UBUMI BWABO

Ukumfwila Yehova Kwalilenga Napaalwa Nga Nshi

Abashimika ili lyashi ni ba Elisa Piccioli

Batata banjebele ati: “Tulasambililako ifisuma kuli Noa! Noa aleumfwila Yehova kabili alitemenwe no lupwa lwakwe, e lyo bonse balipuswike Ilyeshi pantu ulupwa lonse lwalingile mu cibwato.”

AYA e mashiwi yamo njibukishishako batata. Batata bali abafuuka kabili balebombesha. Balitemenwe umulinganya, e calengele batemwe ifyo basambilile muli Baibolo umuku wa kubalilapo mu 1953. Ukutula ilya nshita, baletusambilisha ifyo balesambilila. Pa kubala, bamayo tabalefwaya ukuleka ukulapepa ku Katolika. Lelo mu kupita kwa nshita balitendeke ukutemwa ifyo Baibolo isambilisha.

Calyafishe pa kuti abafyashi batusambilishe pantu bamayo tabaishibe ukubelenga e lyo batata balewisha akasuba mu mabala. Inshita shimo balenaka ica kuti baleshipula pa kutusambilisha. Lelo mu fyo balecita mwalifumine ifisuma. Nine nali umukalamba pa bana bonse, e co nalebafwako ukusambilisha abaice bandi. Nalibasambilishe ilyashi ilyo batata balelandapo sana ilya kuti Noa alitemenwe ulupwa lwakwe kabili aleumfwila Lesa. Na ine nalitemenwe ili lyashi! Tapakokwele twatendeke ukulongana, twalelonganina mu ng’anda ya Bufumu iyabelele ku Roseto degli Abruzzi, umusumba uwabelele mu lulamba lwa bemba wa Adriatic ku Italy.

Mu 1955 ninshi ndi ne myaka 11, ine na bamayo twapitile pa mpili ukulola ku masamba pa kuyasangwa ku kulongana kwa citungu ukwabelele ku Rome. Ukutula lilya, imona ukuti ukulongana kukalamba kwalicindama ku Bena Kristu.

Umwaka wakonkelepo nalibatishiwe kabili tapakokwele natendeke bupainiya bwa nshita yonse. Ilyo nali ne myaka 17, naishileba painiya waibela kabili naile mu kubombela ku Latina ku kapinda ka ku kulyo aka Rome apali amakilomita 300 ukufuma uko twaleikala. Umusumba wa Latina e lyo wapangilwe kanshi takwali uwalebika amano ku fyo abena mupalamano bakwe balecita. Ine no munandi nalebomba nankwe bupainiya twaletemwa sana ukushiila abantu impapulo ishilanda pali Baibolo kabili twaleshalika impapulo ishingi, lelo apo nali umwaice nalefuluka sana ku ng’anda! Na lyo line, nalefwaya ukubombela kuli ici cifulo bantumine.

Pa numa, bantumine ku Milan ku kwafwa ukupekanishisha Ukulongana kwa Fyalo Ifingi ukwaliko mu 1963 ukwali no mutwe waleti “Everlasting Good News” (Imbila Nsuma ya Muyayaya). Pali uku kulongana, nalibombeleko umulimo wa kuitemenwa kabili kwali na bambi abengi ababombeleko. Pali aba, pali na Paolo Piccioli munyinefwe uwafumine ku Florence. Pa  bushiku bwalenga bubili ubwa kulongana, uyu munyinefwe alandile ilyashi ilisuma nga nshi ilyalelanda pa bashimbe. Natontonkenye mu mutima nati, ‘Uyu munyina nangu cibe shani takoope.’ Lelo, twatendeke ukulembeshanya amakalata kabili twasangile ukuti bonse twakwete ubuyo bumo bwine, twalitemenwe Yehova, kabili twalefwaya ukulamumfwila. E co mu 1965 twalyupene.

UKULANSHANYA IFYA MU BAIBOLO NA BASHIMAPEPO

Nabombele bupainiya bwa nshita yonse ku Florence pa myaka 10. Nalitemenwe sana ukumona ifyo icilonganino calekula, maka maka ukumona uko abacaice balelunduluka. Ine na ba Paolo twaletemwa sana ukulanshanya na bacaice ifya kwa Lesa, no kula-angalila pamo, nga ni ba Paolo bena baleteya nabo umupila wa ku makasa. Nalitemenwe ukuba pamo na bena mwandi, lelo nalimwene ukuti abacaice na bamunyinefwe mu cilonganino baleumfwa bwino ukuba pamo na bena mwandi kabili balekabila ukubabikako amano.

Lyonse nga natontonkanya pa masambililo ya Baibolo ayengi ayo naletungulula ndomfwa bwino. Umo uo naletungulula isambililo ni Adriana. Adriana ashimikileko indupwa shibili pa fyo alesambilila. Ishi ndupwa shapekenye ukuti bakakumane na shimapepo pa kuti bakalanshanye pa fisambilisho fye calici pamo nge fya kuti muli Lesa umo mwaba abene batatu, no kuti umweo taufwa. Bashikofu batatu balile kuli uku kulanshanya. Ifyo aba bashikofu balelondolola tafyaleumfwika kabili baleipilika, ici calengele ukuti abo twalesambilisha Baibolo balinganye ifyo balesambilila ku fyo aba bashikofu baleasuka. Ukwabula no kutwishika uku kulanshanya kwalengele abengi ukwaluka. Mu kuya kwa nshita, abantu 15 ukufuma muli ishi ndupwa baishileba ba Nte.

Kwena pali ino nshita, inshila tubomfya pa kushimikila shalipusana ne sho twalebomfya kale. Ilingi line ba Paolo balelanshanya ifya mu Baibolo na bashimapepo ica kuti basukile baba bakalapashi ukushimikila kuli bashimapepo. Ndebukisha icacitike bushiku bumo ilyo baleshimikila kwi bumba lya bantu abashali ba Nte. Calimoneke apabuuta ukuti bashimapepo balyebeele libela abantu bamo ukuti bakepushe ba Paolo amepusho ayo bengafilwa ukwasuka. Lelo ifintu fyaishilealuka. Umuntu umo aipwishe nga caliba fye bwino ku ba mipepele ukuitumpa mu mapolitiki. Ilyo aipwishe ici cipusho, calimoneke fye apabuuta ukuti bashimapepo bali mu bwafya. Bashimapepo balifililwe ukwasuka ici cipusho. Mu kupumikisha, amalaiti yaliile kabili e fyo balekele no kulanshanya. Ilyo papitile imyaka, twaishileishiba ukuti e fyo bapangene ukuti nga ca kutila ifyo balelanshanya fyapusana ne fyo bashimapepo balefwaya, ninshi kuti bashimya fye amalaiti pa kuti ukulanshanya kupwe.

 TWAPEELWA IMILIMO NA IMBI

Ilyo papitile imyaka 10 ukutula apo twaupanine na ba Paolo, batwebele ukuya mu kubomba bukangalila bwa muputule. Ba Paolo balebomba incito iisuma, kanshi tacayangwike ukupingulapo. Lelo pa numa ya kutontonkanyapo no kupepelapo, twalisumine. Twaletemwa ukuba pamo ne ndupwa ishaletupokelela mu mayanda yabo. Ilingi icungulo bushiku twalesambilila pamo, kabili pa numa ba Paolo baleafwa abana ukulemba ifya ku sukulu, maka maka insamushi. Na kabili, ba Paolo balitemenwe sana ukubelenga kabili baleumfwa bwino ukulondolwelako bambi ifisuma ifyo babelenga. Ilingi pali Cimo twaleya mu kushimikila mu matauni umushali ba Nte, twaleya mu kwita abantu ku lyashi ilyalebako icungulo.

Pa numa fye ya kubomba imyaka ibili mu muputule, balitwitile ukuya mu kubombela pa Bethel mu Rome. Ba Paolo balebombela ku dipartimenti iilolekesha pa milandu e lyo ine nalebombela ku Dipartimenti ya Magazini. Pa kuti fye tubeleshe ukubombela pa Bethel calyafishe, lelo twalefwaisha ukutwalilila aba cumfwila no kulacita fyonse ifyo batweba. Twalitemenwe ukumona uko umusambo walekulilako ne fyo bamunyinefwe mu Italy balefulilako. Pali ilya nshita, e lyo ubuteko bwasuminishe Inte sha kwa Yehova mu Italy. Uyu mulimo walituletele sana insansa.

Ilyo twalebombela pa Bethel e lyo abantu mu Italy baishibe ukuti tatusumina ukubikwamo umulopa. Muli ba 1980, kwali umulandu wa mulopa uo batwele ku cilye uwaletele akantu. Ba Nte abaupana balibapeele umulandu wa kwipaya umwana wabo umwanakashi, nangu ca kuti umwana afwile ku bulwele bwa kufyalwa nabo ubwa kukama umulopa ubo abengi abekala ku ncende yabela ku Mediterranean bafyalwa nabo. Bamunyina na bankashi aba pa Bethel balyafwile baloya abaleimininako aba baupana mu cilye. Utupepala e lyo na Loleni! yaibela ifyo basabankenye fyalyafwile abantu ukwishiba ifishinka no kwishiba bwino bwino ifyo Icebo ca kwa Lesa calanda pa mulopa. Muli iyi myeshi yonse, cila bushiku ba Paolo balebomba ama-awala 16 ukwabula ukutuushapo. Nalebatungilila na maka yandi yonse muli uyu mulimo wacindama uo balebomba.

IFINTU NA FIMBI FYA-ALUKA

Ilyo papitile imyaka 20 ukutula apo twaupanine, kwali icacitike ico tushale-enekela. Nali ne myaka 41 e lyo ba Paolo bali ne myaka 49, ilyo nabebele ukuti ndemona kwati ndi pa bukulu. Ba Paolo balikwete akatabo ako balelembamo ifyalecitika cila bushiku. Pali ubu bushiku balembelemo amashiwi ya kuti: “Ipepo: Nga ca kutila cine cine umwina mwandi ali pa bukulu, ndelomba ukuti mutwafwe ukutwalilila mu mulimo wa nshita yonse, ukuti twikabwelela inuma, no kuti tukabe abafyashi abasuma. Ne cikalamba ico ndelomba ca kuti mukangafwe ukulacita ifyo nsambilisha pa myaka yonse iyi ukucila pali 30, nkaciteko fye  nangu ifinono.” Nga kumona fye ifyo ifintu fyaba, kuti natila Yehova alyasuka ipepo lyabo, ukubikako fye ne lyandi.

Ilyo Ilaria afyelwe, ifintu fyalyalwike sana mu bumi bwesu. Ukulanda fye icishinka, limo twalefuupuka nga filya Amapinda 24:10 yalanda ukuti: “Bushe ulanenuka mu bushiku bwa macushi? Awe ninshi amaka yobe yanono.” Lelo twalekoshanya, twaleibukisha ukuti calicindama ukukoseleshanya.

Ilaria alanda ukuti alitemwa sana ukuti afyelwe ilyo abafyashi bakwe bali mu mulimo wa nshita yonse. Tatalile omfwa ukuti twalimulekeleshe; akulila mu lupwa lwa bafyashi abasuma. Akasuba naleba nankwe. Mu cungulo ba Paolo nga babwela, ilingi line baleba ne fya kucita ifingi; na lyo line, balekwatako inshita ya kuba nankwe, ukwangala nankwe no kumwafwako ifya ku sukulu. Ifi fine e fyo balecita nangu ca kutila limo ukucita ifi kwalelenga balaala ku ma 2 koloko nangu 3 koloko ya bushiku. Ilaria atemenwe ukulanda ukuti, “Batata e banandi sana.”

Nga fintu mwamona, pa kuti twafwe umwana wesu Ilaria ukutwalilila ukuba Umwina Kristu, tatwalealuka-aluka mu fyo twalemweba kabili inshita shimo twaleshininkisha ukuti acita ifyo twamweba. Ndebukisha ifyo Ilaria acitile bushiku bumo ilyo aleangala no munankwe. Ifyo acitile tafyaweme. Twalimulondolwelele ukubomfya Baibolo umulandu ifyo acitile fyabipile. Twamwebele no kuti alombe ubwelelo ku munankwe ninshi na ifwe tulemonako.

Ilaria alanda ukuti alatasha pa fyo twatemenwe ukushimikila. Apo nomba alyupwa, alishiba bwino umulandu cacindamina ukumfwila Yehova no kukonka ubutungulushi bwakwe.

NATWALILILE UKUBA NE CUMFWILA NA MU NSHITA YA BULANDA

Mu 2008, ba Paolo babasangile no bulwele bwa kansa. Ilyo fye twaishibe ukuti balilwala, twalemona kwati bakapola, kabili balenkoselesha sana. Ukulunda pa kubatwala ku fipatala ifisuma, ine na Ilaria twalepepa amapepo ayatali kuli Yehova ukulomba ukuti atwafwe ukuba abashipa te mulandu ne fyali no kucitika. Naleumfwa sana ububi ukumona uko amaka yaleya yalepwa fye ku muntu uwali uwakosa. Ala calimputwile umusana ilyo ba Paolo bafwile mu 2010. Lelo ndasansamuka nga natontonkanya pa fyo twabombele nabo pa myaka 45. Twalibombeele Yehova no mutima onse. Nalishiba ukuti umulimo twabombele tawakalabwe. Kabili ndafulukisha ukwisamonako ilyo ba Paolo bakabuuka, nga filya Yesu alandile pali Yohane 5:28, 29.

Ncili nalitemwa sana ilyashi lya kwa Noa nga filya fine nalitemenwe ilyo nali umwaice. Na ino ine nshita, mfwaya ukulaumfwila Yehova, te mulandu ne fyo banjeba ukucita. Nalishininkisha ukuti amapaalo Lesa uwatutemwa atupeela yalicila sana pa mafya, pa kuipeelesha, nelyo pa bubi tumfwa nga twafwilwa. Yehova alimpaala icine cine, kabili nali-imwena ukuti calicindama ukumfwila Lesa te mulandu na mafya.

[Icikope pe bula 4]

Ubushiku twaupene

[Icikope pe bula 4]

Twaletemwa sana ukuba pamo na bacaice, nga ni ba Paolo bena baleteya nabo umupila wa ku makasa

[Icikope pe bula 5]

Ba Paolo balitemenwe umulimo balebomba pa Bethel

Ilaria alitemenwe ukulanda ati, “Batata e banandi sana”

[Amashiwi pe bula 6]

“Ncili nalitemwa sana ilyashi lya kwa Noa nga filya fine nalitemenwe ilyo nali umwaice. Na ino ine nshita, mfwaya fye ukulaumfwila Yehova”