Ababelenga Ino Magazini Balepusha Ukuti . . .

Bushe Yesu e Mikaele Malaika Mukalamba?

▪ Ee. Caliseeka abantu ukukwata amashina ayengi. Ifi fine e fyo caba na ku bantu abalembwa mu Baibolo. Ku ca kumwenako, Yakobo balimwinike ishina na limbi ilya kuti Israele. (Ukutendeka 35:10) Umutumwa Petro na o balemwita amashina yalekanalekana 5, Sumeone, Simone, Petro, Kefasi, na Simone Petro. (Mateo 10:2; 16:16; Yohane 1:42; Imilimo 15:7, 14) Nomba kuti twashininkisha shani ukuti ishina limbi ilya kwa Yesu ni Mikaele? Moneni ubushininkisho mu Malembo ayakonkapo.

Ishina lya kuti Mikaele lisangwa imiku isano muli Baibolo. Mwi buuku lya kwa Daniele lisangwamo imiku itatu. Pali Daniele 10:13, 21, tubelengapo ukuti Mikaele alyafwile malaika uo batumine pe sonde. Uyu Mikaele bamwita no kuti “umo pali bacilolo bapulamo” nelyo “cilolo wenu.” Pambi ni pali Daniele 12:1, apo tubelenga ukuti mu nshiku sha mpela, “akema Mikaele, cilolo mukalamba uwimininako abana ba bantu bobe.”

Pambi apo balumbula Mikaele ni pa Ukusokolola 12:7, apo balondolola ukuti “Mikaele na bamalaika bakwe” balelwa inkondo iikalamba iyalengele ukuti Satana Kaseebanya na bamalaika bakwe ababipa babatamfye mu muulu.

Nga namumona muli aya malembo, monse umo balumbula Mikaele, bamulandapo nge mpalume iilwilako abantu ba kwa Lesa no kubacingilila. Na kabili alilwishishe fye no mulwani mukalamba uwa kwa Yehova, Satana.

Muli Yuda icikomo 9, Mikaele bamwita ukuti “malaika mukalamba.” Baibolo tailanda ukuti bamalaika bakalamba, lelo ilanda fye ukuti “malaika mukalamba.” Ilembo limbi ilyalanda pali malaika mukalamba ni 1 Abena Tesalonika 4:16, apo Paulo alondolwele Yesu uwabuuka ku bafwa ukuti: “Shikulu [Yesu] umwine akeka ukufuma ku muulu ne shiwi lyakwe ilya maka likomfwika, e kutila ishiwi lya kwa malaika mukalamba kabili ipenga lya kwa Lesa likomfwika.” Kanshi Yesu Kristu e malaika mukalamba uo ili lembo lilandapo.

Cinshi twingasondwelela pali ifi twalandapo? Kuti twasondwelela ukuti Yesu Kristu e Mikaele malaika mukalamba. Amashina yonse yabili, ilya kuti Mikaele (ilipilibula ukuti “Nani Uwaba Nga Lesa?”) ne lya kuti Yesu (ilipilibula ukuti “Yehova E Pusukilo”)—yalanga ukuti Yesu e waba pa ntanshi mu kutungilila ukuteka kwa kwa Lesa. Pa Abena Filipi 2:9 patila: “Lesa na o alimusansabike [e kutila Yesu] kabili mu cikuuku amupeele ishina ilyacila amashina yonse.”

Calicindama ukwishiba ukuti ubumi bwa kwa Yesu tabwatendeke ilyo afyelwe pano isonde. Ilyo Yesu talafyalwa pano calo, malaika alitandalile Maria no kumweba ukuti ali no kwimita ku maka ya mupashi wa mushilo no kukwata umwana kabili ali no kumwinika ishina lya kuti Yesu. (Luka 1:31) Ilyo Yesu aleshimikila, ilingi alelanda ukuti afumine ku muulu.—Yohane 3:13; 8:23, 58.

Kanshi ilyo Yesu ali ku muulu ali ni Mikaele. Kabili ilyo abuushiwe no kubwelelamo ku muulu, aliletwalilila ukuba Mikaele, malaika mukalamba, “pa kuti Lesa Shifwe acindikwe.”—Abena Filipi 2:11.