Kalata Ukufuma ku Bolivia

Baliba ne Nsansa ne Subilo Nangu ca Kutila Bapiina

NINE mishonari kabili mombela mu calo icipiina, nomba nshumfwa bwino ukumona abantu abapiina, abashakwata ne subilo. Mfwaya ukuti ukucula kupwe bwangu. Nomba nalishiba ukuti Ubufumu bwa kwa Lesa fye e bukapwisha aya mafya. Lelo nalimona ukuti abantu abakonka ifyo Icebo ca kwa Lesa cisosa balaba ne nsansa ilingi line nangu ca kutila balacula. Ba Sabina baba pa bantu abacula lelo abakwata insansa.

Napapita imyaka iingi ukutula apo ba Sabina bashindikile abena mwabo mu kunina basi ilyo baleya ku calo cimbi mu kufwaya incito iisuma. Ilyo ba Sabina baleshindika abena mwabo balisendele no twana twabo tubili utwanakashi. Batwalilile fye ukulolela abena mwabo ukuti bakabwelela apa, awe imyeshi yalepita fye te bakumoneka, yasuka ne myaka yapita, ukufika na lelo tababwela nakalya. Ukutula apo abena mwabo baila, ba Sabina balabombesha cila bushiku pa kuti baleisakamana no kusakamana abana babo babili, Milena na Ghelian.

Umuku wa kubalilapo nakumene na ba Sabina, nabasangile mwi tuuka lya bakalamba babo umo balebomba ninshi muli na bantu abengi abalefwaya ukushita ifintu. Ba Sabina balemoneka abanaka, ici calengele njishibe ukuti balibombele akasuba konse. Nalibepwishe nga kuti batemwa ukulasambilila Baibolo na ine pamo na bana babo. Banjaswike abati: “Kwena kuti natemwa, nomba nshakwata inshita. Lelo kuti muleisa mu kusambilila na bana bandi.” Nalitendeke ukusambilila na bana babo. Ilyo natwalilile ukusambilila na bana, nalishileishiba ba Sabina bwino kabili nalishibe no bucushi balepitamo.

Ba Sabina batendeka imilimo lucelocelo ne nshita ya 4 koloko. Ninshi abana bacili nabasendama mu muputule umo uo bekalamo, ba Sabina balakosha umulilo no kutendeka ukwipika inama mu cipoto icikulu ico bepikilamo lyonse. Iyi nama ya kubika mu fya kulya beta ati amapai ayo bashitisha pa kuti basangeko umwa kuliila. Umufuba bapangila aya mapai balaukashila limo icungulo bushiku.

Ba Sabina balalonga ifipe fyonse ifyo baya mu kubomfya muli wilubala ya kwashima, balongamo umwamfuli, icitofu, itebulo, utupuna, impoto na mafuta ya kwipikila, balasenda ne nama bepike e lyo no mufuba ne fikunkubiti umuba ifya kunwa bapanga ku fisabo.

Inshita nga yaba 6 koloko, ba Sabina na bana babo balaya mu kushitisha. Balasha bakoma ing’anda. Pa kuya benda fye cinshinshi, ninshi baletontonkanya fye pa mulimo balaya mu kubomba. Ilingi line ulucelo nga ndi mu ng’anda yesu iya bamishonari, ndamona uko abantu abengi balepita ukuya mu kushitisha. Ba Sabina baba pa banakashi abengi mu calo ca Bolivia abafuma pa ng’anda lucelocelo ukuya mu kushitisha ifya kulya ne fya kunwa mu musebo.

 Ba Sabina na bana babo bafika apo bashitishisha ku ma 6:30, ninshi e lyo fye akasuba kaletula pa mpili. Ukwabula ukulanda nangu cimo, batendeka ukulongolola ifipe beshile na fyo no kupanga ikicini. Lyena batendeka ukupanga amapai. Aya mapai balepanga yalenunkila bwino sana ica kutila tapapitile ne nshita abantu batendeka ukwisa mu kushita.

Umuntu wa kubalilapo aisa kabili ba Sabina bamwipusha ati: “Mulefwaya amapai yanga?” Uyu mwaume uulemoneka tulo tulo talelolesha na balemwipusha, alangilila fye ku minwe ukuti alefwaya amapai yabili, kabili ba Sabina na bo bamupeela amapai yabili ayo bapangile bwino ninshi nayakaba. Alipila na kandalama. Ifi fine e fyo ciba cila bushiku. Nga bapwisha ukushitisha, balalonga ifipe no kubwelela ku ng’anda. Nangu ca kutila amolu ya ba Sabina yalakalipa pa mulandu wa iyi ncito ya kupanga no kushitisha amapai, balaya na mu kubomba incito imbi iya kushitisha mwi tuuka lya bakalamba babo.

Ilyo nafikile mwi tuuka pa kuti tutendeke ukusambilila Baibolo na bana ba ba Sabina, nasangile ninshi nababika kale utupuna tubili mu koona. Ukutula fye apo twatendekele ukusambilila na bo Baibolo, Milena na Ghelian, baletemwa sana ukusambilila kabili balepekanya bwino isambililo. Milena aali ne myaka 9 e lyo Ghelian aali ne myaka 7. Umuye nshiku, insoni bakwete shalipwile kabili balitendeke ukulanjebako ifyo baletontonkanya, kabili twaleumfwana sana. Ilyo ba Sabina bamwene ifyo twaleumfwana na bana babo, balitemenwe nga nshi. Nangu ca kuti ba Sabina tabalekwata inshita, nabo bene batile kuti batemwa ukulasambilila Baibolo.

Ilyo ba Sabina baleya baleishibilako ifya mu Baibolo, e lyo no kutemwa Yehova Lesa kwakoseleko. Batendeke ukuba ne nsansa isho bashabalile abakwatapo! Ba Sabina abalemoneka aba bulanda lyonse fye kabili abanaka pa mulandu wa ncito, nomba batendeke ukumoneka bwino. Pa kwenda bale-enda fye abacincila, kabili balemoneka fye aba nsansa. Abakalamba babo batile: “Sabina aliba ne nsansa ino nshita, kale te fyo ali.” Na bantu fye bambi balimwene ukuti ba Sabina na bana babo balyalwike sana. Nomba balishibe Lesa uo balefwaya ukwishiba pa myaka iingi.

Ba Sabina baletemwa sana ukusambilila, nomba balefilwa ukusangwa ku kulongana pa mulandu ne ncito. Ilyo nabetile mu kulongana pa Ng’anda ya Bufumu, basukile basumina. Ukutula fye bulya bushiku, ba Sabina tabatala abaleka ukulongana. Ba Sabina balipangile ifibusa fya cine cine mu cilonganino. Baishileishiba no kuti Yehova cine cine alapeela abantu abamutemwa kabili abaipeelesha ukumubombela fyonse ifyo bakabila.—Luka 12:22-24; 1 Timote 6:8.

Ba Sabina balitemenwe ifyo balesambilila kabili balefwaya ukulashimikilako abantu bambi. Nomba abene batile, “Ndomfwa umwenso nga natontonkanya pa kushimikila abantu Icebo ca kwa Lesa.” Baletontonkanya ati, ‘Bushe ne muntu uwa nsoni kabili uushasambilila, nkalasambilisha shani abantu?’ Nomba pa mulandu wa cikuuku ico babalangile ne fyo imikalile yabo ya-alwike fyalengele ukuti batendeke ukulashimikila. Na kabili balishibe ukuti abana babo bafwile ukupashanya bena. E calengele batendeke ukushimikila imbila nsuma. Abana babo nabo balitendeke ukushimikila.

Ino nshita, imikalile ya ba Sabina yalyaluka. Nangu ca kutila bacili bapiina, tababa no bulanda ilyo balebomba nga filya bali kale. E lyo balishiba no kutila ubumi bwalicindama. Apo nomba balibatishiwa, balashimikila abantu imbila nsuma ya Bufumu bwa kwa Lesa, ubukapwisha ubupiina no kucula pano calo.—Mateo 6:10.

Inshita nga yaba 5 koloko ya lucelo, ba Sabina balaipekanya ukufuma pa ng’anda yabo iya muputule fye umo. Nomba tabaya mu kushitisha amapai. Baya mu kukumana na Bena Kristu banabo pa kuti baye mu kushimikila mu musebo. Ukubomfya inshita yabo cila mulungu ku kwafwa abantu bambi kwalilenga insansa shabo ukufulilako. Balasha bakoma mu ng’anda no kuya mu kushimikila mu musebo ninshi bali fye aba nsansa. Mu nshita ya kusenda wilubala, basenda icola ca fitabo. Muli ici cola basendelamo Baibolo ne mpapulo isho baya mu kupeela abantu, ishi mpapulo shilanda pa fisuma ifikacitika ku ntanshi. Ba Sabina batila, “Nshaletontonkanyapo ukuti nkalashimikila abantu Icebo ca kwa Lesa.” Kabili balanda no kuti, “Ala ndatemwa nga nshi ukushimikila abantu Icebo ca kwa Lesa!”