Ukutula fye apo abumbile abantu, Kabumba alelanda nabo ukubomfya bamalaika e lyo na bakasesema. Na kabili, alilengele abantu balemba amashiwi yakwe ne fyo atulaya. Lesa alitulaya ukuti tukalaikala bwino ku ntanshi. Nomba ni kwisa twingasanga ifyo Lesa atulaya?

Amashiwi ya kwa Lesa yaba mu Malembo ya Mushilo. (2 Timote 3:16) Bushe Lesa abomfeshe shani bakasesema pa kulemba amashiwi yakwe? (2 Petro 1:21) Lesa alengele abalelemba Amalembo ya Mushilo ukwishiba amatontonkanyo yakwe no kuyalemba. Cali kwati ni filya shimakwebo engeba umubomfi wakwe ukumulembelako kalata. Nangu ca kuti uulembele kalata mubomfi wakwe, ilya kalata ya kwa shimakwebo. Kanshi nangu ca kuti Lesa abomfeshe abantu pa kulemba amashiwi yakwe, e mwine wa Malembo ya Mushilo.

Amalembo ya Mushilo yalicindama sana ica kuti Lesa afwaya abantu bonse ukuyabelenga no kuyeshiba. Pali ino inshita “imbila nsuma ya muyayaya” ilabilwa “ku nko shonse na ku mitundu yonse na ku ba ndimi shonse na ku bantu bonse.” (Ukusokolola 14:6) Lesa alilenga Amalembo ya Mushilo ukupilibulwa mu ndimi ukucila pali 3,000, kabili takwaba icitabo ico bapilibula mu ndimi shafula ifi.