Ubufi Bwalenga 6: Lesa Alisuminisha Ukubomfya Ifipasho ne Filubi pa Kupepa

Ni kwi ubu bufi bwafumine? “Abena Kristu ba kubalilapo tabalebomfya ifipasho pa kupepa . . . Mu myaka ya ba 300 na 400 C.E. e lyo basuminishe ukubomfya ifimpashanya mu kupepa kabili baleti abantu abatuutu kuti basambilila ifishinka pa buKristu ku fipasho ukucila mu malyashi ya fya mapepo nelyo mu fitabo.”—E fyasosele icitabo ca Cyclopedia of Biblical, Theological, and Ecclesiastical Literature, by McClintock and Strong, Volyumu 4, amabula 503 na 504.

Cinshi Baibolo isambilisha? ‘Wilaipangila cilubi, nangu icimpashanya ica kupashanya icintu cimo icaba mu muulu, nangu icaba pano calo, nangu icaba mu menshi pe samba lya calo. Wilafukamina cilubi nangu fye ukucipepa.’ (Ukufuma 20:4, 5, Bible wa Mushilo) Umutumwa Yohane alembeele Abena Kristu ba kubalilapo ukuti: “Mwe twana, muletaluka ku tulubi.”—1 Yohane 5:21.

Bushe ifi aba macalici abengi balanda ukuti ifimpashanya ni nshila fye iya kupepelamo nelyo ukucindikilamo uo fimininako, cishinka? Icitabo ca The Encyclopedia of Religion catile: “Pa kubala, ifimpashanya balefibomfya fye pa kusambilisha abantu e lyo no kuyemfeshako ifintu, lelo aka kali kabepekesho fye. Nomba tapakokwele batendeke ukufibomfya mu kupepa. Abali mu mipepele ya Orthodox e balebomfya sana ifipasho mu kupepa.” Lelo, kasesema Esaya alipwishe bwino ukuti: “Ni kuli nani mwingapashanya Lesa, kabili kuti mwatila apalana na cinshi?”—Esaya 40:18.

Belengeni na aya malembo: Esaya 44:13-19; Imilimo 10:25, 26; 17:29; 2 Abena Korinti 5:7

ICISHINKA NI CI:

Lesa alikaanya ukubomfya ifilubi ne fimpashanya

KAANENI UBUFI, KONKENI ICINE

Finshi twingasondwelela pali ubu bufi ubo twalandapo mu kusupawila ubo basambilisha mu macalici ayengi? Iyi “milumbe [mu ciGriki ni myʹthos] ya bufi,” te kuti icimfye icine icisansamusha abantu kabili icayanguka ukumfwa icaba mu Baibolo.—2 Petro 1:16.

E ico, mwishingashinga ukulinganya ifyo bamusambilisha ku Cebo ca kwa Lesa, kabili ilyo mulelinganya beni no mutima wa kufwaya ukwishiba icishinka. (Yohane 17:17) Nga mwacite fi, ubu bulayo bwa kuti: “Mukeshiba icine, ne cine cikamulenga ukuba abantungwa,” bukafikilishiwa kuli imwe.—Yohane 8:32.

[Abatusuminishe Ukubomfya Icikope pe bula 9]

Pictorial Archive (Near Eastern History) Est.