“Insambu sha Mwana Isha Kwishiba Ifya kwa Lesa”

PA 9 December mu 2008, aba mu kabungwe ka ku Sweden akalolekesha pa nsambu sha bana balilongene pa kuti balande pa cintu caibela. Ne ci cintu, ni “Nsambu sha Mwana Isha Kwishiba Ifya kwa Lesa.” Bakalanda abaleimininako icalici lya Church of Sweden, na ba mu mipepele imbi iya batila Bena Kristu, kumo na baShilamu na balolekesha pa fikabila abantu, balilandile ifyalekanalekana pali uyu mulandu.

Pali bakalanda pali na shimapepo uwatile: “Kuti cayafya ukulondolola bwino bwino ifyo amalyashi ya mu Baibolo yafwa abaice ukwishiba ifya kwa Lesa.” Bushe Amalembo yafwa shani abana mu fya kwa Lesa?

Shimapepo atile, “abana kuti babelenga ifyaba mu malembo ya mu Baibolo no kulafitontonkanyapo ilyo bali beka.” Alandile pa “lyashi lya kwa Adamu na Efa, pali Kaini na Abele, pali Sakeo, kasonkesha wa misonko, pa mulumbe wa mwana walubile na pa mwina Samaria musuma.” Asosele no kuti, “aya malyashi e yamo ayengafwa umwana ukutontonkanya pa fintu ifyacindama mu bumi pamo nga ukukanaba no bucenjeshi, ulupato, ububifi, e lyo no kulaelela bambi, ukulomba ubwelelo, ukuwikishanya, no kutemwa aba bwananyina no mutima onse.” Kabili atile: “Muli aya malyashi mwaliba amasambililo yamo ayo umwana engalakonka mu bumi bwakwe ayengamwafwa.”

Ukwabula no kutwishika cisuma ukukoselesha abana ukulabelenga Baibolo. Lelo bushe abana kuti baba na maka ya ‘kutontonkanya’ pa fyo babelenga mu malembo ya mu Baibolo e lyo no kwishiba bwino bwino umo filolele?

Na bakalamba bene pa kumfwikisha ifya mu Malembo, kano kwaba aba kubalondolwela. Ku ca kumwenako, Baibolo yalilandako pa muntu uwafililwe ukumfwikisha fimo ifya kwa Lesa ilyo ‘alebelenga no kutontonkanya’ pa malembo pa lwakwe umwine. Uyu muntu ali mulashi wa ku Etiopia. Alebelenga ukusesema kwa kwa Esaya lelo taumfwile umo kwalolele. Apo alefwaya ukumfwikisha ifyalandile kasesema, alisumine ifyo umusambi Filipi amulondolwelele. (Imil. 8:26-40) Ulya mulashi wa ku Etiopia, te eka fye uwalekabila ukumfwikisha Amalembo. Nangu ca kutila abaice e bakabila sana ukubalondolwela Amalembo, na ifwe bonse tulakabila ukutulondolwela.

Baibolo itusoka ukuti: ‘Ubuwelewele bwakakatila ku mutima wa mwaice.’ (Amapi. 22:15) Abana balinga ukubasambilisha no kubatungulula, kabili abafyashi babo e bapeelwa umulimo wa kubafunda imibele isuma ne fya kwa Lesa ifyo na bo basambilila mu Baibolo na mu cilonganino ca Bwina Kristu. Abana balikwata insambu sha kufundwa pali ifi fintu. Ilyo bacili fye abaice, e lyo mulingile ukutendeka ukubafwa ukwishiba ifya kwa Lesa. Ici e cingalenga baba ‘abakalamba, abo ukupitila mu kubelesha bakwata amano aya kulekanya icalungama ne calubana.’—Heb. 5:14.