Ifi nga fyacitika, aba mu cilonganino balingile ukulamona icupo cakwe ica kale ukuti capwile ilyo aupile umuntu umbi, kabili bafwile ukulamona icupo cakwe icipya ukuti ca mwi funde. Pa kuti tumfwikishe umulandu twalandila ifi, natulande pa fyo Yesu alandile pa kulekana e lyo no kuupa nelyo ukuupwa na kabili.

Ukulingana na mashiwi yaba pali Mateo 19:9 Yesu alilandile umulandu wa mu Malembo uo icupo cifwile ukupwilapo. Atile: “Onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.” Ku fyo Yesu alandile, tusambililako ukuti (1) ubulalelale e mulandu fye wa mu Malembo uo icupo cingapwilapo na (2) nga ca kuti umulume aleka umukashi wakwe apabula uyu mulandu wa mu Malembo kabili aupa na umbi ninshi nacita ubucende. *

Bushe Yesu aloseshe mu kuti umulume uwacita ubucende kabili uwaleka umukashi wakwe muntungwa ukuupa na kabili ukulingana na Malembo? Awe te mo aloseshe. Nga ca kuti umulume acita ubucende, umukashi uwa kaele e ufwile ukupingulapo nampo nga alamweleela nelyo iyo. Umukashi nga akaana ukumweleela kabili apingulapo ukuti balekane, ninshi bonse babili bantungwa ukuupa nelyo ukuupwa na kabili pa numa ya kupwisha icupo cabo ukulingana ne funde.

Lelo limo umukashi kuti afwaisha ukutwalilila ukuba mu cupo kabili kuti asumina no kweleela umulume wakwe. Nomba, inga ca kuti umulume uwacitile ubucende akaana ukuti batwalilile ukwikala no mukashi wakwe uulefwaya ukumweleela kabili asalapo no kupwisha icupo? Apo umukashi naitemenwa ukweleela umulume wakwe kabili talefwaya ukuti balekane, ninshi umulume takwete ubuntungwa bwa mu Malembo ubwa kuupa na kabili. Nga ca kuti apingulapo ukuupa umwanakashi umbi libe ninshi takwete ubuntungwa bwa mu Malembo ubwa kuupa, ninshi acita ubucende na kabili. Baeluda bafwile ukumupangila komiti ya bupingushi na kabili iifwile ukubombela pa lubembu acitile.—1 Kor. 5:1, 2; 6:9, 10.

Nga ca kuti umwaume uushakwata ubuntungwa bwa mu Malembo aupa na kabili, bushe aba mu cilonganino bafwile ukulamona shani icupo cakwe ica kale e lyo ne cupo cakwe icipya? Bushe ukulingana na Baibolo, kuti twatila icupo cakwe ica kale tacapwa? Bushe umukashi uwa kaele kuti apingulapo ukweleela nelyo ukukaana umulume wakwe? Bushe aba mu cilonganino bafwile ukulamona icupo icipya ukuti cupo ca bucende?

Kale twaishibe ukuti aba mu cilonganino bafwile ukulamona icupo icipya ukuti cupo ca bucende nga ca kuti umukashi wakwe uwa kaele acili uwa mweo, taupwa kabili tacitapo ubulalelale. Na lyo line, ilyo Yesu alelanda pa kulekana e lyo no kuupa na kabili, talandilepo pa mukashi nelyo umulume uwa kaele. Lelo alandile  fye ukuti umulume uwaleka umwina mwakwe apashili umulandu wa mu Malembo kabili aupa umbi ninshi acita ubucende. Yesu alingenye ukulekana e lyo no kuupa na kabili ku kucita ubucende, kabili ubucende e bulenga icupo ica kale ukupwa.

Nga ca kuti icupo capwa pa mulandu wa kuti umulume aleka umukashi wakwe kabili aupa na umbi, umukashi uwa kaele takwete insambu sha kweleela nelyo ukukaana uwali umulume wakwe. Kanshi tafwile no kulatontonkanya nampo nga afwile ukweleela uwali umulume wakwe nelyo iyo. Na kabili aba mu cilonganino tabafwile ukulamona icupo icipya ukuti cupo ca bucende pa mulandu wa kuti umukashi uwa kaele acili uwa mweo, taupwa kabili tacitapo ubulalelale. *

Muli fi twalandapo, umulume alicitile ubucende ubwalengele ukuti icupo cipwe. Nomba tutile umulume tacitile ubucende, lelo alekele fye umukashi wakwe e lyo ayaupa umbi. Nelyo ilyo ali no mwina mwakwe tacitile ubucende, lelo acitile ubucende pa numa ya kumuleka aupa na umbi nangu ca kuti umwina mwakwe ali-itemenwe ukumweleela. Muli ifi twalandapo, umulume nga ca kuti aleka umukashi e lyo aupa na umbi ninshi nacita ubucende kabili ubucende nabupwisha icupo cakwe ica kale. Na lyo line, icupo ca mulume icipya ca mwi funde. Ulupungu lwa kwa Kalinda ulwa August 15, 1980 ibula 24 lwalandile pali ici cishinka ukuti: “Nomba naingila mu cupo cipya kabili e co te kuti acipwishe fye no kubwelela ku nshila intu ifintu fyabelelemo akatanshi; icupo ca kale capwile mu kuba no kulekana, ubucende no kuupa cipya cipya.”

Ifi twa-aluka mu fyo twaishibe kale, tacilepilibula ukuti Abena Kristu bafwile ukumona ukuti icupo te ca mushilo nelyo ukumona ukuti ukucita ubucende te lubembu ulukalamba sana. Nga ca kuti umulume aleka umwina mwakwe apabula umulandu wa mu Malembo kabili aupa no muntu umbi nangu ca kuti takwete ubuntungwa bwa mu Malembo ubwa kucitila ifyo, baeluda bafwile ukumupangila komiti ya bupingushi pantu ninshi nacita ubucende. (Nga ca kuti uo opile ni nkashi na o wine bafwile ukumupangila komiti ya bupingushi pantu ninshi nacita ubucende.) Nangu ca kuti aba mu cilonganino tabakalecimona ukuti cupo ca bucende, umulume te kuti afikepo ukubomba imilimo iyaibela mu cilonganino pa myaka iingi, ukufikila abantu baleka ukumfwa ububi pa fyo acitile kabili bamucindika no kumucindika. Ilyo baeluda balemona nampo nga kumupeela imilimo nelyo iyo, bafwile ukutontonkanya pa mwina mwakwe uwa kubalilapo uo apondokele e lyo na pa bana abo nalimo alekelesha.—Mal. 2:14-16.

Pa mulandu ne ficitika nga ca kuti umo aleka umwina mwakwe apabula umulandu wa mu Malembo no kuupa umbi, Abena Kristu bafwile ukutontonkanya pa fifumamo nga bacita ifi, kabili ukutontonkanya pali ifi kuti kwalenga balamona icupo ukuti ca mushilo icine cine.—Luk. Mil. 5:4, 5; Heb. 13:4.