Tetekeleni Yehova Ilyo Impela Ilepalama

“Tetekeleni Yehova inshita yonse.”—ESA. 26:4.

1. Bupusano nshi bwaba pa babomfi ba kwa Lesa na bantu ba muli cino calo?

TWIKALA mu calo umo abengi bashaishiba uo bengacetekela nelyo ico bengacetekela, napamo pa mulandu wa kuti abo bacetekele balibakalifyapo imiku iingi nelyo balicitapo ifyo bashaenekele. Ababomfi ba kwa Yehova bena balipusanako icine cine! Apo batungululwa na mano ya kwa Lesa, balishiba bwino bwino ukuti tabafwile ukucetekela “abakankaala” ba pano calo. (Amalu. 146:3) Bena baipeela kuli Yehova kabili e o bacetekela, pantu balishiba ukuti alibatemwa no kuti lyonse alafikilisha Icebo cakwe.—Rom. 3:4; 8:38, 39.

2. Bushe Yoshua alangile shani ukuti Lesa wa cishinka?

² Yoshua alilangile ukuti Lesa wa cishinka. Ku mpela ya bumi bwakwe, aebele abena Israele banankwe ukuti: “Namwishiba bwino ne mitima yenu yonse ne myeo yenu yonse ukuti tapali amashiwi nangu yamo pa mashiwi yonse ayasuma ayo Yehova amwebele ayashacitika. Fyonse fyalicitika. Tapali  nangu cimo icishacitika.”—Yosh. 23:14.

3. Bushe ishina lya kwa Lesa litweba finshi pali ena?

³ Yehova alafikilisha amalayo yakwe, te pa mulandu fye wa kuti alitemwa ababomfi bakwe, lelo na pa mulandu we shina lyakwe. (Ukufu. 3:14; 1 Sam. 12:22) Amashiwi ya ntendekelo muli Baibolo beta ati Emphasized Bible iyo J. B. Rotherham apilibwile yalondolola ukuti ishina lya kwa Lesa lyalola mu kutila, alaba icili conse pa kuti afikilishe amalayo yakwe. Nga twaumfwa ishina lyakwe, twibukisha ukuti alacita fyonse ifyo alanda. Kuti acita ifilekabilwa ukucitwa pa nshita iili yonse na pa cifulo icili conse. Tapali ico engafilwa ukucita. Lesa lyonse acita ifyalingana no bupilibulo bwe shina lyakwe.

4. (a) Cinshi ilembo lya kwa Esaya 26:4 litukoselesha ukucita? (b) Cinshi twalalandapo muli cino cipande?

⁴ Yipusheni amuti: ‘Bushe nalimwishiba bwino Yehova ica kutila kuti namucetekela umupwilapo? Bushe nalikwata isubilo lya kuti ku ntanshi ifintu fikawama apo Lesa wa maka sana?’ Pali Esaya 26:4 patila: “Tetekeleni Yehova inshita yonse, pantu Jah Yehova e Cilibwe ca muyayaya.” Kwena pali ino nshita Lesa tatucingilila mu cisungusho nga filya alecita ku bantu bakwe aba ku kale. Na lyo line apo “Cilibwe ca muyayaya,” kuti twamucetekela “inshita yonse.” Bushe Lesa wesu uwa cishinka afwa shani bakapepa bakwe aba citetekelo muno nshiku? Natulande pa fintu fitatu: Alatukosha nga twamulomba ukutwafwa ukukaana amatunko, alatwafwa nga baletucusha na lintu abantu bashilefwaya ubukombe, kabili alatusansamusha ilyo tuli na masakamika. Tontonkanyeni pa fyo mwingakosha icitetekelo cenu muli Yehova ilyo tulelanda pali ifi fitatu.

Tetekeleni Lesa Ilyo Mwatunkwa

5. Cinshi ico Lesa alanda icishayanguka ukucetekela?

⁵ Calyanguka ukucetekela ukuti Yehova akafikilisha ubulayo bwa kuleta Paradaise nelyo ubwa kubuusha abafwa, pantu ifi fintu e fyo tufwaisha. Lelo tacayanguka ukucetekela no mutima onse ukuti ukukonka amafunde ya kwa Lesa e calungama no kuti ukucite co kukalenga tukakwate sana insansa. Imfumu Solomone yalembele ukuti: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.” (Amapi. 3:5, 6) Solomone alanda pano alanda ati ‘konse uko twenda,’ e lyo alanda na pa “nshila” shesu. Kanshi tulingile ukulanga ukuti twalicetekela Lesa muli fyonse fye ifyo tucita, te kulanga fye ukuti twalicetekela amalayo yakwe. Kuti twalanga shani ukuti twalicetekela Lesa ilyo twatunkwa?

6. Kuti mwacita shani pa kuti mukose mu kulwisha amatontonkanyo yabipa?

⁶ Ukukanacita ifyabipa kutendekela mu matontonkanyo yesu. (Belengeni Abena Roma 8:5; Abena Efese 2:3.) E ico kuti mwacita shani pa kuti mukose mu kulwisha amatontonkanyo  yabipa? Natulande pa fintu fisano: 1. Ukulomba Lesa mwi pepo ukuti aletwafwa. (Mat. 6:9, 13) 2. Ukutontonkanya pa malyashi ya mu Baibolo ayalanda pa bakeene ukumfwila Yehova na balemumfwila, e lyo no kumona ifyabacitikile. * (1 Kor. 10:8-11) 3. Ukutontonkanya pa fyo ukucita ulubembu lwingalenga ifintu fyamubipila no kukalifya balupwa lwenu. 4. Ukutontonkanya pa fyo Lesa engomfwa nga ca kuti umubomfi wakwe acita ulubembu ulukalamba. (Belengeni Amalumbo 78:40, 41.) 5. Ukwelenganya insansa Yehova akwata nga amona kapepa wakwe uwa cishinka akaana ukucita icabipa no kusalapo ukucita icalungama, nampo nga ali eka nelyo ali na bantu bambi. (Amalu. 15:1, 2; Amapi. 27:11) Na imwe kuti mwalanga ukuti mwalicetekela Yehova nga mulecita ifyo.

Tetekeleni Lesa Ilyo Balemukaanya na Lintu Bashilefwaya Ubukombe

7. Mesho nshi Yeremia akwete, kabili bushe limo yalelenga aumfwa shani?

⁷ Bamunyinefwe abengi babombela mu fifulo ifyayafya sana. Kasesema Yeremia alibombeleko mu cifulo ca musango yu, ilyo mu Yuda mwali icimfulunganya ninshi uyu musumba wali mupepi no konaulwa. Cila bushiku alekwata amesho pantu alebilisha ubupingushi bwa kwa Lesa nga fintu aebelwe. Inshita imo na kalemba wakwe Baruki, ali-ilishenye ukuti anaka. (Yer. 45:2, 3) Bushe Yeremia alifuupwike? Kwena inshita imo na o wine alisakamikwe. Atile: “Bube ubwatiipwa ubushiku ubo nafyelwemo!” Asosele no kuti: “Nga cinshi ico nafumiine mwi fumo, ku kumona ukucucutika no bulanda, ne nshiku shandi ukupwila mu nsoni?”—Yer. 20:14, 15, 18.

8, 9. Ukulingana na Yeremia 17:7, 8 e lyo na Amalumbo 1:1-3, finshi tufwile ukucita pa kuti tutwalilile ukulatwala ifisabo ifisuma?

⁸ Na lyo line Yeremia tafuupwike. Alitwalilile ukucetekela Yehova. Ici calengele uyu kasesema wa citetekelo amoneko uko Yehova afikilishe amashiwi yakwe ayalembwa pali Yeremia 17:7, 8, apatila: “Abe uwapaalwa umuntu uutetekela Yehova, kabili uo Yehova aba e ca kucetekelamo cakwe. Kabili akaba ngo muti uwalimbwa pa menshi, uwalimba imishila ya uko mu mulonga; kabili takomfwe ukukaba ilyo kwaisa, lelo amabula yakwe yakaba ayalemba. Na mu nshita ya cilala takasakamikwe, nangu ukuleka ukutwala ifisabo.”

⁹ Ngo muti uwalulubala “uwalimbwa pa menshi” nelyo uwalimbwa mwi bala ilyo batapilisha lyonse, Yeremia ‘talekele ukutwala ifisabo.’ Alikeene ukukonkelela abalemupumya. Lelo acetekele Intulo ya “menshi” ayapeela umweo kabili alikonkele sana fyonse ifyo Yehova amwebele. (Belengeni Amalumbo 1:1-3; Yer. 20:9) Yeremia aba ca kumwenako icisuma nga nshi, maka maka ku bashimikila mu fifulo ifyayafya! Na imwe nga mubombela mu cifulo icayafya, twalilileni ukucetekela sana Yehova uwingamukosha ilyo ‘mulelumbula apabuuta ishina lyakwe.’—Heb. 13:15.

10. Mapaalo nshi twakwata, kabili cipusho nshi tufwile ukuyipusha?

¹⁰ Yehova alitupeela ifintu ifingi ifingatwafwa ilyo tuli na mafya muli shino nshiku sha kulekelesha. Pali ifi paba ne Cebo ca kwa Lesa, icilepilibulwa bwino sana mu ndimi ishingi. Kabili alatupeela ifya kulya fya ku mupashi ifingi pa nshita yalinga ukupitila mwi bumba lya musha wa cishinka kabili uwashilimuka. E lyo aliteyanya no kuti tuleba na ba bwananyina abengi nga nshi pa kulongana kwa cilonganino na pa kulongana kukalamba. Bushe mulacita ifingalenga ifi fintu ukumwafwa? Abacite fyo, “bakaula utupundu pa mulandu wa kusekelela mu mitima.” Lelo abashumfwila Lesa ‘bakalila pa mulandu wa bukali mu mitima kabili bakalila imisowa pa mulandu wa bulanda.’—Isa. 65:13, 14.

 Tetekeleni Lesa Ilyo Muli na Masakamika

11, 12. Cinshi cingawama ukucita ifi mu calo muli amafya ayengi?

¹¹ Nga fintu casobelwe, abantunse balakwata amafya ayengi sana. (Mat. 24:6-8; Ukus. 12:12) Ilyo kwaba ilyeshi, abantu abengi babutukila apasansuka nelyo ukunina pa mitenge. Na lintu amafya mu calo yalefulilako, abengi babutukila ku fimoneka kwati fyalisansuka, pamo nga ifyuma, bakateka, utubungwe twa mipepele, ifya sayansi ne fya kupangapanga. Lelo pali ifi tapali icibaletela insansa sha cine. (Yer. 17:5, 6) Ababomfi ba kwa Yehova bena balikwata icubo ico babutukilako, ne ci, “Cilibwe ca muyayaya.” (Esa. 26:4) Kemba wa malumbo atile: “[Yehova] cilibwe candi icasansuka kabili ipusukilo lyandi, icubo candi.” (Belengeni Amalumbo 62:6-9.) Cinshi twingacita pa kuti ici Cilibwe cibe icubo cesu?

¹² Tulambatila kuli Yehova nga tuleumfwila Icebo cakwe nangu ca kutila ifyo cilanda fyalipusana na mano ya buntunse. (Amalu. 73:23, 24) Ku ca kumwenako, abantu abakonkelela amano ya buntunse kuti batila: ‘Twikala fye umuku umo pa calo, kanshi cita icili conse ico utemenwe.’ ‘Fwaya umulimo wa kubomba uusuma.’ ‘Kwata indalama ishingi.’ ‘Shita conse icili ku mutima.’ ‘Sabanta mu fyalo fyalekanalekana.’ Lelo amano yafuma kuli Lesa yena yatufunda ukuti: “[Lekeni] ababomfya cino calo babe nga bashicibomfya sana; pantu ifya pano calo filealuka.” (1 Kor. 7:31) Na Yesu wine atwebele ukutangisha ifya Bufumu, nga twacita ifyo ninshi tuleilonganikila “ifyuma ku muulu,” uko fikacingililwa icine cine.—Mat. 6:19, 20.

13. Nga twatontonkanya pali 1 Yohane 2:15-17, fipusho nshi tufwile ukuyipusha?

¹³ Bushe ifyo mumona “icalo” ne “fya muli ici calo” filanga ukuti mwalicetekela sana Lesa? (1 Yoh. 2:15-17) Bushe mwalicindika no kutemwa sana amapaalo ya kwa Yehova ne milimo ya Bufumu ukucila ifya muli cino calo? (Fil. 3:8) Bushe mulesha na maka ukuba ne ‘linso ililolesha fye pa cintu cimo’? (Mat. 6:22) Lesa kwena tafwaya ukuti muleikala fye, maka maka nga mwalikwata ulupwa lwa kusakamana. (1 Tim. 5:8) Na lyo line, enekela ababomfi bakwe ukumucetekela umupwilapo, te kucetekela icalo ca kwa Satana icili no konaulwa.—Heb. 13:5.

14-16. Busuma nshi bamo basanga mu kuba ne ‘linso ililolesha fye pa cintu cimo’ e lyo na mu kutangisha ifya Bufumu?

¹⁴ Moneni ica kumwenako ca ba Richard na ba Ruth, abakwata abana batatu. Ba Richard batile: “Umutima walenjeba ati fingi ningacitila Yehova. Naleikala bwino lelo nalemona ukuti nshalemubombela sana. Pa numa ya kupepela pali uyu mulandu no kumona ifingakabilwa ukucitwa, ine na Ruth, twasuminishenye ukuti nkepushe umukalamba wa ncito nga kuti ansuminisha ukulabomba fye inshiku shine mu mulungu, nangu ca kuti ilya nshita, icalo cesu cali mu mafya ya fya ndalama. Balinsuminishe, kabili natendeke ukubomba ifyo fine pa numa ya mweshi umo.” Bushe ba Richard bomfwa shani pali nomba?

¹⁵ Batile: “Indalama mfola shalicepako, lelo ndakwata inshiku 50 mu mwaka isha kuba no lupwa lwandi no kusambilisha abana. Ama-awala momba mu mulimo wa kushimikila na mu kutungulula amasambililo ya Baibolo yalifulilako sana, e lyo ndakwata ne nshita  iikalamba iya kubomba imilimo ya cilonganino. Kabili apo ndakwata inshita ya kwafwa abana bandi, Ruth alabombako na bupainiya bwa kwafwilisha. Ndafwaisha ukutwalilila ukubomba ifi fine nga cingacitika.”

¹⁶ Ba Roy na ba Petina, abacili bekala no mwana pa ng’anda, balicefesheko inshiku sha kuya ku ncito pa kuti batendeke ukubomba umulimo wa nshita yonse. Ba Roy batile: “Imomba inshiku shitatu mu mulungu, e lyo Petina abomba fye inshiku shibili. E lyo twalifuma mu ng’anda iikalamba no kukuukila mu inono iya-anguka ukusakamana. Ilyo tushilakwata abana, twali bapainiya, kabili tatwalekele ukutemwa bupainiya. E ico ilyo abana besu bakulile, twalitendeke bupainiya na kabili. Indalama nangu shingafula shani, te kuti shituletele amapaalo twakwata.”

Lekeni “Umutende wa kwa Lesa” Ulinde Imitima Yenu

17. Pa mulandu wa kuti mu bumi mulacitika ifintu fyabula ukwenekela, bushe Amalembo yamusansamusha shani?

¹⁷ Takwaba uwishiba ifikacitika mailo, pantu “inshita ya fintu fyabula ukwenekela” ilatufikila bonse fye. (Luk. Mil. 9:11) Lelo ukukanaishiba ifikacitika mailo takufwile ukulenga twalasakamikwa, nga balya abashingooba muli Lesa pantu te cibusa wabo. (Mat. 6:34) Umutumwa Paulo alembele ukuti: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.”—Fil. 4:6, 7.

18, 19. Bushe Lesa atusansamusha shani? Langilileni.

¹⁸ Yehova alaafwa bamunyinefwe abengi na bankashi abakwata amafya ukukanasakamana sana. Nkashi umo atile: “Ilyo nalelolela ukulepulwa, dokota abikilepo fye ukuntiinya pa kuti nsumine ukumbikamo umulopa. Ico abalilepo ukunjeba ca kuti: ‘Bushe walikwata amano ifi ulekaana umulopa?’ Awe apo pene napepele kuli Yehova mu mutalalila kabili umutende wakwe walishile pali ine. Nalikosele nge libwe. Nangu ca kuti umubili walinakile pa mulandu wa kuti umulopa walicepele sana, nalilondolwele bwino sana ukubomfya Amalembo ico nakaanine ukumbikamo umulopa.”

¹⁹ Lesa limo atukosha ukupitila mu Bena Kristu banensu nelyo mu fya kulya fya ku mupashi ifiisa pa nshita tulefikabila. Mufwile mwalyumfwapo munyinefwe nelyo nkashi atila: “Ici cipande cankosha sana. Nine fye balembeele!” Kanshi te mulandu ne fyo twingakabila, nelyo ifyo twingapitamo, Yehova akatwalilila ukututemwa nga twamucetekela. Pantu na kuba tuli “mpaanga” shakwe, isho apeela ishina lyakwe.—Amalu. 100:3; Yoh. 10:16; Imil. 15:14, 17.

20. Mulandu nshi ababomfi ba kwa Yehova bakekalila mu mutelelwe ilyo icalo ca kwa Satana cikapwa?

²⁰ Mu “bushiku bwa bukali ubwa kwa Yehova” ubuleisa lubilo lubilo, fyonse ifyo abantu mu calo ca kwa Satana bacetekela fikonaulwa. Golde, silfere ne fintu fimbi ifyo bacindika tafyakabacingilile. (Sefa. 1:18; Amapi. 11:4) Icubo fye tukakwata, “Cilibwe ca muyayaya.” (Esa. 26:4) E ico natulekonka amafunde ya kwa Yehova ayalungama, no kulabila ubukombe pa Bufumu, nangu abantu batucushe no kukaana, kabili natuleshintilila pali ena nga twaba na masakamika. E lyo cikamoneka ukuti twalimucetekela. Nga tulecita ifi fintu, ‘tukekala umutelelwe no kwikala umutende ukwabula ukutiina ububi.’—Amapi. 1:33.

[Futunoti]

Bushe Kuti Mwalondolola?

Kuti twalanga shani ukuti twalicetekela Lesa

• nga twatunkwa?

• abantu nga balekaana ubukombe nelyo baletucusha?

• nga tuli na masakamika?

[Ifipusho]

[Icikope pe bula 13]

Ukukonka amafunde ya kwa Lesa kulaleta insansa

[Icikope pe bula 15]

“Yehova e Cilibwe ca muyayaya”