Ababelenga Ino Magazini Balepusha Ukuti . . .

Bushe Lesa Amona Abantu Bamo Ukuti Balicindama Ukucila Bambi?

▪ Awe, te fyo amona. Baibolo ilanda ukuti: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:34, 35.

Ifyo Lesa amona abantu bonse e fyacindama ukucila ifyo abantu abashapwililika batontonkanya. Abantu abengi bamona kwati umutundu umo (maka maka umutundu wabo) walicindama ukucila imitundu imbi. Umusobolola wa musango yu e wakweteko na Charles Darwin, uwalembele ukuti: “Ku ntanshi, . . . imitundu ya bantu abacenjela ikalofya no kupyana imitundu ya bantu abatuutu.” Icabipa ca kuti abantu abengi balabatitikisha ku bantu abamona kwati imitundu yabo yalicindama ukucila imitundu imbi.

Bushe caliba fye bwino ukulatontonkanya ukuti imitundu imo yalicindama ukucila imbi? Ku ca kumwenako, ukulingana ne fyo basayantisti baletunganya, bushe balisanga ifilanga ukuti imitundu imo mu cifyalilwa fye yalicila imitundu imbi? Nakalya. Uwasambilila sana pa mfyalo Bryan Sykes atile: “Abantu bonse bakwata imfyalo shimo shine fye. . . . Ilingi abantu balanjipusha ukuti bushe kwaliba DNA ya ba Griki nelyo iya bena Italy? Lelo mbasuka ukuti takwaba. . . . Bonse twakwata fye DNA imo ine.”

Ifi basanga filomfwana ne fyo Baibolo ilanda. Baibolo isambilisha ukuti Lesa apangile umwaume umo fye no mwanakashi umo, uko abantu bonse bafuma. (Ukutendeka 3:20; Imilimo 17:26) Kanshi Lesa amona ukuti kwaba fye umutundu umo, e kutila abantunse.

Yehova tamona ukuti inkanda ya muntu nelyo ifyo umo amoneka fyalicindama. Lelo ico Lesa amona ukuti e cacindama sana, mutima wesu uwa mampalanya, nelyo ifyo twaba mu kati. Alanda ukuti: “Abantu bapingula bambi ukulingana ne fyo bamoneka, lelo ine mpingula abantu ukulingana ne fyaba mu mitima yabo.” (1 Samwele 16:7, Contemporary English Version) Ukulaibukisha ifi kuti kwatusansamusha nga nshi. Kuti kwatusansamusha shani?

Te mulandu no mutundu wesu, fwe bengi te fyonse twatemwa pa fyo tumoneka. Na lyo line tapali ifyo twingacitapo. Lelo kuti twa-alula icintu cimo icacindama sana, e kutila amatontonkanyo ya mutima wesu. (Abena Kolose 3:9-11) Nga twatontonkanyapo sana, kuti twasanga ukuti tumona kwati twalicila imitundu imbi nelyo ukuti imitundu imbi yalitucila. Apo ukutontonkanya kwa musango yu kwalipusana ne fyo Lesa atontonkanya, tufwile ukukosapo pa kuti tufumye amatontonkanyo ya musango yu mu mitima yesu.—Amalumbo 139:23, 24.

Yehova akatwafwa fye nga tule-esha na maka ukulaimona nge fyo atumona no kulamona bambi nge fyo Yehova abamona. Icebo cakwe citucinkulako ukuti: “Amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.” (2 Imilandu 16:9) Aya mashiwi ya cine te mulandu no mutundu wesu.