Palameni Kuli Lesa

Ilyo Abakote Bakabwelela ku Bwaice

TAKWABA nangu umo uufwaya ukukota, ukukwata inkanda iyafunyanya, ukukanalamona bwino, ukukanaumfwikisha, nelyo ukukanakwata amaka ya kwenda! Nalimo mwalitontonkanyapo ukuti, ‘Mulandu nshi Lesa atupangile ukuti tuleba na maka ilyo tuli abalumendo lelo ukwisaba fye cimbi cimbi lilya twakota?’ Imbila nsuma ya kuti Lesa talefwaya ukuti tulekota. Kabili pa mulandu wa kuti alitutemwa, alafwaya ukufumyapo ukukota! Moneni amashiwi Elihu aebele Yobo, ayaba pali Yobo 33:24, 25.

Elenganyeni ifyacitikile Yobo, umwaume wa cishinka uo Yehova atemenwe. Satana atwishike bukaele bwa kwa Yobo, kabili atile Yobo alebombela Lesa pa mulandu wa kuti alemupaala, lelo Yobo taishibe ifi fyonse. Apo Yehova alicetekele Yobo kabili alishibe no kutila kuti afumyapo ifyabipa ifingamuponena, asuminishe Satana ukuti eshe Yobo. Lyena Satana “ailelwalika Yobo ifipute ifyabipisha ukutampila ku nyantilo ya lukasa lwakwe no kufika pa kati ka mutwe.” (Yobo 2:7) Umubili wa kwa Yobo wali ne mititi, inkanda yakwe yalikakabele, yalifiitile, kabili yaleubuluka. (Yobo 7:5; 30:17, 30) Nalimo mwamona ifyo alekalipwa. Na lyo line, Yobo alitwalilile uwa cishinka, atile: “Nshakaleke ukuba uwa kaele mpaka ne mfwa yandi!”—Yobo 27:5.

Lelo Yobo alicitile icilubo icikalamba. Ilyo amwene kwati alafwa, abikile sana amano ku kuilungamika, ‘aleimona uwalungama ukucila Lesa.’ (Yobo 32:2) Lesa abomfeshe Elihu ukukalipila Yobo. Lelo amwebele ne mbila nsuma iyafumine kuli Lesa, ati: “Mupokololeni [Yobo] pa kuti etentemukila ku nindi! Ninsanga ica kumulubwilako! Lekeni umubili wakwe uleleme ukucila uwa mwaice; abwelele na ku nshiku sha bulumendo bwakwe.” (Yobo 33:24, 25) Aya mashiwi yafwile yalengele Yobo ukuba ne subilo. Tali na kutwalilila ukucula mpaka fye no kufwa. Yobo nga alapila, Lesa ali no kupokelela ica kumulubwilako no kumulubula ku macushi yonse. *

Yobo ali-icefeshe ilyo bamulungike kabili alilapile. (Yobo 42:6) Ukwabula no kutwishika, Yehova alipokelele ica kulubwilako Yobo icafimbile pa cilubo acitile no kulenga ukuti Lesa amundape no kumupaala. Yehova “apaalile Yobo pa numa ukucila pa kutendeka.” (Yobo 42:12-17) Elenganyeni ifyo Yobo aumfwile, ilyo Lesa amupaalile no kumundapa ubulwele bwabipisha ica kuti “umubili wakwe walelema ukucila uwa mwana”!

Ica kulubwilako ico Yobo alipile kuli Lesa cabombele fye pa nshita iinono, pantu Yobo atwalilile ukuba uushapwililika kabili pa numa alifwile. Ifwe twalikwata ica kutulubwilako icisuma nga nshi. Pa mulandu wa kutemwa kwakwe, Yehova atupeele Umwana wakwe, Yesu, ukwisatulubula. (Mateo 20:28; Yohane 3:16) Bonse abacetekela muli ici cilubula balikwata isubilo lya kwikala umuyayaya mwi sonde lya paradaise. Mu calo cipya, Lesa akalubula abantu ba cishinka ku kukota. Bushe te kuti mutemwe ukusambilila ifyo mwingacita pa kuti mukesemonako ilyo umubili wa bakote ‘ukalelema ukucila uwa mwaice’?

Amalembo ya Kubelenga mu April:

◼ Yobo 16-37

[Futunoti]