Ububumbo Bwa Kwa Yehova Ubwapesha Amano

“Ifyo Yafule Milimo iyo Mwacita, mwe Yehova!”

NAMPO nga twikala ku mushi nelyo mu tauni, nampo nga ni mu mpili nelyo mupepi na bemba, twashingulukwa no bubumbo bwa kwa Yehova ubwa kutiinya. Kanshi nacilinga sana ukuti muli 2004 Kalenda wa Nte sha kwa Yehova mube ifikope fisuma ifya milimo ya kwa Yehova Lesa iya kupapusha.

Abantu abatasha balipoosako amano ku milimo ya kwa Lesa. Ku ca kumwenako, tontonkanyeni pali Solomone, uo amano ‘yafulile ukucila amano ya bena Kabanga bonse.’ Baibolo itila: “Asosele ulwa miti, ukutula pa mukedari uuli mu Lebanone ukufika pali esobu uumena mu cibumba; kabili asosele ulwa nama, ne fyuni, ne fikulika, na masabi.” (1 Ishamfumu 4:30, 33) Imfumu Davidi, wishi wa kwa Solomone, lyonse yale-etetula pa bubumbo bwa kwa Lesa. E mulandu wine yasosele kuli Kalenga wa iko, aiti: “Ifyo yafule milimo iyo mwacita, mwe Yehova! fyonse ifyo mu mano e mo mwaficitila; pano isonde paisulapo ifibumbwa fyenu.”—Amalumbo 104:24. *

Na ifwe bene tufwile ukulalolekesha no kwetetula pa bubumbo. Ku ca kumwenako, kuti ‘twainwina amenso yesu mu muulu’ no kwipusha atuti: “Nani uwalengele intanda ishi?” Ala, ni Yehova Lesa, untu “afulisho kukosa” kabili uwakwatisha “amaka ayengi”!—Esaya 40:26.

Bushe ukwetetula pa bubumbo bwa kwa Yehova kuti kwalenga twacita cinshi? Kuti kwalenga twacita ifintu nalimo fitatu. (1) Kuti kwalenga twalatentemba ubumi bwesu, (2) kulalenga twalayafwa bambi ukusambilila ku bubumbo, na (3) kulatucincisha ukulaishibilako Kabumba wesu no kulamutasha sana.

Ubumi bwesu fwe bantu bwalicila sana ubwa “nama ishishaba na mano,” kabili ici cilenga ukuti tulebebeta no kutasha ifipapwa fya bubumbo. (2 Petro 2:12) Amenso yesu yalamona ifyo isonde lyayemba. Amatwi yesu yalomfwa inyimbo shisuma isha fyuni. Kabili ukwishiba inshita ne cifulo tuliko kulenga twakwata ifya kwibukisha. Mwandini tulaipakisha ukuba abomi nangu ca kuti pali nomba ubumi bwesu tabwapwililika!

Abafyashi kuti baipakisha ukumona ifyo abana batemwa ububumbo. Mwandini abana balatemwa nga nshi ukwikata ifipaaso, ukwangasha inama, no kunina ku miti! Abafyashi bafwile ukwafwa abana babo ukwishiba ifyo ububumbo bwayampana na Kabumba. Akatiina no mucinshi ku bubumbo bwa kwa Yehova ifyo abana balundulula ku bwaice kuti balefitontonkanyapo mu bumi bwabo bonse.—Amalumbo 111:2, 10.

Kuti twaba impelwa mano ishine shine nga ca kuti tulemona fye ububumbo e lyo twafilwa ukutasha Kabumba. Ukusesema kwa kwa Esaya  kulatwafwa ukwetetula pali ici cishinka ilyo kutila: “Bushe tawaishiba, napamo tawaumfwa, ukuti, Yehova ni Lesa wa muyayaya, Kalenga wa mpela sha pano isonde? Tapomponteka, kabili tafunshika, takuli ukulengulwa ku mucetekanya wakwe.”—Esaya 40:28.

Ca cine, imilimo ya kwa Yehova yaba bushininkisho bwa kuti alikwatisha amano, wa maka yonse, kabili alitutemwa nga nshi. Ilyo twamona ububumbo bwayemba ubwaba muli lino isonde no kwishiba imibele ya kwa Kabumba, shi natusose nge fyasosele Davidi, uwatile: “Tapali uwaba nga imwe . . . , mwe [Yehova], kabili tapali iyaba nge milimo yenu.”—Amalumbo 86:8.

Kuti twashininkisha ukuti abantunse bacumfwila bakatwalilila ukutemwa ububumbo bwa kwa Yehova. Tukatwalilila ukulasambilila pali Yehova ku ciyayaya. (Lukala Milandu 3:11) Kabili tukacililako ukutemwa Kabumba wesu nga twasambilila ifingi pali wena.

[Futunoti]

[Akabokoshi pe bula 9]

Ifyo Kabumba Alumbanishiwa

Abasoma sayansi abengi abatasha balishiba ukuti Lesa e wabumbile ifintu fyonse. Moneni ifyo bamo bamo balandapo pano:

“Ico ntemwa sana muli sayansi nasambilila, ni lintu nsanga fimo ifipya ifyo nshaishibe no kwiluka ukuti, ‘Kanshi e fyo Lesa acitile ifi.’ Ico mfwaya kumfwikisha akantu akali konse ako Lesa apanga.”—Henry Schaefer, profesa muli chemistry.

“Kumfwa ku calengele ukuti kube Imyulu, icalengele ukuti ikule, cishalila ku ulebelenga ukuitontonkanishisha, lelo nga tatutontonkenye pali Wena [Lesa], tulafilwa ukumfwikisha icalenga kube Imyulu.”—Edward Milne, umwina Britain uwasambilila sana pa maplaneti.

“Twalishiba ukuti ububumbo bulalondololwa bwino sana mu nsamushi shonse pantu Lesa e wa bulengele.”—Alexander Polyakov, umwina Russia uwaishiba sana insamushi.

“Ilyo tulesambilila pa fintu ifyabako ninshi tuletontonkanya pa mano ya kwa Kabumba, ukwishiba bwino imfundo shakwe, no kumfwikisha ifyo ateyanya ifintu fishili fyesu lelo Ifyakwe.”—Louis Agassiz, umwina America uwasambilila sana pa bumi.

[Icikope pe bula 8, 9]

Ifyuni fitwa Gentoo penguin, ku Antarctic Peninsula

[Icikope pe bula 9]

Grand Teton National Park (impanga batengelamo inama), mu Wyoming, ku U.S.A.

[Abatusuminishe]

Icikope ca baJack Hoehn/Index Stock Photography