Abantu Balafwaya Ukuba Abena Lesa

MU LYASHI lya kwa Yesu ilyaishibikwa sana ilyo alandile pa lupili, atile: “Ba nsansa abaibukila ukuti balakabila ifya ku mupashi [nelyo ifya kwa Lesa].” (Mateo 5:3) Nakalimo mulesumina ukuti ifyo Yesu alandile fya cine. Abengi mu calo balafwaya ukuba abena Lesa, kabili batontonkanya ukuti nga baba abena Lesa, bakaba ne nsansa. Nomba bushe umwina Lesa aba shani?

Nangu ca kuti aba mu mipepele yonse batila balishiba ifya kucita pa kuti babe abena Lesa, ifyo balanda ukuti e fyo umuntu afwile ukucita fingi nga nshi, kabili fyafula fye nga filya fine imipepele na yo yafula. Abapepa mu macalici yamo aya Bena Kristu batila umuntu kuti apusuka nga asangwa ku mapepo yabo. BaKatolika na bo basumina ukuti umuntu nga alasangwa ku Minsa ninshi alomfwana na Lesa. AbaBuddha batila nga ca kuti umuntu aleikala no kulatontonkanya sana pa fya mipepele, ninshi akafikapo ukuba umwina Lesa. AbaHindu na bo basumina ukuti umuntu nga talecita ifyabipa, nga afwa takafyalilwe mu cintu cimbi, umweo wakwe ukayaikala mu mutende. Bushe ifyo bonse aba bacita, filabafwa ukuba abena Lesa bene bene? Bushe bonse aba benda mu nshila ingabatwala kuli Lesa?

Abengi kuti batila fyonse ifi tafilenga umuntu ukuba umwina Lesa. Batila umuntu tafwile no kulaya mu kupepa ku calici, afwile fye ukusumina muli Lesa umo ifi. Bambi na bo batila umuntu pa kuba umusuma tafwile no kuya ku calici, batila ubusuma bwa muntu, mutima. We mwine ngo uleumfwa mu mutima obe ukuti tapali icilubene kabili walishiba ne co wabela pano calo, nangu taulepepa ukuli konse, cili fye bwino. Kanshi batila filya fine umutima ulebeba ukucita e fibalenga ukuba abasuma. Umwaume umo alembele ukuti: “Ubwina Lesa bwaba mu kati ka mutima wa muntu. Ni filya we muntu umona abantu bonse e lyo na balya muba na bo, ifyo wabatemwa ne fyo umfwana na bo. Ubwina Lesa tabusangwa mu calici ilili lyonse, nangu mu kusumina amasambilisho ye calici ayali yonse.”

Kanshi abantu batontonkanya ifyapusanapusana ukuti e filenga umuntu ukuba umusuma nelyo umwina Lesa. Kwaba ifitabo ifingi nga nshi ifilanda pa fyo umuntu engaba umwina Lesa, nomba ilingi line ababelenga ifyo fitabo tabasanga ifyo bafwaya, kabili balapelenganishiwa. Lelo kwaliba icitabo cimo icilanda pa fyo mwingeshibilako umwina Lesa wine wine. Ifyaba muli ico citabo filanga ukuti calipuutwamo na Lesa. (2 Timote 3:16) Natuumfwe ifyo ico citabo cilanda pa fyo mwingeshiba umwina Lesa wine wine no mulandu ubwina Lesa bwacindamina. Ne co citabo, ni Baibolo.

 [Abatusuminishe Ukubomfya Icikope pe bula 2]

PA NKUPO: Icikope: © Mark Hamblin/age fotostock