1, 2. Nani uwatupeela kampingu, kabili mulandu nshi tulingile ukulatashisha pa kutupeela kampingu?

YEHOVA LESA abumbile fwe bantu no buntungwa bwakuisalila ifya kucita. Nomba pa kuti ciletwangukila ukusala bwino ifya kucita, Yehova alitupeela ica kututungulula pa kuti tulelekanya icisuma ku cabipa, ne ci, ni kampingu. Nga tulebomfya bwino kampingu, kuti yatwafwa ukulacita ifisuma no kulataluka ku fyabipa. Ifi Yehova atubumbile na kampingu, bushininkisho bwa kuti alitutemwa sana kabili afwaya ukuti tulesala bwino ifya kucita.

² Abantu bamo balipata ifyabipa kabili balacita ne fisuma nangu ca kuti tabaishiba amafunde ya mu Baibolo. (Belengeni Abena Roma 2:14, 15.) Cinshi calenga? Ni co balikwata kampingu. Iyi kampingu e ilesha abantu abengi ukucita ifyabipa. Elenganyeni ifyo icalo cingabipa nga ca kuti abantu bonse tabakwete kampingu! Ifintu kuti fyabipisha ukucila ne fyo fyaba. Kanshi tuletasha Yehova pa kutubumba na kampingu!

3. Bushe aba mu cilonganino nga bali na kampingu iisuma mu cilonganino kuti mwaba shani?

 ³ Abantu abengi tabatontonkanya pa kusambilisha kampingu yabo. Lelo abantu ba kwa Yehova bena balafwaya sana ukuti kampingu yabo ilebatungulula bwino pantu ilafwa aba mu cilonganino ukwikatana. Tufwaya ukuti kampingu yesu iletwibukisha amafunde ya mu Baibolo ayatwafwa ukwishiba ukuti ici cisuma ne ci cibi. Nomba pa kuti tusambilishe kampingu ica kuti iletutungulula bwino, tatulingile ukupelela fye pa kusambilila ifyo Baibolo ilanda. Tulingile no kutemwa amafunde ya kwa Lesa e lyo no kucetekela ukuti yabelako ku kutwafwa. Paulo atile: “Ico nakupeelela ici cipope ni pa kuti tube no kutemwa ukufuma mu mutima uwasanguluka na kampingu umusuma ne citetekelo icabula ubumbimunda.” (1 Timote 1:5) Nga ca kuti twasambilisha kampingu yesu no kukonka ifyo iletweba, tukalatemenwako Yehova kabili tukamucetekela sana. Ifyo tubomfya kampingu yesu filanga ifyo bucibusa bwesu na Yehova bwaba e lyo ne fyo tufwaisha ukulamusekesha. Kampingu yesu na kabili ilanga ifyo twaba.

4. Bushe kuti twasambilisha shani kampingu?

⁴ Nomba kuti twasambilisha shani kampingu yesu? Tulingile ukulasambilila Baibolo lyonse, ukulatontonkanya sana pa fyo tulebelenga, no kulalomba ukuti Yehova aletwafwa ukulakonka ifyo tusambilila. Ici cilolele mu kuti tatulingile ukwishiba fye ifishinka na mafunde yaba mu Baibolo. Lelo ilyo tulesambilila Baibolo, ico tufwaisha kwishiba sana Yehova. Tuleshiba ifyo aba, ifyo apata ne fyo atemwa. Nga twatwalilila ukwishibilapo na fimbi pali Yehova, kampingu yesu ikalenga tuleishiba bwangu bwangu ifyo apata ne fyo atemwa, kabili tukalatontonkanya nga Yehova.

5. Finshi twalasambilila muli cino cipande?

⁵ Nalimo kuti twayipusha ukuti: Bushe nga twasambilisha bwino kampingu yesu kuti yalatwafwa shani ukulapingula bwino pa fintu? Kuti twalanga shani ukuti tulacindika bakampingu ba Bena Kristu banensu? Kabili bushe kampingu kuti yalenga shani twalacita ifisuma? Twalalanda pa fintu fitatu umo kampingu iyasambilishiwa bwino ingatwafwa: (1) mu fya myundapile, (2) mu fya kuleseshamo icitendwe e lyo na (3) pa mulimo wa kushimikila.

6. Finshi tulingile ukulaibukisha nga ca kuti tulefwaya ukusala imyundapile?

⁶ Baibolo ilatweba ukutaluka ku fintu ifingatonaula, ilatweba no kuti tatufwile ukulaliisha no kunwesha. (Amapinda 23:20; 2 Abena Korinti 7:1) Nga tulekonka ifyo Baibolo yalanda, kuti twacingilila no bumi bwesu nangu ca kuti te kuti tupwishe amalwele no bukote. Nomba tulingile ukupingulapo pa myundapilwe tulefwaya nga ca kuti twalwala. Mu fyalo fimo, balabomfya imiti ya ku cipatala e lyo ne miti imbi iya cikaya ne myundapile fye imbi. Ilingi line bamunyinefwe balepusha ku musambo pa kuti babapandeko  amano pa myundapilwe yalekanalekana iyo Umwina Kristu engasumina ukubomfya. Abengi balepusha ukuti, “Bushe umubomfi wa kwa Yehova kuti asumina imyundapilwe ya musango uyu?”

7. Finshi fingatwafwa ukupingulapo bwino pa myundapile umo babomfya umulopa?

⁷ Iofeshi lya musambo nelyo baeluda mu cilonganino tabakwata insambu sha kusalilako Umwina Kristu imyundapilwe engasumina nangu ca kuti abepusha ukuti bamusalileko. (Abena Galatia 6:5) Na lyo line baeluda kuti bamupandako amano pa fyo Yehova alanda pa kuti asale bwino imyundapile iisuma. Ku ca kumwenako, Lesa alitupeela ifunde lya kutaluka ku mulopa. (Imilimo 15:29) Ili ifunde lilafwa Umwina Kristu ukwishiba ukuti te kuti asumine imyundapile umo babomfya umulopa nelyo ifikalamba 4 ifyapanga umulopa. Ili ifunde na kabili kuti lyayafwa Umwina Kristu ukupingulapo nga ca kutila kuti asumina umuti uo bapanga ukubomfya utunono-nono utwafuma ku fikalamba 4 ifyapanga umulopa nelyo iyo. * (Moneni utulembo pe samba.) Fyebo nshi na fimbi ifyaba mu Baibolo ifingatwafwa ukulasala imyundapile iisuma?

8. Bushe ilembo lya Abena Filipi 4:5 kuti lyatwafwa shani ukulapingulapo bwino pa fya bumi?

⁸ Pa Amapinda 14:15 patila: “Uushaishiba atetekela fye fyonse ifyo aumfwa, lelo uwacenjela alalolekesha apo alenyanta.” Muno nshiku kwaliba amalwele yamo ayo bashilasanga umuti wa kundapilako. Kanshi tulingile ukucenjela ku miti iyo balanda ukuti ilondapa amalwele yamo lelo tapaba ubushininkisho ubulanga ukuti iyo miti ilaposha. Paulo atile: “Lekeni abantu bonse beshibe ukuti muli ba mutembo [tamupampamina fye pa cintu cimo].” (Abena Filipi 4:5) Mu nshita ya kubika amano yonse ku bumi bwesu, tufwile ukubika sana amano ku kupepa Yehova. Nga twabika fye amano yonse ku fya bumi, kuti twaba na bukaitemwe. (Abena Filipi 2:4) Twalishiba ukuti pali ino nshita te kuti tube no bumi ubwapwililika.  Kanshi mulebika sana amano mu kubombela Yehova.—Belengeni Abena Filipi 1:10.

9. Bushe ilembo lya Abena Roma 14:13, 19 kuti lyakuma shani ifyo tupingulapo pa fya bumi, kabili finshi fingalenga mu cilonganino mwiba ukwikatana?

⁹ Umwina Kristu uushipampamina fye pa cintu cimo, tapatikisha bambi ukucita ifyo alemona ukuti e fili bwino. Mu calo cimo, abaupana bamo balekoselesha bambi ukulanwa umuti umo no kulalya ifya kulya fimo pa kuti babe no bumi ubusuma. Bamunyina na bankashi bamo balisumine ukucita ifyo babele lelo bambi balikeene. Nomba ilyo uyu muti ne fya kulya babele ukulya fishabombele, aba bwananyina balifulilwe sana. Aba abaupana balikwete insambu sha kusalapo nampo nga kubomfya umuti no kulalya ifyo ifya kulya nelyo iyo, lelo tabakwete insambu sha kupatikisha abanabo. Bushe ifi aba abaupana bacitile ifyali no kuleta malekano mu cilonganino fyali fye bwino? Abena Kristu bamo abaleikala mu Roma nabo baletontonkanya ifyapusanapusana pa fya kulya ifyo balingile ukulalya e lyo ne mitebeto balingile ukulasefyako. Finshi Paulo abafundile? Abebele ukuti: “Umuntu umo amona ubushiku bumo ati bwalicindama ukucila ububiye; umbi na o amona ubushiku bumo ukuti bwaba fye nga shimbi; cila muntu ashininkishe bwino ukuti ico aletontonkanya e cishinka.” Kanshi tulingile ukucenjela pa kuti tatulepunwisha bambi.—Belengeni Abena Roma 14:5, 13, 15, 19, 20.

10. Mulandu nshi tulingile ukucindikila ifyo bambi baisalila ukucita? (Moneni icikope pa ntendekelo ya cino cipande.)

¹⁰ Limo te kuti twishibe umulandu Umwina Kristu asalilapo ukucita ifintu fimo. Cinshi tulingile ukucita? Tatulingile ukumupingula nelyo ukumupatikisha ukuleka ukucita ifyo umwine asalilepo. Nalimo uyo uwa bwananyina alingile ukusambilisha sana kampingu yakwe, nelyo kampingu yakwe nalimo yalinaka. (1 Abena Korinti 8:11, 12) Nelyo limbi ni fwe bene tushasambilisha sana kampingu yesu. Kanshi cila muntu alikwata insambu sha kusala imyundapilwe alefwaya, alikwata no buntungwa bwa kupingula pa fyakuma ubumi bwakwe, kabili eushingamwa na pali fyonse ifingacitika.

11, 12. Bushe Baibolo kuti yatwafwa shani ukulasala bwino ifya kuleseshamo icitendwe?

¹¹ Yehova atubumbile ukuti tuleipakisha ukwangala. Solomone alembele ukuti kwaliba “inshita ya kuseka” ne “nshita ya kusansamuka.” (Lukala Milandu 3:4) Nomba te fya kuleseshamo icitendwe fyonse ifisuma ifingalenga twatuusha, nelyo ukuipakisha. E lyo kabili tatufwile ukulapoosa inshita iikalamba sana ku kulesha icitendwe. Bushe kampingu yesu kuti yatwafwa shani ukulasala bwino ifya kuleseshamo icitendwe ifyo Yehova atemwa?

¹² Baibolo itusoka ukukanaba ne “micitile ya muntu umubembu,” pamo nga “ubulalelale, ukukowela, imibele ya nsoni, ukupepa utulubi, ukupupa imipashi, ukupatana, ifikansa, ubufuba, icipyu, ulubuli, ifyakaniko, amalekano, umufimbila, ukukolwakolwa, iciwowo, ne fyapala ifi.” Paulo alandile ukuti “abalecita ifyaba ifi tabakengile mu  bufumu bwa kwa Lesa.” (Abena Galatia 5:19-21) Kanshi tufwile ukuyipusha atuti: ‘Bushe kampingu yandi ilankaanya ukutamba nelyo ukwangalako ifyangalo fya bunkalwe, ifya kucimfyanya, ifyakuibika mu kapoosa mweo nelyo ifilanga ukuti abantu bamo balicindama ukucila bambi? Bushe kampingu yandi ilansoka nga natunkwa ukutamba amafilimu umuli ifye shiku, ubulalelale, bucakolwa, nelyo ukupupa imipashi?’

13. Bushe ukufunda kwaba pali 1 Timote 4:8 na pa Amapinda 13:20 kuti kwatwafwa shani ukusala bwino ifya kuleseshamo icitendwe?

¹³ Amafunde ya mu Baibolo kuti yatwafwa ukulasambilisha kampingu yesu pa kuti tulesala bwino ifya kuleseshamo icitendwe. Ku ca kumwenako, Baibolo itila “ukutukusha umubili kwafwa fye panono.” (1 Timote 4:8) Abantu abengi balomfwa bwino ukutukusha umubili lyonse pantu kulabalenga baba no bumi ubusuma. Nomba kuti mwacita shani nga mulefwaya ukuba pe bumba ilyo muletukusha umubili? Bushe tulingile ukusala abo tulingile ukutukusha nabo umubili? Amapinda 13:20 yatila: “Uule-enda na ba mano akaba uwa mano, lelo uwangala na bawelewele akacula.” Kanshi tulingile ukulabomfya kampingu yesu iyo twasambilisha bwino pa kusala ifya kuleseshamo icitendwe.

14. Bushe ulupwa lumo lwabomfeshe shani amashiwi yaba pa Abena Roma 14:2-4?

¹⁴ Ba Christian na ba Daniela balikwata abana abakashana babili. Ba Christian batile: “Ilyo twali pa Mapepo ya Lupwa, twalanshenye pa fya kuleseshamo icitendwe. Twasuminishenye ukuti tufwile ukulasala bwino ifya kuleseshamo icitendwe. Nomba ni bani abo twingalanda ukuti fibusa fisuma? Umwana wesu umo umukashana aliilishenye ukuti nga bali pa kutuusha ku sukulu, ifyo ba Nte bamo abo alesambilila nabo balecita tafyalewama. Kabili atile aletunkwa ukulabakonkelesha. Twalanshenye ukuti, bonse twalikwata kampingu, kabili tulingile ukulaisalila ifya kuleseshamo icitendwe nabo tukalaba nabo ilyo tuleyangala.”—Belengeni Abena Roma 14:2-4.

15. Bushe Mateo 6:33 kuti yatwafwa shani nga tulefwaya ukulesha icitendwe?

¹⁵ Bushe tulingile ukupoosa inshita yalepa  shani pa fya kuleseshamo icitendwe? Bushe mwalibika sana amano ku kulongana, ku mulimo wa kubila, na ku kuisambilisha Baibolo nelyo mwabika amano ku kulesha icitendwe? Finshi mwacindamika sana? Yesu atile: “E ico, intanshi mulefwaya ubufumu no bulungami bwakwe, na fyonse ifi ifyo mukabila akamupeela.” (Mateo 6:33) Ilyo mulepingula pa fyo mwalabomfya inshita, bushe kampingu yenu ilamwibukishako amashiwi ayo Yesu alandile?

16. Bushe kampingu yesu itukoselesha shani ukushimikilako abantu imbila nsuma?

¹⁶ Kampingu iyasambilishiwa bwino taipelela fye pa kutusoka ku fyabipa, lelo ilatukoselesha no kulacita ifisuma. Fimo ifisuma ifyo itukoselesha ukucita, kushimikilako bambi imbila nsuma ku ng’anda ne ng’anda e lyo na mu bunte bwa mu lyashi. Ifi e fyo na Paulo alecita. Atile: “E mulimo mfwile ukubomba. Iye, ca bulanda kuli ine nga nshibila imbila nsuma!” (1 Abena Korinti 9:16) Nga tulepashanya Paulo, kampingu yesu ikalatweba ukuti ifyo tulecita fisuma sana. Na kabili nga tulebila imbila nsuma ku bantu ciba kwati tulelanda kuli kampingu yabo. Paulo atile: “Tusambilisha abantu icine no kulenga bakampingu babo ukufwaya ukutupashanya ku menso ya kwa Lesa.”—2 Abena Korinti 4:2.

17. Bushe umukashana umo alangile shani ukuti alyumfwilile kampingu yakwe?

¹⁷ Ilyo Jacqueline ali ne myaka 16, pa fisambililo alesambilila ku sukulu pali na sayansi iilanda pa fya bumi. Nomba ilyo batendeke ukusambilila pa cisambilisho ca kuti ifintu fyasangwike fye, atile: “Kampingu yandi yalenkanya ukulandapo nge fyo nalecita lyonse. Shalefwaya ukulatungilila icimbilisho ca kuti ifintu fyasangwike fye. E ico nalilelondolwela bakafundisha ifyo nasuminamo. Icampapwishe ca kuti, balyumfwile kabili banjebele ukuyalondolwelako na ba mu kalasi pa lyashi lya kuti kwaliba Kabumba uwapangile ifintu fyonse.” Jacqueline alyumfwile bwino pantu alikutiike ku fyo kampingu yakwe iyasambilishiwa na Baibilo yamwebele ukucita. Bushe kampingu yenu na imwe ilamweba ukucita ifisuma?

18. Mulandu nshi tufwaila ukuba na kampingu iisuma kabili iyo twingashintililapo?

¹⁸ Bonse tufwaisha kulacita ifintu ukulingana na mafunde ayo Yehova atupeela kabili kampingu yesu kuti yatwafwa ukucita ifi fine. Nga tulesambilila Baibolo lyonse no kulatontonkanya sana pa fyo tulebelenga e lyo no kulacita ifyo tulesambilila, tukakansha kampingu yesu. Ne ci cikalenga kampingu Lesa atupeela ukulatutungulula bwino!