Ababelenga Ino Magazini Balepusha Ukuti . . .

Ni kwi kukaba Paradaise iyo Baibolo ilandapo?

▪ Yesu alaile umwaume uwalefwa uwalangile icitetekelo muli ena, ukuti: “Uli no kuba na ine mu Paradaise.” (Luka 23:43) Bushe uyu mwaume akaba kwi? Bushe Paradaise ikabela mu muulu, nelyo pano isonde, nangu ni ku cifulo cimo uko abantu balolela ukupingulwa?

Abafyashi besu aba kubalilapo baleikala mu Paradaise. Baibolo itweba ukuti: “Yehova Lesa alimine ibala mu Edeni ku kabanga, abikilemo no muntu uo abumbile. . . . E lyo Yehova Lesa abuulile umuntu no kumubika mwi bala lya Edeni ku kulilima no kulisakamana.” (Ukutendeka 2:8, 15) Ilyo aya mashiwi bayapilibwile ukuyatwala mu ciGriki, ishiwi lya kuti “ibala” balipilibwile ukuti pa·raʹdei·sos, ukwafuma ishiwi lya kuti “paradaise.”

Filya fine abaupana bengakusha ing’anda yabo nga ca kutila abana bafula, e fyo na bafyashi besu aba kubalilapo bali no kukusha Paradaise ilyo abantu baleya balefulilako. Lesa abebele ukuti: “Kumaneni pe sonde no kulimapo.”—Ukutendeka 1:28.

Kanshi, Kabumba wesu alefwaya ukuti abantu balekwata abana no kulaikala muli Paradaise pano pene pe sonde. Bali no kwikala umuyayaya muli Paradaise pano pene pe sonde kabili inshiishi tashali no kubamo. Mwi sonde e mo abantu bonse bali no kulaikala umuyayaya. E mulandu wine ifintu ifyaba mwi sonde fituletela sana insansa! Lesa atupangile ukuti tuleikala mwi sonde ilisuma.

Bushe ifyo Lesa alefwaya abantu ukwikala fyalyaluka? Awe nakalya. Pantu Yehova atweba ukuti: ‘E fikaba icebo icifuma mu kanwa kandi. Tacakabwelele kuli ine ukwabula ukucita nangu cimo, lelo cikacita ico mfwaya.’ (Esaya 55:11) Ilyo papitile imyaka ukucila 3,000 ukutula apo Lesa apangiile abantunse, Baibolo yalandile pali “Kapanga we sonde kabili Kalenga wa liko” ukuti ‘talipangile apa fye,’ lelo ‘alipangile ukuti lileikalwamo.’ (Esaya 45:18) Ukufwaya kwa kwa Lesa takwa-aluka. Isonde likaba paradaise na kabili.

Icisuma ca kuti, amalembo ayengi ayalanda pali Paradaise yalondolola fye ifyo imikalile ikaba pe sonde. Ku ca kumwenako, ukusesema kwa kwa Esaya kutila: “Bakakuula amayanda no kwikalamo; bakalima na mabala ya myangashi no kulya ifisabo fya yako.” (Esaya 65:21) Bushe ni kwi uko bakuula amayanda no kulima amabala? Ni kwi uko balya ifisabo? Ni pe sonde. Amapinda 2:21 yalanda fye ukwabula ukupita na mu mbali ukuti: “Abalungama e bakekala pa calo.”

Na Yesu na o alilandile pali paradaise ya pano isonde. Ca cine ukuti alilandile na pali paradaise ya ku muulu, lelo banono fye abasalwa ukuyako. (Luka 12:32) Nga bafwa, aba bantu balabuukila muli Paradaise ya ku muulu kabili bakateka pamo na Kristu abakalaikala muli Paradaise pano isonde. (Ukusokolola 5:10; 14:1-3) Aba bakateka ba ku muulu bakalateka bwino kabili bakashininkisha ukuti Paradaise ya pano isonde ilesungwa bwino ukulingana ne fyo Lesa umwine afwaya.

Yesu alishibe ukuti ifi e fyo Lesa alefwaya ukuti isonde libe. Pantu na kuba, ali na Wishi ku muulu ilyo ibala lya Edeni lyapangilwe. Abantu bonse abakwata icitetekelo kuti baisaikala muli paradaise pano pene pe sonde. (Yohane 3:16) Yesu alaya abantu ba musango uyu ukuti: ‘Muli no kuba na ine mu Paradaise.’—Luka 23:43.

[Abatusuminishe Ukubomfya Icikope pe bula 25]

© FORGET Patrick/SAGAPHOTO.COM/Alamy