Icingasansamusha Ababa ne Mitima ya Bulanda
Palameni Kuli Lesa
Icingasansamusha Ababa ne Mitima ya Bulanda
UMWANAKASHI umo Umwina Kristu uwalwele amasakamika pa nshita ntali atile: ‘Yehova te kuti antemwe.’ Alemona kwati Yehova ali ukutali na ena. Bushe ca cine Yehova aba ukutali ku babomfi bakwe ababa na masakamika? Icasuko ca kusansamusha caba mu mashiwi ya kwa Lesa ayalembele Davidi, ayaba pa Amalumbo 34:18.
Davidi alishibe ifyo umubomfi wa kwa Yehova uuli na masakamika omfwa. Ilyo Davidi ali umulumendo, ali ni mbutushi, pa mulandu wa kuti imfumu Shauli iyali no bufuba yalefwaisha ukumwipaya. Davidi abutukile ku musumba wa Gati uwa baPelishiti uko alemona ukutila Shauli te kuti ayeko pantu muli uyu musumba mwali abalwani babo. Lelo ilyo abaPelishiti bamwishibe, balafwaya no kumwipaya, Davidi ali-fungushenye kwati muntu wapena. Davidi alumbenye Lesa ukuti e wamupuswishe, kabili e calengele alembe Amalumbo 34.
Bushe Davidi alemona ukuti Lesa aba ukutali ku baba na masakamika, abomfwa kwati tabacindama kabili Lesa te kuti abapooseko amano? Davidi alembele ukuti: “Yehova ali mupepi ku baba ne mitima ya bulanda; kabili apususha abasakamikwa imitima.” (Icikomo 18) Natumone ifyo aya mashiwi yengatusansamusha no kutupeela isubilo.
“Yehova ali mupepi.” Icitabo cimo citila aya mashiwi “yapilibula ukuti Shikulu alabika amano ku babomfi bakwe kabili alabasakamana, lyonse alafwaisha ukubafwa no kubapususha.” Ukwishiba ukuti Yehova alabika amano ku bantu bakwe kulatusansamusha. Alamona ifyo bapitamo muli shino “nshita ishayafya nga nshi,” kabili aleshiba ifyo bomfwa.—2 Timote 3:1; Imilimo 17:27.
“Ku baba ne mitima ya bulanda.” Mu fyalo fimo amashiwi ya kuti “umutima wa bulanda” yapilibula ukutemwa umuntu uushikutemenwe. Lelo, ukulingana no wasoma umo, amashiwi Davidi alandile yapilibula “ubulanda ubu bwine bonse tukwata.” Ca cine, na babomfi ba kwa Lesa aba cishinka limo balakwata amafya ayakalamba ayalenga imitima yabo ukuba no bulanda.
“Abasakamikwa imitima.” Ababa no bulanda baimona kwati tabacindama ica kuti limo ne subilo lilapwa. Icitabo umwaba ifya kukonka pa kupilibula Baibolo citila amashiwi ya kuti “abasakamikwa imitima” kuti bayapilibula no kuti “abashakwata isubilo.”
Bushe Yehova amona shani “ababa ne mitima ya bulanda” na “basakamikwa imitima”? Bushe alaitalusha kuli bena, ukubamona kwati tabacindama kabili tabalinga ukubabikako amano no kubatemwa? Awe, nakalya! Nga filya fine umufyashi uwatemwa umwana wakwe amufukatila no kumusansamusha ilyo ali na mafya, e fyo na Yehova aba mupepi na babomfi bakwe abalilila kuli ena ukuti abafwe. Alafwaisha ukusansamusha aba mitima ya bulanda na basakamikwa imitima. Kuti abapeela amano na maka ayo bakabila pa kuti bashipikishe amafya ayali yonse ayo bengakwata.—2 Abena Korinti 4:7; Yakobo 1:5.
Bushe te kuti mutemwe ukwishiba ifyo mwingacita pa kuti mupalame kuli Yehova? Uyu Lesa wa cikuuku alaya ukuti: “Njikala pamo no wacula no mulanda, pa kuti mpuupuutule abalanda no kupuupuutula imitima ya bacula.”—Esaya 57:15.
Amalembo ya kubelenga mu June: