemiko iilenga tulemoneka blu, nga twalukuta tulatwalilila fye ukumoneka blu. Na kuba, tu Pollia berry tumo uto batoleele imyaka 100 iyapitapo tucili tumoneka fye utwabeeka kwati e lyo batusaba. Abafwailisha pa fintu batila tulamoneka bwino ica kuti ifyuni filafwaya ukutulya nangu ca kuti twalikosa kabili tatwakwata icili conse ico utuni twingalya.

Basayantisti balanda ukuti ifi tu Pollia berry twakwata ilangi ilishibutuluka, abantu kuti basambililako ifya kupanga ifintu ifishibutulukila nga bafibomfya pa nshita iitali.

Muletipo shani? Bushe ilangi lya blu ilyabeeka ilya ka Pollia berry lyaishilebako fye, nangu kwali uwalipangile?