Lekeni Ukusalapula kwa kwa Yehova Kulemusambilisha

“Ku mano ayo mwampanda e ko mukantungulwila, na pa numa mukantungulula ku bukata.”—AMALU. 73:24.

KUTI MWAYASUKA SHANI?

Cinshi cilanga ukuti Yehova tapatikisha abantu ukuti abasambilishe no kuti taba na kapaatulula?

Mulandu nshi tusansamukila ukwishiba ukuti limo Yehova ‘alalanguluka’?

Bushe tufwile ukucita shani Yehova nga atufunda nelyo ukutusalapula?

1, 2. (a) Fintu nshi ifyacindama ififwaikwa pa kuti tube ifibusa fya kwa Yehova? (b) Finshi twalanonkelamo mu kusambilila pa malyashi ya mu Baibolo aya bantu abaumfwilile ilyo Lesa abasalapwile?

“UKUPALAMA kuli Lesa kusuma kuli ine. Muli Shikulu Mulopwe Yehova e mo nauba.” (Amalu. 73:28) Aya mashiwi kemba wa malumbo alandile, yalanga ukuti alicetekele Lesa. Finshi fyalengele ukuti alande aya mashiwi? Ilyo amwene ifyo abantu ababipa baleikala umutende, pa kubala kemba wa malumbo alyumfwile sana ububi. Ailishenye ukuti: “Naicusha fye pa kusangulula umutima wandi kabili ca fye ukusamba iminwe yandi muli bukaele.” (Amalu. 73:2, 3, 13, 21) Lelo, ilyo aingile “umwa mushilo umwa kwa Lesa,” alyalwike mu fyo aletontonkanya kabili alipaleme kuli Lesa. (Amalu. 73:16-18) Ifi fyacitike fyalengele uwaimbile amalumbo ukusambilila isambililo ilyacindama ilya kuti, pa kuti umuntu abe cibusa wa kwa Yehova, afwile ukuba pa bantu ba kwa Lesa, ukulaumfwa no kulacita ifyo alefundwa.—Amalu. 73:24.

² Na ifwe tulafwaya ukuba ifibusa fya kwa Lesa wa cine kabili uwa mweo. Pa kuti tube ifibusa fyakwe, calicindama ukulaleka Lesa aletufunda nelyo ukutusalapula pa kuti tube abantu abo atemwa! Kale sana, Lesa alelanga uluse ku bantu na ku nko pa kubapeela ishuko lya kumfwila ukusalapula kwakwe. Ifyo bacitile fyalilembwa mu Baibolo pa kuti tusambilileko no “kutusoka fwe baleikala mu nshiku sha kulekelesha.” (Rom. 15:4; 1 Kor. 10:11) Ukusambilila pali aya malyashi kwalatwafwa ukwishiba bwino imibele ya kwa Yehova ne fyo twinganonkelamo mu kusalapula kwakwe.

 IFYO NAKABUMBA ABOMFYA AMAKA YAKWE

3. Cilangililo nshi icaba pali Esaya 64:8 na Yeremia 18:1-6, icilondolola amaka Yehova akwata pa bantu? (Moneni icikope cili pa ntendekelo ya cino cipande.)

³ Pali Esaya 64:8 paba icilangililo icilondolola amaka ayo Yehova akwata pa bantu na pa nko. Ili lembo litila: “Mwe Yehova, ni mwe Shifwe. Ifwe tuli iloba, na imwe ni mwe Mwatubumba; kabili bonse tuli milimo ya minwe yenu.” Nakabumba kuti abomfya iloba ilyo akwete ukubumbamo icili conse ico alefwaya. Iloba te lingeba nakabumba ifya kubumba. Ifi fine e fyo caba na kuli ifwe fwe bantu, te kuti twebe Lesa ifyo afwile ukutufunda.—Belengeni Yeremia 18:1-6.

4. Bushe Lesa pa kusambilisha abantu nelyo inko alapatikisha? Londololeni.

⁴ Yehova alangile amaka akwata ku fyo acitile ku luko lwa bena Israele nga filya nakabumba acita kwi loba. Lelo Yehova alipusana na nakabumba. Nakabumba kuti apanga icili conse ico alefwaya ukubomfya iloba. Bushe ici cilolele mu kuti Yehova alasambilisha abantu bamo ukuba ababi e lyo bambi abasuma nelyo ukusambilisha inko shimo ukuba ishisuma e lyo shimbi ukuba ishibi? Baibolo itila awe. Yehova alipeela abantu amaka ya kuisalila ifyo balefwaya ukucita. Tabomfya amaka yakwe ku kupoka abantu ubupe abapeela. Abantu abene e bafwile ukusalapo nga balefwaya Yehova Kabumba wabo ukubasambilisha nelyo iyo.—Belengeni Yeremia 18:7-10.

5. Bushe Yehova abomfya shani amaka yakwe nga ca kutila abantu bakaana ukuti abasambilishe?

⁵ Bushe Nakabumba Mukalamba abomfya shani amaka yakwe nga ca kutila abantu bakaana ukuti abasambilishe? Baleni tontonkanyeni icicitika nga ca kutila nakabumba alefwaya ukubumba icintu cimo, nomba iloba taliweme. Nalimo kuti apangamo icintu cimbi nangu ukulipoosa! Ilingi line, nga ca kutila nakabumba afilwa ukupangamo fimo mwi loba ninshi takashile bwino iloba. Lelo Kabumba wesu ena te fyo aba, alasambilisha abantu mu nshila iisuma. (Amala. 32:4) Nga ca kutila umuntu talekonka ifyo Yehova alemusambilisha, ninshi e uli no bwafya. Yehova alaaluka ukulingana ne fyo abantu alesambilisha balecita. Abakonka ifyo alebasambilisha balanonkelamo. Ku ca kumwenako, Abena Kristu basubwa “fipe fya luse,” balisambilishiwa ukuba ‘ifipe fya mucinshi.’ Lelo, abakaana ukusambilishiwa na Lesa baba “fipe fya bukali ifyapangilwa ubonaushi.”—Rom. 9:19-23.

6, 7. Bushe Imfumu Davidi ne Mfumu Shauli bacitile shani ilyo Yehova abakalipile?

 ⁶ Inshila imo iyo Yehova asambilishishamo abantu kupitila mu kubafunda nelyo ukubasalapula. Ifyo acitile ku mfumu shibili ishabalilepo ukuteka mu Israele, e kutila Shauli na Davidi, e filanga ifyo Yehova asambilisha abantu bakwe. Ilyo Imfumu Davidi yacitile ubucende na Bati-sheba, yali-iletelele kabili yaletelele na bantu bambi. Nangu ca kuti Davidi aali ni mfumu, Yehova alimusalapwile. Lesa atumine kasesema Natani ukuyakalipila Davidi. (2 Sam. 12:1-12) Bushe Davidi acitile shani? Alyumfwile sana ububi pa fyo acitile kabili alilapiile, e ico Lesa alimubelele uluse.—Belengeni 2 Samwele 12:13.

 ⁷ Imfumu Shauli yena yalikeene ukukonka ifyo baifundile. Yehova aebele kasesema Samwele ukweba Shauli ukuti: Akepaye bena Amaleke bonse ne fitekwa fyabo. Shauli taumfwilile ifyo Lesa amwebele. Taipeye Agagi imfumu, ne fitekwa ifyawamisha. Mulandu nshi? Nalimo ni co alefwaya abantu ukumucindika. (1 Sam. 15:1-3, 7-9, 12) Ilyo  bamukalipiile, Shauli nga alinakilile no kukonka ifyo Nakabumba Mukalamba amufundile. Lelo Shauli alikeene. Aliipokolwele no kusosa ukuti ifyo acitile fyali fye bwino pantu shilya nama bali no kushibomfya pa kupeela amalambo kuli Lesa, kabili alisuulile ifyo Samwele amufundile. Yehova alikeene Shauli kabili alimufumishe na pa bufumu. Shauli tatalile aba cibusa wa kwa Lesa wa cine na kabili.—Belengeni 1 Samwele 15:13-15, 20-23.

LESA TABA NA KAPAATULULA

8. Finshi twingasambilila ku fyo abena Israele bacitile ilyo Yehova alebasambilisha?

⁸ Te bantu fye Yehova apeela ishuko lya kusambilishiwa na ena, lelo alapeela ne nko ili shuko. Mu 1513 B.C.E., Lesa alubwile abena Israele mu busha mu Egupti, kabili apangene nabo icipangano ca kuba abantu bakwe. Apo Lesa asalile abena Israele ukuba uluko lwakwe, balikwete ishuko lya kusambilishiwa na ena. Lelo abena Israele balecita ifyabipa mu menso ya kwa Yehova, batendeke fye no kupepa balesa abo inko shimbi shalepepa. Yehova alebatumina bakasesema libili libili pa kuti baalule imibele yabo, lelo balikeene ukwaluka. (Yer. 35:12-15) Apo balikeene ukumfwila Yehova, alibasalapwile icine cine. Abena Israele bali nge fipe ifyalingile ukonaulwa, e ico abena Asiria baonawile ubufumu bwa mikowa 10 ubwa ku kapinda ka ku kuso kabili pa numa abena Babiloni nabo baonawile ubufumu bwa mikowa ibili ubwa ku kapinda ka ku kulyo. Kuli ifi fyacitike tulasambililako isambililo ilyacindama nga nshi! Ifyo Yehova atusambilisha kuti fyatwafwa fye nga ca kuti tulefikonka.

9, 10. Bushe abena Ninebe bacitile shani ilyo Lesa abasokele?

 ⁹ Yehova alipeele na bantu abaleikala mu Ninebe, umusumba ukalamba uwa Asiria, ishuko lya kucitapo fimo pa fyo alebasoka. Yehova aebele Yona ukuti: “Ima, kabiye ku Ninebe umusumba uukalamba, no kubila kuli wena ukuti nimona ububi bwabo.” Yehova alefwaya ukonaula umusumba wa Ninebe pantu abantu balibipile sana.—Yona 1:1, 2; 3:1-4.

¹⁰ Lelo, ilyo Yona abilile ku bantu ubupingushi ubo Lesa aali no kuleta, ‘abantu ba mu Ninebe batetekele Lesa, kabili babilile imbila ya kuleka ukulya kabili bafwele insamu, ukutendekela pa mukalamba ukufika fye na ku munono.’ Imfumu “yaimine pa cipuna ca iko ica bufumu, yafuulile ica kufwala ca bufumu, yafwele ne nsamu no kwikala mu mito.” Abena Ninebe balyumfwile ifyo Yehova abebele kabili balilapiile. Pa mulandu wa fyo bacitile, Yehova tabonawile.—Yona 3:5-10.

11. Mibele nshi iya kwa Yehova iyo tusambililako ku fyo acitile ku bena Israele na ku bena Ninebe?

¹¹ Nangu ca kuti abena Israele bali luko ulwasalwa, Yehova alibasalapwile. Lelo Lesa tapangene icipangano na bena Ninebe. Na lyo line, Yehova alibilile ubukombe bwa bupingushi kuli bena kabili alibabelele uluse ilyo balapiile. Ukwabula no kutwishika, aya malyashi yabili yatulanga fye ukuti Yehova Lesa wesu “taba na kapaatulula”!—Amala. 10:17.

YEHOVA TAPAMPAMINA FYE PA CINTU CIMO

12, 13. (a) Mulandu nshi Lesa aalwila ifyo alefwaya ukucita nga ca kuti umuntu alapila? (b) Bushe Yehova ‘alangulwike’ shani pali Shauli, na pa bena Ninebe?

¹² Ifi Lesa aitemenwa ukutusambilisha, cilangilila fye ukuti tapampamina fye pa cintu cimo. Twalishininkisha ifi pantu nangu Yehova napingula ukuti onaule abantu, alalula ubupingushi bwakwe nga balapila. Baibolo ilondolola ukuti Yehova ‘alilangulwike pa kulenga Shauli ukuba imfumu.’ (1 Sam. 15:11) Ilyo abena Ninebe balapiile no kuleka ukucita ifyabipa, Baibolo itila: “Lesa wa cine alangulwike pa bucushi ubo ali no kubaletela, kabili tabuletele.”—Yona 3:10.

¹³ Ishiwi lya ciHebere ilyo bapilibula ukuti “ukulanguluka” lipilibula ukwaluka mu fyo umo aletontonkanya nelyo ifyo alefwaya ukucita. Yehova alyalwike mu fyo aletontonkanya pali Shauli. Yehova asalile Shauli ukuba imfumu lelo mu kuya kwa nshita alimukeene. Ifi Yehova ayalwike te kutila alilufyenye pa kusala Shauli ukuba imfumu, lelo mulandu wa kuti Shauli alilekele ukucetekela Lesa kabili talemumfwila. Lesa wa cine alilangulwike pa fyo alefwaya ukucita ku bena Ninebe, e co tabonawile. Ala tulasansamuka ukwishiba ukuti Yehova, Nakabumba wesu tapampamina fye pa cintu cimo, wa mutembo kabili wa luse, kabili alaitemenwa ukwaluka nga ca kuti umuntu alapila!

TWILAKAANA UKUSALAPULA KWA KWA YEHOVA

14. (a) Bushe Yehova atusambilisha shani muno nshiku? (b) Bushe tufwile ukucita shani ilyo Lesa aletusambilisha?

¹⁴ Muno nshiku, Yehova abomfya Icebo cakwe Baibolo ne cilonganino cakwe ku kutusambilisha. (2 Tim. 3:16, 17) Tufwile ukumfwa ilyo Yehova aletufunda nelyo ukutusalapula ukubomfya Baibolo ne cilonganino cakwe. Nampo nga kale twabatishiwa nelyo twalikwata imilimo iingi mu cilonganino, tufwile ukutwalilila ukulaumfwila ukufunda kwa kwa Yehova, pa kuti kuletulenga ukuba ifipe ifya mucinshi.

15, 16. (a) Bushe umo nga bamupoka imilimo mu cilonganino, nalimo kuti aumfwa shani? Landeni icacitike. (b) Cinshi cingatwafwa ukukanaumfwa sana ububi nga batusalapula?

 ¹⁵ Inshita shimo pa kutusalapula, Lesa alatweba ifya kucita nelyo ukutulungika. Limo tulasalapulwa pa mulandu wa kuti natulufyanya. Inshita shimo kuti batupoka ne milimo mu cilonganino. Natulande pali ba Dennis * abaali baeluda. Ba Dennis balibebawile pantu balilufyenye. Bushe ba Dennis baumfwile shani ilyo babilishe ku cilonganino ukuti te baeluda? Batile: “Naimwene ukuti ndi wa cabecabe fye. Pa myaka ukucila 30 iyapita, nalebomba imilimo iingi mu cilonganino. Nali painiya wa nshita yonse, nalibombeleko pa Bethel, nali umubomfi utumikila kabili naishileba eluda. Kabili e lyo nalandileko ne lyashi lya kubalilapo pa kulongana kwa citungu. Nomba fyonse ifi fyalipwile. Naleumfwa sana insoni kabili nalemona no kuti tapali imilimo iili yonse iyo ningabomba mu cilonganino.”

¹⁶ Ba Dennis balingile ukwaluka no kuleka ukucita ifyabipa ifyalengele ukuti babebaule. Cinshi cabafwile ukuleka ukumfwa ububi? Batile: “Nalitwalilile ukulaisambilisha, ukulashimikila no kulongana lyonse. Kabili bamunyinane mu cilonganino balenkoselesha e lyo ne fyo nalebelenga mu mpapulo na fyo fyalenkoselesha. Icipande cali mu Ulupungu lwa kwa Kalinda ulwa August 15, 2009, icaleti, ‘Bushe Mwalibala Amubombapo? Bushe te Kuti Mutemwe Ukubomba na Kabili?’ cali kwati ni kalata banembeele umwali amasuko ya mapepo yandi. Ukufunda uko natemenwe sana kwa kuti, ‘Apo tamwakwata ifishingamo mu cilonganino, mulebombesha ukukwata ukwampana kusuma na Yehova.’” Bushe ba Dennis banonkelamo shani mu fyo babasalapwile? Ilyo papitile imyaka, ba Dennis batile: “Yehova alimpeela na kabili umulimo wa kuba umubomfi utumikila.”

17. Bushe ukutamfiwa kuti kwa-afwa shani umubembu? Langilileni.

¹⁷ Inshila na imbi iyo Yehova asalapwilamo abantu bakwe kubatamfya mu cilonganino. Ukutamfya uushilapila kulacingilila icilonganino kabili kulafwa no ucitile ulubembu ukulapila. (1 Kor. 5:6, 7, 11) Palipitile imyaka mupepi na 16 ukutula apo ba Robert babatamfishe mu cilonganino. Pali iyi nshita abafyashi babo na bandume nabo balikonkele sana ukufunda ukwaba mu Cebo ca kwa Lesa ukwa kukanayampana no muntu imbifi nangu fye ukumuposha te kwesha. Napapita imyaka ukutula apo ba Robert babwelela mu cilonganino kabili balalunduluka mu fya kwa Lesa. Ilyo babepwishe icalengele ukuti babwelele kuli Yehova na ku bantu bakwe pa numa ya myaka iingi, batile, icalengele ca kuti balupwa lwabo tabaleyampana pamo nabo. Ba Robert batile: “Nga ca kuti balupwa lwandi baleyampana na ine nangu fye panono, limbi ukufwaya fye ukumona ifyo ndi, nga shalefuluka ukubwelela kuli Lesa.”

18. Bushe tufwile ukucita shani Lesa nga atusalapula?

¹⁸ Limbi te kuti tusalapulwe muli iyi nshila, lelo bushe tuli iloba lya musango nshi mu minwe ya kwa Nakabumba Mukalamba? Bushe tukacita shani nga batusalapula? Bushe tukacita nga filya ifyacitile Davidi nangu Shauli? Nakabumba Mukalamba ni Yehova, Shifwe. Muleibukisha ukuti, “uo Yehova atemwa alamufunda, ifyo na wishi afunda umwana mwaume uo atemwa.” E ico, ‘mwilakaana ukusalapula kwa kwa Yehova, kabili mwilapata ukufunda kwakwe.’—Amapi. 3:11, 12.

[Futunoti]

[Ifipusho]

[Ifikope pe bula 26]

Shauli alisuulile ifyo bamufundile kabili alikeene. Alikeene ukusalapulwa! (Moneni  paragrafu 7)

Davidi alyumfwile sana ububi pa fyo acitile kabili alikonkele ifyo bamufundile. Alilekele Lesa ukumusalapula. Bushe na imwe e fyo mucita? (Moneni  paragrafu 6)